Read Imbabura Highland Quichua 2 CRÓNICAS 3 Bible Online

2 CRÓNICAS 3 - Imbabura Highland Quichua bible

2 CRÓNICAS 3

¹Salomonga, Jerusalenbi tiajuj Moriah shuti urcupimi, Mandaj Diospaj huasita shayachi callarirca. Chai urcutami, paipaj taita Davidman ricuchishca carca. Jebuseopura Ornán shuti runapaj trillana pambapi David alichishca pushtupimi shayachi callarirca.

²Salomonga, ñami chuscu huatata mandajurca. Chai huatapaj ishcai quilla, ishcai punllapimi chai huasitaca shayachi callarirca.

³Taita Diospaj huasita shayachingapaj, ucu callariman Salomón medishcacunaca, caicunami: Callaripica, ishcai chunga canchis metromi carca. Anchopaca, iscun metromi carca.

⁴Diospaj huasi ñaupajpi corredorca, tucui chai huasi anchoshnallata iscun metro jatunmi carca. Vichaiman medijpica, picha chunga chuscu metromi carca. Chai huasi ucu pircacunataca, ashtahuan ali orohuanmi jahualla quilparca.

⁵Diospaj huasi ucu jahuataca, ciprés tablacunahuanmi quilparca. Chai tablacunataca, ashtahuan ali orohuanmi jahualla quilparca. Chaipica, palmera quirucunata, cadenacunatami rurachirca.

⁶Shinallata chai huasita juyaillaguta rurangapaca, juyailla rumicunahuanmi jahualla quilparca. Orocunaca, Parvaim shuti llactamandami carca.

⁷Chashnami, Diospaj huasi ucu vigascunata, umbralcunata, pircacunata, pungucunataca, orohuan jahualla quilparca. Chai pircacunapica, querubín nishcacunatami rurachirca.

⁸Diospajlla shicanyachishca ucutapash, chashnallatami rurachirca. Chai ucuca, Diospaj huasi chimba purapi corredorshnallata, iscun metro jatunmi carca. Anchomambash, iscun metrollatami carca. Chai ucutapash, chuscu patsaj pusaj quintalta pezaj, ashtahuan ali orohuanmi jahualla quilparca.

⁹Oro clavocunataca, chunga shuj gramo yalimanda callarishpa, picha patsaj canchis chunga gramocamanmi pezarca. Shinallata altibajopi ucucunatapashmi, orohuan jahualla quilparca.

¹⁰Diospajlla shicanyachishca ucupipash, ishcai querubingunatami caspimanda rurachirca. Chaicunatapashmi, orohuan jahualla quilparca.

¹¹Chai querubingunapaj alascunaca, iscun metro jatunmi carca. Shuj alasca, ishcai metro ishcai chunga picha centimetromi carca. Chai alasmi, chai ucu pircapi tupashca carca. Caishuj alaspash, chashnallatami carca. Chai alasmi, caishuj querubinbaj alas pundahuan tuparijurca.

¹²Shinallata caishuj querubinbaj shuj alaspash chashnallatami ishcai metro, ishcai chunga picha centimetrota charirca. Chai alasmi, chai ucu pircapi tupashca carca. Caishuj alaspash, chashnallatami carca. Chai alasmi, caishuj querubinbaj alas pundahuan tupashca carca.

¹³Chai querubingunaca, paicunapaj alascunataca iscun metro jatundami chutashca shayanajurca. Chai querubingunaca, Diospajlla ucu ladoman ñavimi shayanajurca.

¹⁴Shinallata cortinacunatapashmi, azul telahuan, morado telahuan, yana puca telahuan, lino telahuan rurachirca. Chai telacunapipash, querubingunatami bordachirca.

¹⁵Diospaj huasi ñaupajpica, chunga picha metro, canchis chunga picha centimetrota charij, ishcai jatun pilarcunatami rurachirca. Chai pilarcunapaj umapi churashca capitel nishcacunaca, ishcai metro ishcai chunga picha centimetromi carca.

¹⁶Shinallata cadenacunata rurachishpami, Diospaj huasi chai pilarcunapaj umapi tianajuj capitelcunapi muyuchishpa churarca. Patsaj granadillas nishcacunatapashmi rurachirca. Chaicunataca, chai cadenacunapimi muyundi huarcurca.

¹⁷Jatun pilarcunataca, Diospaj huasi ñaupajpimi, shujtaca ali ladoman, caishujtaca lluqui ladoman shayachirca. Ali ladoman churashca pilartaca, Jaquín shutitami shutichirca. Lluqui ladoman churashca pilartaca, Boaz shutitami shutichirca.