Read Imbabura Highland Quichua 2 CRÓNICAS 18 Bible Online

2 CRÓNICAS 18 - Imbabura Highland Quichua bible

2 CRÓNICAS 18

¹Josafat shuti runaca, ninan charijpash, ninanda alicachi tucushcapashmi carca. Paica, Acab shuti runapaj familia purami tucurca.

²Josafat runaca, huaquin huata jipami, Acab runata ricungapaj Samaria puebloman urai rirca. Chaimandami Acab runaca, Josafat runamambash, paihuan shamuj gentecunamambash, ashtaca llamacunata, huagracunata huañuchishpa, jatun micuita rurarca. Chaipimi Acab runaca, Josafat runataca Galaad llactapi tiaj Ramot shuti pueblopi causajcunahuan macanajungapaj, jacu nijurcalla.

³Israel llactata jatun mandaj Acab shuti runaca, Judá llactata jatun mandaj Josafat runataca, cashnami nirca: —¿Galaad llactapi tiaj Ramot shuti pueblopi causajcunahuan macanajungapaj ñucahuan risha ninguichu?— nircami. Shina nijpimi Josafat runaca, cashna nirca: —Ñucaca, canhuanga shujllashnallami cani. Ñuca soldadocunapash, cambaj soldadocunashnallatami. Shina cashcamanda, macanajuiman canhuan rishunllami— nircami.

⁴Shina nishca jipapash Josafat runaca, Israel llactata jatun mandajtaca: —Cunanga, Mandaj Dios ima nijta yachangapaj tapupai— nircami.

⁵Shina nijpimi, Israel llactata jatun mandajca, chuscu patsaj villaj runacunata tandachishpa, cashna nishpa tapurca: —¿Galaad llactapi tiaj Ramot shuti pueblopi causajcunahuan macanajugrishunllu, na cashpaca saquishallachu?— nircami. Shina nijpimi paicunaca: —Vichai rilla. Taita Diosca, can jatun mandajpaj maquipimi churanga— ninajurca.

⁶Ashtahuangarin Josafat runaca, cashnami nirca: —Dios ima nishcata tapungapaca, ¿Mandaj Dios ima nishcata villaj runa ashtahuan maijambash caipi tianrachu?— nircami.

⁷Shina nijpimi, Israel llactata jatun mandajca, Josafat runaman cashna nishpa tigrachirca: —Mandaj Dios ima nishcata tapungapaca, shuj runa tianrami. Ashtahuangarin ñucaca, paitaca na ricunayanllu. Paica, ima horallapash alitaca na villanllu, nali cashcatallami villan. Paica, Imla shuti runapaj churi Micaías shuti runami— nircami. Shina nijpimi, Josafat runaca: —Jatun mandajlla, ama chashna rimapaichu— nirca.

⁸Shina nijpimi, Israel llactata jatun mandajca, paita servij soldadota cayashpaca: —Imla shuti runapaj churi Micaías shuti runata, ucha cayamugri— nirca.

⁹Israel llactata jatun mandajpash, Judá llactata jatun mandaj Josafat runapash jatun mandajcuna churajunata churajushcami, mandangapaj tiarinapi tianajurca. Paicunaca, Samaria puebloman yaicuna pungu ladolla plazapimi tianajurca. Chaipimi tucui villajcuna, paicunapaj ñaupajpi villanajurca.

¹⁰Quenaana shuti runapaj churi Sedequías shuti runami, jirru cachucunata rurashca carca. Paica chaita ricuchishpami, cashna nirca: “Mandaj Diosca, cashnami nin: ‘Siriocunataca, cai cachucunahuan tupanshnami, tucuillata tucuchingui’ ninmi” nircami.

¹¹Tucui villajcunapash, chashnallata villashpami cashna ninajurca: “Galaad llactapi tiaj Ramot shuti pueblopi causajcunahuan macanajungapaj vichai rilla, mishanguimari. Mandaj Diosmi, can jatun mandajpaj maquipi churanga” ninajurcami.

¹²Micaías shuti runaguta cayangapaj rishca runaca, cashnami nirca: —Uyai, caishuj villajcunaca, tucuicunami jatun mandajman shujllashnalla alitalla villanajun. Can villashpapash, pai purashnallata alitalla villapangui nipanimi— nircami.

¹³Shina nijpimi Micaías runaca, cashna nirca: —Mandaj Diosca causajumbachami. Ñucaman, ñuca Taita Dios imata nishcatallami villasha— nircami. Shina nishpami, jatun mandajpajman shamurca.

¹⁴Pai chayajpimi jatun mandajca, cashna nirca: —Micaías, ¿Galaad llactapi tiaj Ramot shuti pueblopi causajcunahuan macanajungapaj rishunllachu, na cashpaca saquishunllachu?— nircami. Shina nijpimi Micaías runaca, cashna nishpa tigrachirca: —Vichai richilla, mishanguichimi. Cangunapaj maquipimi churai tucunajunga— nircami.

¹⁵Shina nijpimi jatun mandajca, cashna nirca: —¿Mashnacamanda candaca, ama llullashpa, chashna canatapacha villahuai nishpa, Mandaj Diospaj shutipi juramentuchishayari?— nircami.

¹⁶Shina nijpimi Micaías runaguca, cashna nijurca: —Tucui israelcunatami, michij illaj llamacunashna urcucunapi caita chaita purinajujta ricushcani. Shina cajpimi Mandaj Diosca, cashna nirca: ‘Paicunaca, mandajta na charinllu. Imatapash na manllashpa, tucuicuna huasiman tigrachunlla’ nircami— nijurcami.

