Read Imbabura Highland Quichua 2 CRÓNICAS 23 Bible Online

2 CRÓNICAS 23 - Imbabura Highland Quichua bible

2 CRÓNICAS 23

¹Ña canchis huata tucujpimi, Joiada shuti runaca shinlli tucushpa, paihuan shujlla yuyai tucuchun ari nichingapaj, patsaj soldadocunata mandajcunata cayachun cacharca. Chai mandajcunaca, caicunami carca: Jeroham shuti runapaj churi Azarías shuti runapash, Johanán shuti runapaj churi Ismael shuti runapash, Obed shuti runapaj churi Azarías shuti runapash, Adaía shuti runapaj churi Maasías shuti runapash, Zicri shuti runapaj churi Elisafat shuti runapashmi carca.

²Chai soldadocunaca, tucui Judá llactatami purinajurca. Paicunaca, Judá llactapi tiaj tucui pueblocunamanda levitacunata, Israel familiacunata mandajcunata tandachishpami, Jerusalenman shamunajurca.

³Tucuilla tandanajushca gentecunami, Taita Diospaj huasipica, jatun mandajhuan ari ninajurca. Joiada shuti runaca cashnami nijurca: “Ricuichi, jatun mandajpaj churica caipimi. Paimi, Davidpaj miraicunamandaca Mandaj Dios imashna villashcashnallata mandanga.

⁴Cunanga, caita ruraichi: Samana punllapi cuidangapaj yaicuj runacunaca, canguna puramanda quimsapi shicanyachishcamanda shujcunaca curacunahuan, levitacunahuanmi Diospaj huasi pungupi cuidanga.

⁵Quimsapi shicanyachishcamanda caishujcunaca, mandana huasipimi cuidanga. Chaishujcunaca, Callari Rumi shuti pungupimi cuidanga. Shinallata tucuilla gentecunaca, Mandaj Diospaj huasi patiocunapimi canga.

⁶Mandaj Diospaj huasipica, pipash na yaicungachu. Ashtahuangarin Diospajta ruraj curacuna, levitacunallami yaicunga. Diospajlla tucushcamandami, paicunalla yaicunga. Tucui gentecunaca, Mandaj Diospaj ñaupajpimi cuidashpa shuyanajunga.

⁷Levitacunaca, jatun mandajpaj muyundipi shayarishpami, tucui ladopi cuidanajunga. Paicunaca, tucuicunami macanajunacunata paicunapaj maquipi charinajunga. Diospaj huasi ucuman maijambash yaicushpaca huañungami. Jatun mandaj maiman rishpa cutin tigramujpipash, paihuan ringuichilla” nijurcami.

⁸Levitacuna, Judá llactapi tucui causajcunaca, Joiada shuti cura mandashcashnallatami tucuita ruranajurca. Paicunaca, tucui mandajcunami samana punllapi Diosta servingapaj yaicujcunatapash, punllapillata llujshijcunatapash cuidanajurca. Shican shican tandanajushca curacuna samana punllacunapi llujshichunga, Joiada shuti curami na saquirca.

⁹Joiada shuti curallatami, jatun mandaj David charishca lanzacunata, jarcarina jatun escudocunata, jarcarina escudocunatapash, patsaj soldadocunata mandajcunaman curca. Chaicunaca, Mandaj Diospaj huasipimi carca.

¹⁰Chai jipaca, tucui gentecunatami, jilapi shayachirca. Paicunaca, espadata tucuicuna chaririajmi, Diospaj huasi ali lado juchumandapacha, lluqui ladocaman shayanajurca. Diospaj huasihuan, altarhuan chaupipimi jatun mandajta muyundi cuidachun, tucui ladopi shayachirca.

¹¹Chai jipami, jatun mandajpaj churitaca llujchimushpa, coronata churachinajurca. Imashna causanata Dios yachachishca shimicunatapash cushpami, jatun mandajmi nishpa villanajurca. Joiada shuti curahuan, paipaj churicunahuanmi aceiteta talishpa javishpa: “¡Jatun mandajca causajuchunlla!” nishpa caparinajurca.

¹²Jatun mandaj nishpa taucacuna caparishpa calpanajujta uyashpami Atalía shuti huarmica, Mandaj Diospaj huasipi tandanajushca gentecunapajman shamurca.

¹³Chaiman chayamushpa ricushpami, jatun mandajtaca Diospaj huasiman yaicunapi shayajuj pilar ladopi shayajujta ricurca. Shinallata jatun mandajpaj ladopica mandajcunapash, trompetata huacachijcunapash shayanajujtami ricurca. Chai llactapi causanajuj tucui gentecunapash ninanda cushijushpami, shujcunaca bocinata huacachinajurca. Candajcunapash tocanacunata tocashpa, Diosta alicachinajujtami ricurca. Chaita ricushpami Atalía shuti huarmica, pai churajushcata liquishpa: —¡Umachishcamari, umachishcamari!— nishpa caparirca.

¹⁴Ashtahuangarin Joiada shuti curami, patsaj soldadocunata mandajcunata ucumanda llujchichun mandashpa cashna nirca: —Chai huarmitaca, caimanda llujchishpa canllaman apaichi. Paita maijambash catijpica, espadahuan huañuchinguichilla— nircami. “Mandaj Diospaj huasi ucupica, na huañuchinachu canguichi” nishpami, curallata mandashca carca.

¹⁵Chai soldadocunaca, chai huarmita japishpa, caballocunata llujchina punguta yalichishpa pushashpami, mandana huasiman apanajurca. Chaipimi, Atalía shuti huarmitaca huañuchinajurca.

¹⁶Chai jipami Joiada shuti curaguca, paillatapash, tucui gentecunapash, jatun mandajpash, Mandaj Diospajlla causangapaj ari ninajurca.

¹⁷Chai jipami, Baal shuti diospaj huasiman tucuilla gentecuna yaicushpa, tucuillata urmachinajurca. Shinallata chaipi tiaj altarcunatapashmi urmachinajurca. Chaipi tiaj imamambash rijchaj dioscunatapash, ñutushpami saquinajurca. Baal shuti diosta servij Matán shuti curataca, altarcunapaj ñaupajpillatami huañuchinajurca.

¹⁸Chai jipaca Joiada shuti curaguca, Mandaj Diospaj huasipi imatalla rurajcunatami churarca. Paicunataca curacuna, levitacunami mandanajurca. Davidca, Mandaj Diospaj huasipica curacunata, levitacunatami Moisés mandashpa escribishcapi nijunshnallata churashca carca. Paicunataca, Mandaj Diosman animalcunata cushpa tucuillata rupachinajuchun, shinallata David mandashcashna, cushijushpa candanajuchunmi churashca carca.

¹⁹Mandaj Diospaj huasiman yaicuna pungucunapipashmi cuidajcunata churarca. Imapash nalicunata rurashpa mapayashcacuna maijan ñandapash ama yaicuchunmi, cuidachun churarca.

²⁰Chai jipaca, patsaj soldadocunata mandajcunata, tucui mandajcunata, gentecunata tucui mandajcunata, Judá llactapi tucui causajcunatami cayarca. Mandaj Diospaj huasimanda jatun mandajta pushangapajmi, chashna cayarca. Paicunaca, mandana huasi jatun pungu chaupiman chayashpaca, chai punguta yaicushpami jatun mandajtaca, llactata mandashpa tiarinapi tiachinajurca.

²¹Chai llactapi causanajuj tucui gentecunaca, ninandami cushijunajurca. Atalía shuti huarmita espadahuan huañuchishca jipamandaca, Jerusalenbica casilla ali causaimi tiarca.