Read Imbabura Highland Quichua 2 CRÓNICAS 30 Bible Online

2 CRÓNICAS 30 - Imbabura Highland Quichua bible

2 CRÓNICAS 30

¹Chai jipami Ezequías shuti runaca, tucui israelcunaman, Judá llactapi causajcunaman villachun cacharca. Efraín aillumambash, Manasés aillumambash cartacunata escribishpami cacharca. Israelcunata Mandaj Taita Diosta yarishpa, pascua punllapi micuita rurangapaj, Jerusalenbi Mandaj Diospaj huasiman shamuchunmi, chashna cacharca.

²Jatun mandajca, pai churashca mandajcunahuan, Jerusalenbi tandanajushca tucui gentecunahuanmi, huatapaj ishcai quillapi pascua punllapi micuita rurangapaj yarijushca carca.

³Curacunapash, Diospajlla tucushcacunaca na tauca tiajpi, gentecunapash na tandanajujpimi, pascua punllapipacha micuita rurangapaca na ushanajurca.

⁴Chaita ruranataca, jatun mandajpash, chaipi tucui tandanajushca gentecunapash, ali cajtami ricunajurca.

⁵Chaimandami Israel llactapi tucui causajcunataca, pascua punllapi micuita rurashpa, Mandaj Taita Diosta yarinajungapaj Jerusalenman shamuchun, Beerseba shuti pueblomandaca, Dan shuti pueblocaman tucuilla israelcunata cayachun, cachangapaj yarinajurca. Mandashcapi escribishca tiajunshnallata, pascua punllapi micuitaca, ña unai huatacunata saquishcamandami, chashna ruranajurca.

⁶Cartacunata apajcunaca, jatun mandajpaj maquimandapash, paillata churashca mandajcunapaj maquimandapash cartacunata apashpami, jatun mandaj mandashcashnallata, tucui Israel llactaman, Judá llactaman rinajurca. Paicunaca, cashna nishpami villanajurca: “Israelcunalla, Abrahamdapash, Isaactapash, Israeltapash Mandaj Taita Diospajman tigrarichi. Shina tigrarijpica paipash, Asiria llactata jatun mandajcunapaj maquimanda quishpirishpa huaquin puchushcacunapajman tigraringami.

⁷Cangunaca, cangunapaj taitacunashna, cangunapaj huauquicunashnaca na canachu canguichi. Paicunaca, paicunapaj ñaupa taitacunata Mandaj Taita Diosta fiñashpami na cazunajurca. Chaimandami paicunataca, canguna ricushcashnallata llaquinayaita tucuchirca.

⁸Cunanga, cangunapaj taitacunashnaca na shinlliyashcapacha tucunachu canguichi. Ashtahuangarin Mandaj Diosta cazushpa, paipaj huasiman shamuichi. Chai huasitaca, Diosmi causaita causaicaman paipajlla cachun shicanyachishca. Cangunata Mandaj Taita Diosta servichi. Shina causajpimi, nina japirinshna fiñarishcamandapash, cangunahuanga ali tucunga.

⁹Mandaj Diospajman canguna tigrarijpica, cangunapaj huauquicunata, cangunapaj churicunata, prezu apashpa charinajuj gentecunapaj ñaupajpica llaquishpa ricui tucungami. Chaimandami cai llactaman cutin tigramunajunga. Cangunata Mandaj Taita Diosca, ninanda juyaj, ninanda llaquij Diosmi. Canguna paipajman tigrarijpica, paica cangunata cuidajungallami” nishpami villanajurca.

¹⁰Cartacunata apaj runacunaca, Efraín shuti, Manasés shuti llactacunamandaca, Zabulón shuti llactacamanmi, pueblon pueblon villashpa rinajurca. Ashtahuangarin paicuna villajpica, nalicachishpami ninanda asinajurca.

¹¹Chashna cajpipash Aserpaj, Manasespaj, Zabulonbaj aillu puracunamanda huaquingunaca pingai tucushpa urai cumurishpami, Jerusalenman shamunajurca.

¹²Taita Diosca, ushaita charij paipaj maquihuanmi, Judá llactapi causajcunamambash, Mandaj Dios imashna mandashcashnallata jatun mandajpash, caishuj mandajcunapash mandashcata cazuchun, shujlla yuyaita curca.

¹³Chaimandami cati quillapica, levadura illaj tandata micuna fiesta punllata yarishpa rurangapaj, ashtacapacha gentecuna Jerusalenbi tandanajurca.

