Read Imbabura Highland Quichua 2 CRÓNICAS 20 Bible Online

2 CRÓNICAS 20 - Imbabura Highland Quichua bible

2 CRÓNICAS 20

¹Tucui chaicunata rurashpa yalishca jipami, cashna tucurca: Moabitacuna, amonitacunami, caishuj amonitacunahuan tandanajushpa, Josafat shuti runahuan macanajungapaj shamurca.

²Chaitami huaquinguna Josafat runapajman rishpa, cashna nishpa villanajurca: “Mama cucha chimba ladopi causajcuna, Siria llactapi causajcunami, canhuan macanajungapaj ashtacacuna shamunajun. Ricui, paicunaca Hazezon-tamar nishca En-gadi shuti pueblopimi tandanajushca” ninajurcami.

³Shina villajpimi, Josafat shuti runaca ninanda manllarca. Paica, Mandaj Diosta tapungapajmi, ninanda pingai tucushpa urai cumurirca. Shinallata na micushpa Diosta mañachunmi, Judá llactapi tucui causajcunamambash villachun mandarca.

⁴Shina villajpimi, Judá llactapi causajcunaca ayudahuayari nishpa, Mandaj Diosta mañangapaj tandanajurca. Shinallata Judá llactapi tiaj tucui pueblocunapi causajcunapashmi ayudahuayari nishpa, Mandaj Diosta mañangapaj shamunajurca.

⁵Chaimandami Josafat runaca, Judá llactapi causajcuna, Jerusalenbi causajcuna tandanajushcacunapaj ñaupajpi, Mandaj Diospaj huasi mushuj patio ñaupajpi shayarirca.

⁶Paica, cashnami nijurca: “Ñucanchi taitacunata Mandaj Taita Dioslla. Canga, ¿nachu jahua pachapi causajuj Taita Dios capangui? ¿Nachu mandajuj tucui llactacunapipash can mandajungui? Ninan shinlli canapash, ushaita charinapash, ¿nachu cambaj maquipi capan? Canhuanga pipash na shayari ushangachu.

⁷Ñucanchi Taita Dioslla, cai llactapi causajcunataca, ¿nachu can agllashca israelcunapaj ñaupajmanda llujchishpa cachaparcangui? Shina llujchishpaca, ¿nachu cambaj ali cumba Abrahambaj miraicuna causaita causanajuchun caraparcangui?

⁸Paicunami, cai llactapica causanajushca. Paicunaca, cambaj shutipi mañana huasita shayachishpami, cashna ninajushca:

⁹‘Ñucanchipaj jahuapi ima llaqui shamujpi, na cashpaca espadahuan llaquichij shamujpi, na cashpaca ima ung:ui japijpi, na cashpaca yarjai japijpica, cai huasi ñaupaman shamushpami, cambaj ñaupajmambash shamupashun. (Cambaj shutica, cai huasipimi causajun). Ñucanchica, jatun llaquipi cashpami, caparishpa canda mañapashun. Shina mañajpimi, can uyashpa quishpichingui’ ninajushcami.

¹⁰Ricui cunanga, Amón shuti llactapi, Moab llactapi causajcunapash, Seir shuti urcupi causajcunapashmi shamushca. Israelcuna Egipto llactamanda shamunajujpica, paicunapaj llactata yalichunga, na munarcanguichu. Ashtahuangarin paicunamanda caruta rishpa, paicunata ama tucuchinajuchunmi mandarcangui.

¹¹Ricui paicunaca, ñucanchipaj cachun can carashca llactamanda llujchishpa cachangapaj shamushpami, ñucanchi alita rurashcamandaca nalita tigrachinajun.

¹²Ñucanchi Taita Dioslla. Paicunataca, ¿nachu llaquichina capangui? Ñucanchihuan macanajungapaj shamuj chai tucui ashtaca gentecunahuan macanajungapaca, na ushaita charipanchica. Imata ruraitapash na ushanachu capanchi. Chaimandami candalla ricurianajupanchi” nijurcami.

