Read Imbabura Highland Quichua 2 CRÓNICAS 2 Bible Online

2 CRÓNICAS 2 - Imbabura Highland Quichua bible

2 CRÓNICAS 2

¹Salomonga, Mandaj Diospaj shutipi mañana huasitapash, llactata mandashpa tiajuna huasitapashmi shayachingapaj yarijurca.

²Salomonga, tucui imatalla aparinajuchunga, canchis chunga huaranga runacunata, urcupi rumicunata labranajuchunga, pusaj chunga huaranga runacunatami churarca. Paicunata ricushpa mandachunga, quimsa huaranga sucta patsaj runacunatami churarca.

³Salomonga, Tiro shuti llactata jatun mandaj Hiram shuti runapajmanmi, cashna nichun cacharca: “Ñuca taita Davidhuan rurashcashnallata ñucahuambash rurapairi. Pai causana huasita shayachijuchun, cedro caspicunata paiman cachamushcashnallata cachamupairi.

⁴Ricui ñucami, ñucata Mandaj Taita Diospaj shutipi mañana huasita shayachina cani. Chai huasitaca, paipajlla cachun paiman mingangapajmi shayachisha. Chaipica, mishquilla ashnajuj inciensota paipaj ñaupajpi cushnichingapaj, paipajlla shicanyachishca tandatapash punllandi churangapaj, samana punllacunapi, luna llullu punllacunapica, tutamandapash, chishipash animalcunata Diosman cushpa tucuillata rupachingapajmi, shayachina cani. Shinallata ñucanchita Mandaj Taita Diosta yarishpa shuj jatun fiestacunata rurangapajmi shayachina cani. Chai ruranaca, Israel llactapica tucui causaipajmi canga.

⁵Ñuca shayachina huasica, jatun huasimi canga. Ñucanchi Taita Diosca, tucui dioscunatapash yali jatun Dios cajpimi, chashna rurana cani.

⁶Ashtahuangarin pai causana huasitaca, ¿pita shayachi ushangayari? ¿Jahua pachaca, ashtahuan jahuaman jahua pachapash, pai causangapaca pactanllu? Paipaj huasita shayachingapaca, ¿ñucaca pita caniyari? Ashtahuangarin inciensota paipaj ñaupajpi cushnichingapajllami, shayachingapaj munani.

⁷Cunanga orota, culquita, bronceta, jirruta imatapash ruranata ali yachaj, shuj runata cachamupai. Paica morado, puca, azul telacunata imatapash ruranata ali yachaj cachun. Shinallata Judá llactapi, Jerusalenbi imatalla ñucahuan ruranajuchun, rumita labranata ali yachajcunatapash cachamupangui. Chaicunataca, ñuca taitallatami ña alichijurca.

⁸Shinallata Líbano shuti urcupi tiaj caspicunamandaca, cedro caspicunata, ciprés caspicunata, sándalo caspicunata cachamupai. Canda servijcunaca, Líbano shuti urcupi caspicunata cuchunata ali yachajcuna cajtami yachani. Ricui, canda servijcunata ayudangapaca, ñucata servijcunallata ripangallami.

⁹Ashtaca caspicunata alichinajuchun, chashna cachamupangui. Ñuca shayachina huasica ninan jatun, juyailla huasimi canga.

¹⁰Ricui, caspicunata cuchushpa canda servijcunamanmi, pusaj huaranga pusaj patsaj quintal trigota curcani. Pusaj huaranga pusaj patsaj quintal cebadatapashmi curcani. Sucta patsaj pusaj chunga huaranga litro vinotapash, sucta patsaj pusaj chunga huaranga litro aceitetapashmi curcani” nichunmi cacharca.

¹¹Chaimandami, Tiro shuti llactata jatun mandaj Hiram shuti runaca, cashna escribishpa Salomonman tigrachimurca: “Mandaj Diosca, pai agllashcacunata juyashpami candaca, paicunata jatun mandaj cachun churashca” nircami.

¹²Shinallata Hiram shuti runaca, cashnatapashmi nichun cachamurca: “Israelcunata Mandaj Taita Diosca, alimari cangui ni tucushca cachun. Paimi, jahua pachatapash, cai pachatapash rurarca. Mandaj Diospaj huasitapash, llactata mandana huasitapash shayachijuchunga, paillatami cashna alipacha yachajushca, ali yuyaita charij, aligutapacha yarishpa rimaj, aligutapacha yarishpa purij churita, jatun mandaj Davidman cushca.

¹³Ñucaca, imata ruranatapash ali yachaj, ali yuyaita charij Hiram-abi shuti runatami, cambajman cachamurcani.

¹⁴Paica, Dan shuti aillu puramanda shuj huarmipaj churimi. Ashtahuangarin paipaj taitaca, Tiro shuti pueblomandami carca. Paica orota, culquita, bronceta, jirruta, shinallata rumita, caspita, morado, azul, yana puca telacunata, lino nishca telata imatapash ruranata ali yachajmi. Shinallata imamambash rijchajta labrashpa ruranllami. Paica, imashnalla juyaillaguta rurachun mañashcata ruranllami. Paitaca, ali yachajushca cambaj runacunahuambash, cambaj taita ñuca amo David charishca ali yachajushca runacunahuambash churanguilla.

¹⁵Cunanga, ñuca amo canda servijcunaman carasha nishca trigota, cebadata, aceiteta, vinotaca cachamupailla.

¹⁶Ñucanchipash, Líbano shuti urcupica, mashnata can munashca caspicunata cuchugrishunllami. Chai caspicunataca, mama cuchatami balsacunapi churashpa, Jope shuti pueblocaman apamushun. Chai pueblomandaca, canllata Jerusalenman apachun mandanguillami” nishpami cachamurca.

¹⁷Chai jipami Salomonga, shuj llactamanda shamushpa Israel llactapi causanajuj runacunataca, tucuillata cuentarca. Paipaj taita David cuentashca jipami chashna cuentarca. Paicunaca, patsaj picha chunga quimsa huaranga sucta patsaj runacunami cashca carca.

¹⁸Chai runacunamandaca, canchis chunga huaranga runacunatami imatalla ashtanacunapi churarca. Pusaj chunga huaranga runacunataca, urcupi rumita labranajuchunmi churarca. Quimsa huaranga sucta patsaj runacunataca, imatalla ruranacunata ricushpa mandachunmi churarca.