Read Imbabura Highland Quichua 2 CRÓNICAS 17 Bible Online

2 CRÓNICAS 17 - Imbabura Highland Quichua bible

2 CRÓNICAS 17

¹Asa shuti runapaj randica, paipaj churi Josafat shuti runami, Judá llactataca mandajurca. Paica, shinllipachami israelcunahuan macanajurca.

²Paica, Judá llactapi tiaj muyundi jatun pircahuan tucui pueblocunapimi, soldadocunata churarca. Judá llactapipashmi, cuidaj soldadocunata churarca. Paipaj taita Asa shuti runa quichushca, Efraín llactapi tiaj pueblocunapipashmi churarca.

³Paipaj ñaupa taita David punda causashcashnallata, aliguta causashpami, Baal shuti dioscunataca na mascarca. Chaimandami Mandaj Diosca, Josafat runahuan carca.

⁴Ashtahuangarin paipaj taitapaj Taita Diosta mascashpami, Dios mandashcacunata cazujurca. Chaimandami, israelcuna rurashcashnaca na rurajurca.

⁵Chashna cajpimi Mandaj Diosca, Josafat runa mandanataca shinllitapacha churarca. Judá llactapi tucui causajcunapashmi, tucui caranacunata Josafat runaman caranajurca. Chaimandami ninan charijpash, ninanda alicachi tucushcapash carca.

⁶Chashna cashpami Josafat runaca, Mandaj Diosta cazushpa causana yuyaita paipaj shungupi ashtahuan japirca. Paica, lomacunapi tiaj altarcunatapash, Judá llacta chaupipi tiaj Asera shuti huarmi diosman rijchajcunatapashmi anchuchirca.

⁷Paica, ña quimsa huatata mandajushpami, Ben-hail, Abdías, Zacarías, Natanael, Micaías shuti mandajcunataca, Diosmanda yachachijuchun Judá llactapi tiaj pueblocunaman cacharca.

⁸Paicunahuanga, Semaías, Netanías, Zebadías, Asael, Semiramot, Jonatán, Adonías, Tobías, Tob-adonías shuti levitacunatapashmi cacharca. Elisama shuti, Joram shuti curacunatapashmi cacharca.

⁹Judá llactapica, Mandaj Dios mandashpa escribichishca librota apashpami yachachinajurca. Judá llactapi tiaj tucui pueblocunaman rishpami, gentecunaman yachachishpa purinajurca.

¹⁰Chaimandami, Judá llacta muyundipi tiaj llactacunata tucui mandajcunaca, ninandapacha Mandaj Diosta manllanajurca. Shinamandami, Josafat shuti runahuan macanajungapaca na munanajurca.

¹¹Filisteocunapashmi, tucui caranacunata, impuestota cuna culquita Josafat runaman apamunajurca. Arabecunapashmi animalcunata apamunajurca. Paicunaca, canchis huaranga canchis patsaj maltun llamacunata, canchis huaranga canchis patsaj jari chivocunatami apamunajurca.

¹²Shinamandami Josafat runaca, ashtahuan ashtahuan jatun tucushpa catijurca. Paica, Judá llactapica shinlli torrecunata, imatalla charishcata alichina pueblocunatapashmi shayachirca.

¹³Judá llactapi tiaj pueblocunapica, tucui imatapash ashtacatapachami charirca. Shinallata macanajunata ali yachaj, shinlli soldadocunatapashmi, Jerusalenbi charirca.

¹⁴Chai soldadocunaca, paicunapaj ñaupa taitacunapaj huasi ucu puracuna mashna cashcashnallata cuentajpica, caicunami: Judá llactapi huaranga huaranga soldadocunata mandaj puramandaca, Adnas shuti mandajmi, quimsa patsaj huaranga ashtahuan shinllipacha soldadocunata mandajurca.

¹⁵Paipaj catica, Johanán shuti mandajmi, ishcai patsaj pusaj chunga huaranga soldadocunata mandajurca.

¹⁶Chaipaj catica, Zicri shuti runapaj churi Amasías shuti runami mandajurca. Paica paipaj munaillatami, Mandaj Diosta servishami nishpa ari nishca carca. Paica, ishcai patsaj huaranga shinlli soldadocunatami mandajurca.

¹⁷Benjamín aillu puramandaca, imatapash na manllaj Eliada shuti mandajmi, ishcai patsaj huaranga soldadocunata mandajurca. Chai soldadocunaca arcohuan, jarcarina escudohuan alichirishcacunami carca.

¹⁸Chaipaj catica, Jozabad shuti mandajmi, macanajungapaj ali alichirishca, patsaj pusaj chunga huaranga soldadocunata mandajurca.

¹⁹Paicunami, jatun mandaj Josafat runapaj soldadocuna carca. Tucui Judá llacta muyundipi jatun pircahuan pueblocunapi churashca soldadocunatacarin, na cuentashcachu carca.