¹³Judá llactapi tucui causajcunami, paicunapaj uchilla huahuacunandi, paicunapaj huarmicunandi, paicunapaj churicunandi, Mandaj Diospaj ñaupajpi shayanajurca.

¹⁴Zacarías runapaj churi Jahaziel shuti runapashmi, chaipi carca. Zacarías runaca, Benaía shuti runapaj churimi carca. Benaía shuti runaca, Jeiel shuti runapaj churimi carca. Jeiel shuti runaca, Matanías shuti runapaj churimi carca. Paicunaca, levitapura Asaf shuti runapaj miraicunami carca. Tandanajushca chaupipi Jahaziel shuti runa shayajujpimi, Mandaj Diospaj Espíritu paipajman shamurca.

¹⁵Chaimandami cashna nijurca: “Judá llactapi tucui causajcunapash, Jerusalenbi causanajuj cangunapash, can jatun mandaj Josafat runapash, uyaichi: Mandaj Diosca, cangunataca cashnami nin: ‘Chai ninan ashtaca gentecunapaj ñaupajpica, na manllanachu canguichi, chujchuitallapash na chujchunachu canguichi. Cai macanajuica na cangunapajchu, ashtahuangarin Taita Diospajmi.

¹⁶Paicunahuan macanajungapaca, cayami urai rina canguichi. Ricuichi paicunaca, Sis shuti urcu vichaitami vichai shamunga. Jeruel shuti jichushca pambaman nara chayashpallatami, paicunahuanga jatun larca ladopi tuparinguichi.

¹⁷Cai macanajuipica, canguna macanajunaca na canllu. Cangunaca, Mandaj Dios ñuca, cangunata imashna quishpichijta ricushpa, casilla shayanajunallami canguichi. Judá llactapi, Jerusalenbi causajcunalla, na manllanachu canguichi, na shaijushcashna tucunachu canguichi. Cayapaca, paicunahuan macanajungapaj llujshinguichilla. Mandaj Dios ñucami, cangunahuan casha’ ninmi” nijurcami.

¹⁸Shina nijpimi Josafat runaca, alpaman chayajta cumurijurca. Shinallata Judá llactapi tucui causajcunapash, Jerusalenbi causajcunapashmi, Mandaj Diospaj ñaupajpi cungurishpa, Mandaj Diosta ninanda alicachinajurca.

¹⁹Coat shuti, Coré shuti runacunapaj miraipura levitacunapashmi, israelcunata Mandaj Taita Diostaca, shinllita caparishpa alicachingapaj shayarinajurca.

²⁰Tutamandata jatarishpaca, Tecoa shuti jichushca pambamanmi llujshinajurca. Paicuna llujshinajujpimi, Josafat runaca shayajushpallata cashna nirca: “Judá llactapi, Jerusalenbi causajcunapash uyahuaichi. Cangunata Mandaj Taita Diostalla crichi. Chashna crijpica, ima llaquipash na japingachu. Dios ima nishcata villajcuna villashcatapash crichi. Shina crishpaca, tucuipimi ali llujshinguichi” nircami.

²¹Gentecunaman ali yuyaita cushca jipami huaquingunataca, macanajunacunahuan alichirishca runacuna llujshinajujpi, Diospajlla churajunata churajushpa, Mandaj Diosman candashpa alicachinajuchun churarca. Shinallata: “Mandaj Diostaca, punchapambami cangui nichiyari. Pai llaquinaca, causaita causaicamanmi” ninajuchunmi churarca.

²²Mandaj Diosta alicachishpa candai callarijhuanmi amonitacunata, moabitacunata, Seir shuti urcumanda runacunataca, Judá llactapi causajcunahuan macanajungapaj shamushpa, pacalla chapanajuj runacunahuan, paicuna purallata huañuchirinajuchun churarca. Chaimandami paicuna purallata, caishuj chaishuj huañuchirinajurca.

²³Amonitacuna, moabitacunaca, Seir shuti urcumanda runacunata huañuchishpa tucuchingapajmi jatarinajurca. Seir shuti urcumanda runacunata huañuchishpa tucuchishca jipaca, cumba purallatami tucuicuna huañuchirinajurca.