¹⁴Paicuna jatarishpami, Jerusalenbi tiaj altarcunatapash, inciensota cushnichina tucui altarcunatapash anchuchishpa, ninanda jatarij Cedrón shuti huaicu yacupi shitanajurca.

¹⁵Chai jipami, pascua punllapi huañuchina llamataca, chai huatapaj ishcai quilla chunga chuscu punllapi huañuchinajurca. Curacunapash, levitacunapash ninanda pingai tucushpami, Diospajlla tucunajurca. Chai jipami, Diosman cushpa tucuillata rupachina animalcunatapash, Mandaj Diospaj huasiman apamunajurca.

¹⁶Shinallata huashan huashan yaicungapaca, imashna ruran cashcashnallatami, Diosta servij Moisés mandashcashnallata ruranajurca. Curacunaca, animalcunapaj yahuarta levitacuna cushcata japishpami tsirapachinajurca.

¹⁷Chai tandanajuipica, taucacunami nara Diospajlla tucushcacuna tiarca. Chaimandami levitacunaca, tucui chai nara mapa illaj tucushcacuna, Mandaj Diospajlla tucuchun, chai pascua punllapi ashtaca animalcunata Diosman cushpa huañuchinajurca.

¹⁸Efraín, Manasés, Isacar, Zabulón shuti aillucunamandaca, ashtaca gentecunami nara mapa illaj tucushca tiarca. Shina cashpapash, escribishcapi nijunshnaca na pactachishpami, pascua punlla micunata micunajurca. Ashtahuangarin Ezequías runaca, paicunamandami cashna nishpa Diosta mañarca: “Mandaj Diosca aligumari. Taita Diosta mascangapaj, paicunapaj shunguta alichirishca tucui gentecunataca, paica llaquishpami ali capanman.

¹⁹Paicunaca, paicunapaj ñaupa taitacunata Mandaj Taita Diosta mascangapajmi alichirishca. Paicunaca, Diospaj huasipi mapa illaj tucungapaj imashna rurachun mandashcashnallata nara mapa illaj tucushca cashpapashmi, Diosta mascangapaj alichirishca” nishpami mañarca.

²⁰Ezequías runa chashna mañajujta uyashpami, Mandaj Diosca gentecunata alichirca.

²¹Shinami Jerusalenbi tandanajushca israelcunaca, levadura illaj tandata micuna punllapica, ninanda cushijushpa canchis punllacaman, jatun fiestata ruranajurca. Levitacunahuan, curacunahuanga punllandimi, Mandaj Diosman rurashca tocanacunata tocashpa, Mandaj Diostaca punchapambami cangui ninajurca.

²²Ezequías runaca, Mandaj Diosta servingapaj ali yuyaita charij tucui levitacunatami, paicunapaj shungupi chayajta rimajurca. Jatun fiesta punllapi micungapaj huañuchishca aichataca, canchis punllacamanmi micunajurca. Dioshuan ali cangapajpash, animalcunata cushpa huañuchishpa, shinallata paicunapaj ñaupa taitacunata Mandaj Taita Diostapash pashi nishpami micunajurca.

²³Tucui chaipi tandanajushcacunami, shuj canchis punllatapash ninanda cushijushpa, fiestata rurashpa jatun micuita rurangapaj yarinajurca. Shinami, cutin shuj canchis punllacaman cushijuihuan jatun micuita ruranajurca.

²⁴Chai micuipaca, Judá llactata jatun mandaj Ezequías runami, chaipi tandanajushca gentecunaman huaranga maltun shicuta, canchis huaranga llamata carashca carca. Shinallata caishuj mandajcunapash, huaranga maltun shicuta, chunga huaranga llamatami caranajurca. Ashtaca curacunami, ña Diospajlla tucushca carca.

²⁵Judá llactapi causanajuj tucui tandanajushca gentecunapash, curacunapash, levitacunapash, Israel llactamanda ashtaca shamushcacunapash, shinallata shuj llactamanda purijcuna, Israel llactapi, Judá llactapi causajcuna shamushcacunapashmi ninanda cushijunajurca.

²⁶Chashnami Jerusalenbica, ninandapacha cushijunajurca. Israel llactata jatun mandaj Davidpaj churi Salomón mandajui punllacunamandapacha, Jerusalenbica na chashna rurashcachu carca.

²⁷Chai jipaca curacunapash, levitacunapash shayarishpami, gentecunata bendicianajurca. Paicuna ima nishcatapash uyarcami. Paicuna mañashcapash, Taita Dios causajuj jahua pachacamanmi chayarca.