Read Imbabura Highland Quichua 2 CRÓNICAS 11 Bible Online

2 CRÓNICAS 11 - Imbabura Highland Quichua bible

2 CRÓNICAS 11

¹Roboam shuti runa, Jerusalenman shamushpaca, israelcunahuan macanajungapajmi Judá aillumandapash, Benjamín aillumandapash, macanajunata ali yachaj patsaj pusaj chunga huaranga soldadocunata agllashpa tandachirca. Roboam runaca, pai mandajushca llactata cutin paipajman tigrachingapajmi, chashna rurajurca.

²Ashtahuangarin Mandaj Diosca, pai Taita Diospaj Semaías shuti runagumanmi, cai shimicunata cashna nishpa villarca:

³“Salomonbaj churi, Judá llactata jatun mandaj Roboam runatapash, Judapaj, Benjaminbaj aillu tucui israelcunatapash, cashna nigri:

⁴Mandaj Diosca, cashnami nin: ‘Cangunapaj huauquicunahuan macanajungapaca, na vichai rinachu canguichi. Cangunapaj huasicunaman tucuicuna tigraichilla. Caitaca, ñucallatami chashna rurajuni’ ninmi nigri” nircami. Paicunaca, Mandaj Dios mandashcata cazushpami, Jeroboam runahuan macanajungapaca, na rishpa tigranajurca.

⁵Roboam shuti runaca, Jerusalenbimi causajurca. Paica, Judá llactata ashtahuan shinllita rurangapajmi, shuj pueblocunatapash rurachijurca.

⁶Paica, cai pueblocunatami rurachirca: Belén, Etam, Tecoa,

⁷Bet-sur, Soco, Adulam,

⁸Gat, Maresa, Zif,

⁹Adoraim, Laquis, Azeca,

¹⁰Zora, Ajalón, Hebrón shuti pueblocunatami rurachirca. Chai pueblocunaca, Benjaminbaj, Judapaj llactacunapi tiaj muyundi jatun pircacunata charij pueblocunami carca.

¹¹Shinlli torrecunatapashmi, ashtahuan shinllita rurachirca. Chaicunapica, soldadocunata mandajcunata cuidachun churashpami granocunata, vinota, aceitetapash cacharca.

¹²Tucui pueblocunapimi, jarcarina escudocunata, lanzacunata curca. Shinami, ninan shinllitapacha rurarca. Judapaj, Benjaminbaj llactacunapica pai mandashcatami cazunajurca.

¹³Tucui Israel llactamandami curacunapash, levitacunapash, paicuna maipilla causanajushca pushtumandaca, Roboam runahuan tandanajungapaj Jerusalenman shamunajurca.

¹⁴Curacuna, levitacunaca, paicuna michina pambacunata, ima shuj charishcacunatapash saquishpami, Judá llactaman, Jerusalenman shamunajurca. Diospajta ruranamanda, Jeroboam runapash, paipaj churicunapash saquichishcamandami, chashna shamunajurca.

¹⁵Jeroboam runaca, lomacunapi tiaj altarcunapaj, ayacunapaj, pai rurachishca shicu dioscunapaca, paillatami shuj curacunata churarca.

¹⁶Israelcunata Mandaj Taita Diosta tucui shunguhuan catingapaj munajcunaca, tucui Israel aillu puramandami, Jerusalenman shamuj curacunata catishpa shamunajurca. Paicunaca, paicunapaj ñaupa taitacunata Mandaj Taita Diosman animalcunata cushpa huañuchingapajmi, Jerusalenman shamunajurca.

¹⁷Shinami Judá llactata mandanataca, shinllitapacha rurashpa, Salomonbaj churi Roboam runatapash, quimsa huatacaman shinllitapacha mandachun churanajurca. Quimsa huatacamanllami Davidshna, Salomonshna Diosta cazushpa causanajurca.

¹⁸Roboam runaca, Abihail shuti huarmihuan David charishca, Jerimot shuti churipaj ushi Mahalat shuti huarmihuanmi cazararca. Abihail shuti huarmica, Eliab shuti runapaj ushimi carca. Eliab shuti runaca, Isaí shuti runapaj churimi carca.

¹⁹Chai Mahalat shuti huarmimi: Jeús, Semarías, Zaham shuti churicunata ungurca.

²⁰Mahalat shuti huarmihuan cazarashca jipami, Absalón runapaj ushi Maaca shuti huarmihuan cazararca. Chai huarmica: Abías, Atai, Ziza, Selomit shuti churicunatami ungurca.

²¹Ashtahuangarin Roboam runaca, cazarashca paipaj tucui huarmicunamanda, caishuj huarmicunamanda ashtahuan yalica, Absalón runapaj ushi Maaca shuti huarmitami juyarca. Paica, chunga pusaj huarmicunatami cazararca. Shinallata sucta chunga caishuj huarmicunatami charirca. Chai huarmicunahuanmi, ishcai chunga pusaj churicunata, sucta chunga ushicunata charirca.

²²Roboam runaca, Maaca shuti huarmihuan charishca churi Abías shuti runatami, mandaj cachun churarca. Paitaca, paipaj huauquicunata mandachunmi churarca. Paitaca, jatun mandaj cachun churangapaj munashpami, chashna rurarca.

²³Alipacha yarishpami, chai tucuilla churicunataca, Judapaj, Benjaminbaj tucui llactacunaman caiman chaiman cacharca. Shinallata muyundi jatun pircacunahuan tucui pueblocunamambashmi cacharca. Imacunatapash ashtacatapacha cushpami, tauca huarmicunahuambash cazarachirca.