Read Imbabura Highland Quichua 2 CRÓNICAS 15 Bible Online

2 CRÓNICAS 15 - Imbabura Highland Quichua bible

2 CRÓNICAS 15

¹Obed shuti runapaj churi Azarías shuti runapajman, Taita Diospaj Espíritu shamujpimi,

²Asa shuti runahuan tuparingapaj llujshishpa, cashna nijurca: “Can Asa shuti runapash, Judá llacta, Benjamín llacta tucui soldadocunapash, uyaichi. Cangunapash Mandaj Dioshuan cajpica, paipash cangunahuanmi canga. Canguna paita mascashpaca, cangunaca paita taringuichimi. Ashtahuangarin canguna paita saquijpica, paipashmi cangunata saquinga.

³Israelcunaca, tauca punllacunatami na llullaj Taita Diospash illaj, yachachij curapash illaj, Dios mandashcapash illaj causanajurca.

⁴Ashtahuangarin paicuna jatun llaquipi cashpami, israelcunata Mandaj Taita Diospajman tigrarishpa, paita mascanajurca. Shina mascashpami, paicunaca, paita tarinajurca.

⁵Chai huatacunapica llujshishpa rijcunapajpash, cutin tigramujcunapajpash, casilla ali causaica na tiarcachu. Ashtahuangarin tucui llactacunapi causajcunapajmi, ninan llaqui tiarca.

⁶Shuj gentecunaca, caishuj gentecunatami huañuchishpa tucuchinajurca. Shuj pueblopi causajcunaca caishuj pueblopi causajcunatami huañuchijurca. Tucui llaquicunata Taita Diosllata cachamushpa muspachijpimi, chashna ruranajurca.

⁷Ashtahuangarin cangunaca, shinlli tucuichi. Cangunapaj maquipash ushai illanshnaca, na quedanachu canguichi. Canguna imaguta rurashcamandaca, japina tianmi” nijurcami.

⁸Asa shuti runaca, Dios ima nishcata villaj Azarías runa villashca shimicunata uyashpami, cushijuita japirca. Azarías runaca, Obed shuti runapaj churimi carca. Chai jipami, millanayai yanga dioscunataca, tucui Judá llactamanda, Benjamín llactamandapash anchuchirca. Shinallata Efraín urcucunapi tiaj, pai quichushca pueblocunamandapashmi anchuchirca. Shina rurashpami, Mandaj Diospaj altartapash cutin alichirca. Chai altarca, huasi corredor ñaupajpimi carca.

⁹Chai jipaca, tucui Judá llactapi, Benjamín llactapi causajcunatapash, Efraín llactamanda, Manasés llactamanda, Simeón llactamanda shamushpa, chai Judá llactapi purinajuj gentecunatapashmi tandachirca. Israelcunaca, ashtacacunami paihuan tandanajushca carca. Paicunata Mandaj Taita Diosca, Asa shuti runahuan cajta ricushpami, paicunaca chashna tandanajushca carca.

¹⁰Asa shuti runaca, Judá llactataca, ñami chunga picha huatata mandajurca. Chai huatapaj quimsa quillapimi, Jerusalenbi tandanajunajurca.

¹¹Chai punllallatami macanajuipi quichushpa apamushca canchis patsaj huagracunata, canchis huaranga llamacunata, Mandaj Diosman cushpa huañuchinajurca.

¹²Shina huañuchishpami, aligutapacha yarishpa, paicunapaj ñaupa taitacunata Mandaj Taita Diosta tucui shunguhuan, tucui almahuan mascangapaj ari ninajurca.

¹³Israelcunata Mandaj Taita Diosta na catingapaj munajcunaca, rucu cashpa, huahua cashpa, jari cashpa, huarmi cashpapash huañuchi tucunapachami carca.

¹⁴Trompetata, bocinata huacachinajujpimi, cushijushpa ninanda caparishpa, Mandaj Diosman juramentunajurca.

¹⁵Chashna juramentushpami, Judá llactapi tucui causajcunaca cushijunajurca. Paicunaca, tucui shunguhuanmi juramentunajurca. Paicunapaj tucui munaihuan mascashcamandami, Diostaca tarirca. Chaimandami Mandaj Diosca, paicuna maipi cajpipash casilla ali causaita cararca.

¹⁶Jatun mandaj Asa shuti runaca, Maaca shuti paipaj mamatapashmi, jatun mandajshna tiajushcamandaca paillata anchuchirca. Asera shuti huarmi diosman rijchajta rurashcamandami, chashna anchuchirca. Asa shuti runaca, chai diostapash faquishpa ñutushpami, Cedrón shuti ninanda rijuj huaicu yacu manñapi rupachirca.

¹⁷Tucuita chashna rurashpapash Israel llactamandaca, lomacunapi tiaj altarcunataca na anchuchircachu. Shina cashpapash Asa shuti runaca, paipaj tucui causaipimi, Diosta tucui shunguhuan cazushpa causajurca.

¹⁸Paica culquita, orota, imalla tiashcacunata paipash, paipaj taitapash, Diospajlla cachun shicanyachishcataca, Taita Diospaj huasimanmi apamurca.

¹⁹Quimsa chunga picha huatata, Asa shuti runa mandajushcacamanmi, jatun macanajuica na ashtahuan tiarca.