²⁴Judá llactapi causajcunaca, jichushca pambapi tiaj torreman shamushca jipami, chai ashtaca soldadocunataca, pambapi huañushca sirinajujta ricunajurca. Shujllapash na pacajushpa rishcachu carca.

²⁵Josafat runapash, paipaj soldadocunapash, huañushcacuna imatalla charishcacunata quichungapaj shamushpaca, ashtaca charishcacunatami tarirca. Chaicunaca churajunacunapash, imapash ashtahuan valishca juyaillagucunapashmi carca. Chaicunatami, paicunapaj cachun japinajurca. Macanajuipi quichushcacunaca ashtacapacha cajpi na apai ushashpami, quimsa punllacaman tandachinajurca.

²⁶Ña chuscu punlla tucujpica, Berajá shuti pugru pambapi tandanajushpami, Mandaj Diostaca aligumari cangui ninajurca. Chaimandami chai pambataca, Berajá shuti pugru pamba nishpa shutichinajurca. Chai pambaca, cunangamanmi chai shutihuanllata.

²⁷Paicunata fiñajcunamanda Mandaj Dios quishpichishpa cushichishcamandami, Judá llactapi, Jerusalenbi causanajuj tucui soldadocunaca, Josafat runata ñaupachishpa, cushijuihuan Jerusalenman tigramunajurca.

²⁸Jerusalenman shamushpaca, salteriohuan, arpahuan, trompetahuanmi, Mandaj Diospaj huasiman shamunajurca.

²⁹Israelcunata fiñajcunahuan Mandaj Dios macanajushcataca, tucuicunami uyanajurca. Chaita uyashpaca, tucui llactapi causajcunami, Taita Diostaca ninandapacha manllanajurca.

³⁰Chaimandami Josafat runa mandajuj llactapica, casilla ali causaita charirca. Chai llactapica tucui ladopimi, Josafat runapaj Taita Diosca casilla ali causaita cararca.

³¹Cashnami Josafat runaca, Judá llactapica mandajurca: Judá llactata mandai callarishpaca, quimsa chunga picha huatatami charirca. Paica, ishcai chunga picha huatatami, Jerusalenbi mandajurca. Paipaj mamaca, Silhi shuti runapaj ushi Azuba shutimi carca.

³²Paipaj taita Asa shuti runa causashcashnallatami causajurca. Mandaj Diospaj ñaupajpica, aligutalla rurashpami, chai ali ñanmandaca, maimambash na anchurirca.

³³Chashna causajushpapash, lomacunapi tiaj altarcunataca na anchuchircachu. Gentecunaca, paicunapaj ñaupa taitacunapaj Taita Diostaca, nara tucui shunguhuan cazunajurcachu.

³⁴Punda punllacuna, jipa punllacuna Josafat runa imatalla ashtahuan rurashcacunaca, Hanani runapaj churi Jehú shuti runa escribishca libropimi tiajun. Chaitaca, Israel llactata jatun mandajcuna imatalla rurashcata escribishca libropimi villajun.

³⁵Chai tucuita rurashca jipami, Judá llactata jatun mandaj Josafat runaca, Israel llactata jatun mandaj Ocozías shuti runahuan tandanajurca. Ocozías shuti runaca, Diostaca napacha manllaj runami carca.

³⁶Tarsis shuti puebloman rina barcocunata rurangapajmi, paihuan cumba tucurca. Chai barcocunataca, Ezión-geber shuti pueblopimi rurachinajurca.

³⁷Chaimandami Maresa shuti pueblopi causajuj, Dodava shuti runapaj churi Eliezer shuti runaca, Josafat runata llaquichinataca cashna nishpa villajurca: “Ocozías shuti runahuan tandanajujpimi, Mandaj Diospash can imatalla rurashcataca tucuchigrin” nijurcami. Imashna nishcashnallata, chai barcocuna faquirijpimi, Tarsis shuti puebloman ritaca na ushanajurca.