Read Imbabura Highland Quichua 2 CRÓNICAS 12 Bible Online

2 CRÓNICAS 12 - Imbabura Highland Quichua bible

2 CRÓNICAS 12

¹Roboam shuti runaca, llactata ña shinlli mandajushpami, Mandaj Dios mandashca shimicunata saquirca. Tucui israelcunapashmi, paishnallata ruranajurca.

²Jatun mandaj Roboam runaca, ña picha huatata mandajujpi, Mandaj Diosta na cazushpa fiñashcamandami, Egipto llactata jatun mandaj Sisac shuti runaca, Jerusalenbi causajcunahuan macanajungapaj vichai shamurca.

³Sisac shuti runaca, huaranga ishcai patsaj carretacunahuan, caballocunapi tiarij sucta chunga huaranga soldadocunahuanmi shamurca. Chai jahuapash, na cuentai ushanalla ashtaca gentecunami, paihuanga Egiptomanda shamunajurca. Paicunaca, Libia shuti llactamanda runacuna, suquieno nishca runacuna, Etiopía llactamanda runacunami carca.

⁴Judá llactapi tiaj muyundi jatun pircacunahuan pueblocunata quichushpami, Jerusalengaman chayamurca.

⁵Chaimandami, Dios ima nishcata villaj Semaías shuti runaca, Roboam runapajman, Judá llactapi caishuj mandajcunapajman shamurca. Paicunaca, macanajungapaj Sisac shuti runa shamushcamandami, Jerusalenbi tandanajushca tianajurca. Paicunatami Semaías shuti runaca, cashna nirca: —Mandaj Diosca, cashnami nin: ‘Cangunallatami, ñucata saquihuarcanguichi. Chaimandami ñucapash cangunataca, Sisac shuti runapaj maquipi saquircani’ ninmi— nircami.

⁶Shina nijpimi, israelcunata mandajcunapash, jatun mandaj Roboam runapash ninanda pingai tucushpa, urai cumurishpa: —Mandaj Diosca, imatapash cashcatapachami ruran— ninajurca.

⁷Chashna llaquirijta ricushpami Mandaj Diosca, cai shimicunata cashna nishpa Semaías shuti runaman villarca: “Paicunaca ninandami llaquirirca. Shina cashcamanda na tucuchigrinichu. Ashtahuangarin uchami cai llaquimandaca quishpichigrini. Ñuca ninanda fiñarishcata talinshna cachamushpa, Sisac shuti runapaj maquihuan Jerusalenda llaquichinataca saquishallami.

⁸Shina saquishpapash cunanga, paita servijcunami tucugringuichi. Ñucata servishpa causanahuan, shuj llactacunata jatun mandajcunata servishpa causanahuan imashna cajta yachachunmi, chashna saquigrini” nircami.

⁹Egipto llactata jatun mandaj Sisac shuti runaca, Jerusalenman vichai shamushpami, Mandaj Diospaj huasipi, mandana huasipi imatalla ninan valishcacunata alichishcata japishpa tucuita aparca. Shinallata Salomón rurachishca, jarcarina oro escudocunatapashmi aparca.

¹⁰Chai escudocunapaj randica, jatun mandaj Roboam runaca, bronce escudocunatami rurachirca. Chai escudocunataca, jatun mandaj mandana huasiman yaicuna pungupi cuidaj soldadocunata mandajcunamanmi curca.

¹¹Mandaj Diospaj huasiman jatun mandaj rijpica, cuidaj soldadocuna shamushpami, chai escudocunata apashpa, paihuan rinajun carca. Chai jipaca, paicuna cuidana ucupillatami tigrashpa churagrin carca.

¹²Roboam runa pingai tucushpa urai cumurijpimi Mandaj Diosca, paihuan ninanda fiñarishca cashpapash, ama tucuillata tucuchingapaj ali tucurca. Shinallata Judá llactapipash, tucui imapash alimi carca.

¹³Chashna tucuita shinllitapacha churashca jipami Roboam runaca, Jerusalenbi mandajurca. Roboam runaca, chuscu chunga shuj huatata charishpami, mandai callarirca. Paica, chunga canchis huatatami, Jerusalenbi mandajurca. Mandaj Diosca, tucui Israel aillu puramandaca chai pueblotami, paipaj shuti chaipi causajuchun agllarca. Roboam runapaj mamaca, amonitapura Naama shutimi carca.

¹⁴Roboam runaca, Mandaj Diostaca na tucui shunguhuan mascangapaj munashpami nalita rurarca.

¹⁵Punda punllacuna, jipa punllacuna Roboam runa imatalla rurashcacunaca, ¿nachu Dios ima nishcata villaj Semaías shuti runapash, Dios ricuchishcata villaj Iddo shuti runapash, familiacunapaj shuticunata japishpa escribishca libropi tiajun? Roboam runaca, Jeroboam runahuanga tucui causaipimi macanajushpalla causanajurca.

¹⁶Roboam runa huañushpa, paipaj ñaupa taitacunahuan tandanajujpica, Davidpaj pueblopimi pambarca. Paipaj randica, Abías shuti paipaj churimi mandajurca.