Read Imbabura Highland Quichua 2 CRÓNICAS 22 Bible Online

2 CRÓNICAS 22 - Imbabura Highland Quichua bible

2 CRÓNICAS 22

¹Jerusalenbi causajcunaca, Joram shuti runapaj randica paipaj jipa churi Ocozías shuti runatami, jatun mandaj cachun churanajurca. Tandanajushca shuhuacuna, arabecunandi carpacunaman shamushpami, Joram shuti runapaj rucu churicunataca tucuillata huañuchishca carca. Chaimandami Judá llactataca, jatun mandaj Joram shuti runapaj churi Ocozías shuti runa mandai callarirca.

²Ocozías shuti runaca, chuscu chunga ishcai huatata charishpami mandai callarirca. Paica, shuj huatatallami Jerusalenbi mandajurca. Paipaj mamaca, Omri shuti runapaj ushi Atalía shutimi carca.

³Ocozías shuti runaca, Acab shuti runapaj huasi ucu purashnallatami nalita rurajurca. Paipaj mamami, Diosta na manllashpa nalita rurachun yuyaita cushpa causarca.

⁴Paipaj taita huañushca jipami, paillata llaquita apachun, nali yuyaita cunajurca. Chaimandami, Acab shuti runapaj huasi ucu purashnallata, Mandaj Diospaj ñaupajpica, nalita rurashpa causajurca.

⁵Ocozías shuti runaca, paicuna cushca yuyaicunata cazushpami, Siria llactata jatun mandaj Hazael shuti runahuan macanajungapaj, Galaad llactapi tiaj Ramot shuti puebloman, Israel llactata jatun mandaj, Acab runapaj churi Joram shuti runahuan rirca. Chaipimi Joram shuti runataca, sirio soldadocuna chugrichirca.

⁶Siria llactata jatun mandaj Hazael shuti runahuan, Ramot shuti pueblopi macanajunajujpi chugrichijpimi Joram shuti runaca, Jezreel shuti pueblopi jambiringapaj tigrarca. Acab shuti runapaj churi Joram shuti runaca, Jezreel shuti pueblopi ña huañunalla sirijujpimi, Judá llactata jatun mandaj Joram shuti runapaj churi Ocozías shuti runaca, paita ricungapaj urai rirca.

⁷Cashna tucunaca, Taita Diosmandami shamurca. Ocozías shuti runataca, Joram shuti runata ricungapaj shamushpa huañuchunmi saquishca carca. Paica ricungapaj shamushca jipami, Nimsi shuti runapaj churi Jehú shuti runata fiñashpa tuparingapaj, Joram shuti runahuan llujshijurca. Mandaj Diosca, Jehú shuti runatami Acab shuti runapaj tucui familiacunata tucuchijuchun, aceiteta talishpa javichun mandashca carca.

⁸Jehú shuti runaca, Acab runapaj huasi ucu puracunata huañuchijushpami, Judá llactapi causajcunata mandajcunahuambash, Ocozías runapaj huauquicunapaj churicunahuambash tuparirca. Paicunaca, Ocozías runata servijcunami carca. Paicunatami huañuchirca.

⁹Ocozías runataca, Samaria pueblopi pacajugrishcata mascashpa tarimushpami, Jehú shuti runapajman pushamushpa chaipi huañuchinajurca. Shina cashpapash, paitaca cashna nishpami pambarca: “Tucui shunguhuan Mandaj Diosta mascaj Josafat runapaj churimi carca” ninajurcami. Ocozías runapaj huasi ucu puramanda mandashpa cati ushangapaca, shujllapash na tiarcachu.

¹⁰Shinamandami Ocozías shuti runapaj mama Atalía shuti huarmica, paipaj churi huañushcata yachashcandi jatarishpa, Judá aillupura jatun mandajcunapaj miraicunataca, tucuillata huañuchishpa tucuchirca.

¹¹Ashtahuangarin jatun mandaj Joram shuti runapaj ushi Josabet shuti huarmimi, jatun mandaj Ocozías shuti runapaj churi Joastaca japishpa pacarca. Paitaca, jatun mandajpaj caishuj churicunata huañuchinajujpimi, paicunamanda shicanyachishpa pacarca. Paitapash, paita viñachij mamatapashmi, shuj ucupi pacarca. Jatun mandaj Joram shuti runapaj ushi, Joiada shuti curapaj huarmica, (Ocozías runapaca pani cashpami), chashna pacarca. Atalía shuti huarmipaj ñaupajmanda pacajpimi, chai huahuataca na huañuchinajurca.

¹²Judá llactata Atalía shuti huarmi mandajujpica Joás runaca, Mandaj Diospaj huasipimi, paicunahuan sucta huatacaman pacajushpa causajurca.