¹⁷Shina nijpimi Israel llactata jatun mandajca, Josafat runataca cashna nirca: —¿Nachu ñucaca: ‘Paica alitaca na villangachu, ashtahuangarin llaquitallami villanga’ nijurcani?— nircami.

¹⁸Shina nijpimi Micaías runaca, cashna nijurca: —Mandaj Dios rimashca shimita uyaichi. Ñucaca, Mandaj Diostaca, pai tiarinapi tiajujtami ricurcani. Shinallata jahua pachapi tiaj tucui angelcunami, ali ladomambash, lluqui ladomambash, paipaj ladopi shayanajurca.

¹⁹Chaipimi Mandaj Diosca, cashna nishpa tapurca: ‘Galaad llactapi tiaj Ramot shuti pueblopi causajcunahuan macanajungapaj vichai rishpa llaquita apachunga, ¿pita Israel llactata jatun mandaj Acab runaman panda yuyaita cugringuichi?’ nircami. Shina nijpimi, huaquingunaca shujta, shujcunaca shujta ninajurca.

²⁰Shinamandami shuj espirituca, Mandaj Diospaj ñaupajman shamushpa: ‘Panda yuyaitaca, ñuca cugrishallami’ nirca. Shina nijpimi, Mandaj Diosca: ‘¿Imashnata ruragringui?’ nirca.

²¹Shina nijpimi chai espirituca, cashna nirca: ‘Ñuca rishpaca, paipaj tucui villajcunapaj shimipimi llullachij espíritu casha’ nircami. Shina nijpimi, Mandaj Diosca: ‘Canga, pandachi ushanami cangui. Chaita rurangapaj rilla’ nirca.

²²Ricui, cunanga Mandaj Diosllatami, cambaj tucui villajcunapaj shimipi llullachij espirituta churashca. Mandaj Diosllatami, can llaquichi tucuchunga chashna mandashca— nijurcami.

²³Shina nijpimi, Quenaana shuti runapaj churi Sedequías shuti runaca, Micaías shuti runapajman quimirishpa, lado ñavipi huactashpa cashna nirca: —Mandaj Diospaj Espirituca, ¿ñucamandaca maijan ñanda rishpata canmanra villarcayari?— nircami.

²⁴Shina nijpimi Micaías runaca, cashna nishpa tigrachirca: —Ricui, shuj ucumanda caishuj ucuman pacajushpa purijui punllami, chaitaca yachangui— nircami.

²⁵Shina nijpimi, Israel llactata jatun mandajca, cashna nirca: —Micaías runata japishpa, pueblota mandaj Amón shuti runapajmambash, jatun mandaj ñuca churi Joás runapajmambash apaichi.

²⁶Paicunataca, cashna ninguichi: ‘Jatun mandajca, cashnami nin: Micaías runataca, ñuca tigramungacaman prezuna huasipi churaichi. Imapash na tucushpa aliguta ñuca tigramungacaman, ninan llaquita apajuchun tandatapash, yacutapash asha ashalla carashpa charinguichi’ ninmi ninguichi— nircami.

²⁷Shina nijpimi Micaías runaca, cashna nirca: —Imapash na tucushpa can aliguta tigramushpaca, Mandaj Diosca na ñucahuan villachishcatami yachangui— nircami. Cashnatapashmi nirca: —Tucui gentecunapash, uyahuaichi— nircami.

²⁸Israel llactata jatun mandajpash, Judá llactata jatun mandaj Josafat shuti runapashmi, Galaad shuti llactapi tiaj Ramot shuti puebloman vichai rinajurca.

²⁹Israel llactata jatun mandajca, Josafat runataca cashnami nirca: —Ñucaca, shuj churajunata churajushpami, macanajuiman yaicusha. Canga, mandajcuna churajuna cambaj churajunatallata churajui— nircami. Chashnami, Israel llactata jatun mandajca, shuj churajunata churajushpa macanajuiman yaicurca.

³⁰Siria llactata jatun mandajca, macanajuna carretacunapi purij paipaj soldadocunata mandajcunataca, cashna nishpami mandashca carca: “Yangalla soldadocunahuambash, jatungunahuambash na macanajunachu canguichi. Israel llactata jatun mandajhuanlla macanajunguichi” nishcami carca.

³¹Carretacunapi purij soldadocunata mandajcuna, Josafat runata ricushpaca: “Paimi, Israel llactata jatun mandaj” nishpami, paihuan macanajungapaj chaupipi churanajurca. Chaimandami Josafat runaca, quishpichihuai nishpa, Diosta caparishpa mañarca. Shina mañajpimi, Mandaj Dios ayudashpa chai soldadocunataca, Taita Diosllata paipaj ladomanda caruyachirca.

³²Carretacunapi purij soldadocunata mandajcunaca, na Israel llactata jatun mandaj cajta ricushpami Josafat runataca, na ashtahuan catishpa saquirca.

³³Ashtahuangarin shuj soldadoca, arcohuan shuj flechata yangalla cacharishpami, Israel llactata jatun mandajtaca, macanajungapaj churajushca jirru churajuna chaupita yalichishpa chugrichirca. Chaimandami paica, carretata purichij runataca cashna nirca: —Carretata aisaj caballocunata tigrachishpa, macanajuna pambamanda llujchihuai. Ninandapacha chugrishcami cani— nircami.

³⁴Chai punllapica, macanajuica ashtahuanmi shinlliyarca. Shinallata Israel llactata jatun mandajpash, siriocunapaj chimba purapimi, paipaj carretapi shayajman chisharca. Chashnami, ña indi huashajujujpi huañurca.