Read Imbabura Highland Quichua 2 CRÓNICAS 1 Bible Online

2 CRÓNICAS 1 - Imbabura Highland Quichua bible

2 CRÓNICAS 1

¹Davidpaj churi Salomonmi, llactataca shinllitapacha ña mandajurca. Paita Mandaj Taita Diosca paihuan cashpami, paitaca ninandapacha jatunyachirca.

²Salomonga, tucui israelcuna tandanajuchunmi cayarca. Huaranga soldadocunata mandajcunata, patsaj soldadocunata mandajcunata, juezcunata, tucuilla israelcunata tucui mandajcunata, familiacunata mandajcunatami cayarca.

³Salomonga, tucui chai tandanajushca gentecunandimi, Gabaón shuti lomapi tiaj altarman rirca. Taita Dioshuan tuparina jatun carpaca chaipi cajpimi, chaiman rirca. Chai carpataca, Mandaj Diosta servij Moisesmi, jichushca pambapi rurachishca carca.

⁴Ashtahuangarin Davidca, Diospaj arcataca, Quiriat-jearim shuti pueblomandami chai arcata alichingapaj pai rurashca pushtuman apamushca carca. Paica, shuj carpatami Jerusalenbi shayachishca carca.

⁵Shinallata Hur shuti runapaj churi, Uri shuti runapaj churi Bezaleel shuti runa rurashca bronce altarpashmi, Mandaj Diospaj jatun carpa ñaupajpillata carca. Chai altar ladomanmi Salomonga, tucuilla tandanajushca gentecunandi, Diosta tapungapaj rirca.

⁶Dioshuan tuparina jatun carpapi tiajuj bronce altar ladoman Mandaj Diospaj ñaupajman Salomón vichai rishpaca, huaranga animalcunatami Diosman carashpa, chai altar jahuapi rupachijurca.

⁷Chai tutallatami Taita Diosca, Salomonman ricurishpa: “Imata ñuca carachun munashpapash mañahuailla” nirca.

⁸Shina nijpimi Salomonga, Taita Diostaca cashna nirca: “Canga, ñuca taita Davidtaca, ninandami llaquipashcangui. Chaimandami ñucataca, paipaj randi jatun mandaj cachun churahuashcangui.

⁹Mandaj Taita Dioslla. Cunanga, ñuca taita Davidman can rimashca shimitaca pactachipairi. Canmari ñucataca, cai pachapi tiaj ñutu alpashna ashtaca gentecunapaj jatun mandaj cachun churahuashcangui.

¹⁰Cai tucui gentecunapaj ñaupajpi mandai ushangapaca, cunanga, ali yachaitapash, ali yuyaitapash carahuayari. Cambaj cai tucui ashtaca gentecunata mandaitaca, ¿pita ushangayari?” nircami.

¹¹Shina nijpimi Taita Diosca, Salomondaca cashna nirca: “Cambaj shungupica, chaita yarishpami charij canata, ima alicunata charinata, na cashpaca alicachi tucunataca na mañashcangui. Shinallata canda fiñajcunata causaita quichuchumbash, canman unai causaita carachumbash, na mañashcanguichu. Ashtahuangarin ñuca agllashcacunata mandai ushangapajmi ali yachaita, ali yuyaita mañahuarcangui. Candaca, paicunapaj jatun mandaj cachunmi churarcani.

¹²Shinamandami ali yachaita, ali yuyaita cuni. Shinallata charij canatapash, ima alicunata charinatapash, alicachi tucunatapashmi cuni. Chaicunataca, cambaj punda jatun mandajcunaca, ima horallapash na charishcatami cuni. Cambaj jipaman jatun mandajcunapash, na charingachu” nircami.

¹³Salomonga, Gabaón shuti lomapi, Dioshuan tuparina jatun carpa ñaupajpi tiaj altar ladomanda Jerusalenman tigrashpami, israelcunata mandajurca.

¹⁴Salomonga, macanajuna carretacunata, caballocunapi tiarij soldadocunatami tandachirca. Paica, huaranga chuscu patsaj carretacunata, caballocunapi tiarij chunga ishcai huaranga soldadocunatami charirca. Paicunatami huaquingunataca, carretacunata alichina pueblocunapi, shujcunataca, pai jatun mandajta cuidanapi Jerusalenbi churarca.

¹⁵Jatun mandajca, culquita, orotaca rumitashnami Jerusalenbica tandachirca. Cedro caspicunatapash, Sefela shuti pambapi tiaj sacha jigos yuracunatashnami, ashtacatapacha charirca.

¹⁶Jatun mandajman randishpa apamujcunaca, pundalla ña parlashpami caballocunata, ashtahuan ali telacunata, Salomonman randishpa Egiptomanda apamunajurca.

¹⁷Egiptoman vichai rishpami, macanajuna shujlla carretataca, sucta patsaj culquipaj, shuj caballotaca, patsaj picha chunga culquipaj randishpa apamunajurca. Chai randijcunallatami, heteocunata tucui jatun mandajcunamambash, Siria llactata jatun mandajcunamambash randishpa apamunajurca.