Read Imbabura Highland Quichua 2 CRÓNICAS 16 Bible Online

2 CRÓNICAS 16 - Imbabura Highland Quichua bible

2 CRÓNICAS 16

¹Jatun mandaj Asa shuti runaca, quimsa chunga sucta huatata ña mandajujpimi, Israel llactata jatun mandaj Baasa shuti runaca, Judá llactapi causajcunahuan macanajungapaj vichai shamurca. Shina shamushpaca, Judá llactata jatun mandaj Asa shuti runapajman pipash ama richun, paipajmandapash pipash ama yalichunmi, Ramá shuti pueblo muyunditaca, ashtahuan shinlli jatun pircahuan jarcarca.

²Chaimandami, Judá llactata jatun mandaj Asa shuti runaca, Mandaj Diospaj huasipi, mandana huasipi imalla ninan valishcacunata alichinapi alichishca tiajuj culquita, orota llujchirca. Chaitaca, Siria llactata jatun mandaj Ben-adad shuti runaman cashna nishpa cuchunmi, Damasco puebloman cacharca:

³“Ñuca taitahuan cambaj taitahuan ari ninajushcashnallata, ñucanchipash ari nipashun. Ricui, Israel llactata jatun mandaj Baasa shuti runahuan ari ninajushcataca, yangapi churashpa ñucapajman shamuchunmi culquita, orota canman cachamuni. Ñuca ladomanda anchurichun, chashna rurapashun” nircami.

⁴Ben-adad shuti runaca, jatun mandaj Asa shuti runa mañajpi ari nishpami, Israel llacta pueblocunapi causajcunahuan macanajuchun, paipaj soldadocunata mandajcunata cacharca. Paicunami Ijón, Dan, Abel-maim shuti pueblocunatapash, Neftalí llactapi imacunalla tiashcacunata alichina pueblocunatapash quichurca.

⁵Chaita yachashpami Baasa shuti runaca, Ramá shuti pueblota shayachijushcatapash saquishpa rirca.

⁶Chaimandami jatun mandaj Asa shuti runaca, Judá llactapi causajcunata tucuillata pushashpa rishpa, Ramá shuti pueblota Baasa shuti runa shayachijushca rumicunata, caspicunata tucuillata aparca. Chaicunahuanga Geba shuti, Mizpa shuti pueblocunatami shayachirca.

⁷Chai punllacunami, Dios ricuchishcata villaj Hanani shuti runaca, Judá llactata jatun mandaj Asa shuti runapajman shamushpa, cashna nijurca: “Canga, canda Mandaj Taita Dios ayudachun mañangapaj randica, Siria llactata jatun mandajtarami ayudahuai nishpa mañashcangui. Chaimandami Siria llactata jatun mandajpaj soldadocunaca, cambaj maquimanda quishpirishpa rishca.

⁸Etiopía shuti, Libia shuti llactacunamanda soldadocunaca, macanajuna paicunapaj carretacunandi, caballopi tiarij ashtaca soldadocunandica, ¿nachu ashtacapacha carca? Shina cajpipash Mandaj Dios ayudachun can mañashcamandami, paicunataca cambaj maquipi churarca.

⁹Mandaj Diosca, ima pandatapash na yarij shunguhuan paita cazujcunaman alita rurashpa, paipaj tucui ushaita ricuchingapajmi, tucui cai pachata ricuriajun. Canga, juizu illanshnami chashna rurashcangui. Shina cashcamandami cunanmanda chaimanga, canhuan macanajungapaca ashtahuan shamunajunga” nijurcami.

¹⁰Shina nijpimi Asa shuti runaca, ninanda fiñarishpa, Dios ricuchishcata villajtaca, prezuna huasipi churarca. Chaita villashcamandaca ninandapachami fiñarirca. Asa shuti runaca, chai huatacunapimi, Judá llactapi causajcunataca, taucacunata llaquichijurca.

¹¹Ashtahuangarin ricuichi. Punda punllacuna, jipa punllacuna Asa shuti runa imatalla rurashcapash, Judá llactata, Israel llactata jatun mandajcuna imatalla rurashcata escribishca libropimi tiajun.

¹²Asa shuti runaca, quimsa chunga iscun huatata ña mandajujpimi, chaqui nanai japijpi huañunalla tucurca. Shina huañunalla cashpapash, Mandaj Diostaca na mascashpami, jambijcunatalla mascajurca.

¹³Asa shuti runaca, chuscu chunga shuj huatata ña mandajushpami, huañushpa paipaj ñaupa taitacunahuan tandanajurca.

¹⁴Pai huañujpica, Davidpaj pueblopi paita pambachun paillata rurachishca utujupimi pambarca. Paita churashca cajapica, mishquillagu ashnajuj shuj shuj jambicunatami jundachinajurca. Chai jambicunaca, mishquillagu ashnajuj jambicunata ruranata alipacha yachajcuna rurashcami carca. Chai punllapica, paita alicachishpami ninanda rupachinajurca.