Read Imbabura Highland Quichua 2 CRÓNICAS 36 Bible Online

2 CRÓNICAS 36 - Imbabura Highland Quichua bible

2 CRÓNICAS 36

¹Chai llactapi causaj gentecunaca, Josías shuti runapaj churi Joacaz shuti runatami, paipaj taitapaj randi jatun mandaj cachun, Jerusalenbi churanajurca.

²Joacaz runaca, ishcai chunga quimsa huatata charishpami, mandai callarirca. Paica, quimsa quillatallami Jerusalenbi mandajurca.

³Paitaca, Egipto llactata jatun mandajmi, Jerusalenmanda anchuchirca. Shina anchuchishpami, Judá llactapi causajcunataca, sucta chunga pusaj quintal culquita, quimsa chunga chuscu kilo orota cushpa causanajuchun mandarca.

⁴Egipto llactata jatun mandajca, Judá llactata, Jerusalenda jatun mandaj cachunga, Joacaz runapaj huauqui Eliaquim runatami churarca. Paitaca, Eliaquim cajpipash, Joacim shutitami shutichirca. Paipaj huauqui Joacaz runataca, Necao shuti runami Egipto llactaman aparca.

⁵Joacim shuti runaca, ishcai chunga picha huatata charishpami, mandai callarirca. Paica, chunga shuj huatatami, Jerusalenbi mandajurca. Paica, paita Mandaj Taita Diospaj ñaupajpica, nalitallami rurajurca.

⁶Babilonia llactata jatun mandaj Nabucodonosor shuti runaca, paihuan macanajungapaj vichai shamushpami, cadenacunahuan huatashpa, Babilonia llactaman aparca.

⁷Babilonia llactata jatun mandaj Nabucodonosor runaca, Mandaj Diospaj huasipi imatalla charishcacunatapashmi aparca. Chaicunataca, Babilonia llactapimi paipaj diospaj huasipi churarca.

⁸Ashtahuan imatalla Joacim shuti runa rurashcapash, ninan millanayaicunata rurashcapash, pai imashna llaquichi tucushcapash, Israel llactata, Judá llactata jatun mandajcuna imatalla rurashcacunata escribishca libropimi tiajun. Paipaj randica, Joaquín shuti paipaj churimi mandajurca.

⁹Joaquín shuti huambraguca, pusaj huatata charishpami, mandai callarirca. Paica, quimsa quilla chunga punllatallami, Jerusalenbi mandajurca. Paica, Mandaj Diospaj ñaupajpica, nalitallami rurajurca.

¹⁰Ña huata tucujujpimi, jatun mandaj Nabucodonosor shuti runaca, Joaquín runata apachun cachamushpa, Babilonia llactaman aparca. Paitaca, Mandaj Diospaj huasipi tiaj ashtahuan juyailla charishcacunandimi aparca. Paita apashpaca, paipaj huauqui Sedequías shuti runatami, Judá llactata, Jerusalén pueblota, jatun mandaj cachun churarca.

¹¹Sedequías shuti runaca, ishcai chunga shuj huatata charishpami, mandai callarirca. Paica, chunga shuj huatatami, Jerusalenbi mandajurca.

¹²Paica, paita Mandaj Taita Diospaj ñaupajpica, nalitallami rurajurca. Mandaj Dios ima nishcata villaj Jeremías, Diosmanda villajujpipash, Jeremiaspaj ñaupajpica na pingai tucurcachu.

¹³Shinallata jatun mandaj Nabucodonosor runatapashmi, fiñashpa na cazurca. Sedequías runaca, chai jatun mandajmanmi, Taita Diospaj shutipi cazungapaj juramentushca carca. Chashnami shinlliyashcapacha tucushpa, shinlli shungu tucurca. Shina tucushpami, israelcunata Mandaj Taita Diospajman tigraringapaca na munarca.

¹⁴Shinallata curacunata tucui mandajcunapash, tucui gentecunapashmi jatun nalita rurashpa, ashtahuan mirachinajurca. Shuj llactacunapi causajcuna millanayaicunata rurashcata catishpami, Mandaj Diospaj huasitapash mapayachinajurca. Jerusalenbi tiaj chai huasitaca, Mandaj Diosmi paipajlla cachun shicanyachishca carca.

¹⁵Paicunapaj ñaupa taitacunata Mandaj Taita Diosca, pai agllashca gentecunatapash, paipaj huasitapash llaquishpami, pai ima nishcata villajcunahuan cutin cutin villachijurca.

¹⁶Ashtahuangarin paicunaca, Taita Dios cachamushca villajcuna villanajujtaca, na cazushpami asinajurca. Dios villachishca shimicunataca yangapi churashpami, Dios ima nishcata villajcunatapash asishpa ricunajurca. Pai agllashcacuna chashna ninanda fiñachijpimi, Mandaj Dios ninanda fiñarishcataca, na alichi ushanalla tucurca.

¹⁷Taita Diosca, chashna ninanda fiñarishca cashpami, Judá llactapi causajcunata llaquichinajuchunga, caldeocunapaj jatun mandajta cachamurca. Paimi, chairalla viñaicunataca, Diospaj huasi ucupillata espadahuan huañuchijurca. Chairalla viñai huambracunatapash, jarihuan nara tacarishca cuitsacunatapash, rucucunatapash, ashtahuan rucucunatapash na llaquishpami huañuchijurca. Paicunataca, tucuillatami jatun mandajpaj maquipi churarca.

¹⁸Shinallata Taita Diospaj huasipi tucui imalla tiashcataca, uchillatapash, jatundapash, tucui tiashcatami chai mandajpaj maquipi saquirca. Mandaj Diospaj huasipillata ima juyailla tiashcatapash, jatun mandajpaj huasipi, caishuj mandajcunapaj huasipi ima juyailla tiashcatapash, tucuillatami Babilonia llactaman aparca.

¹⁹Taita Diospaj huasitapash rupachishpami, Jerusalén muyundipi jatun pircatapash urmachinajurca. Mandashpa tiajuna huasicunatapash rupachishpa tucuchishpami, chai huasicunapi, imalla munanayai tiashcacunatapash, tucuillata tucuchinajurca.

²⁰Espadahuan huañuchi tucunamanda pacajushpa quedashcacunaca, Babilonia llactamanmi prezu apai tucunajurca. Paicunaca, Persia llactapi causajcunata jatun mandaj shamungacamanmi, Nabucodonosor runatapash, paipaj churicunatapash servishpa causanajurca.

²¹Jeremías runaguhuan, Mandaj Dios villachishca shimicuna pactachunmi, chashna rurajurca. Paicunata chai llactaman apajpi, chai llactaca cushijushpa samangacamanmi, chashna rurarca. Llaquinayaita tucuchi tucushca canchis chunga huatacuna pactangacamanmi, chai llactaca samajurca.

²²Ashtahuangarin Ciro shuti jatun mandajca, Persia llactataca ñami shuj huatata mandajurca. Chai huatapimi Mandaj Diosca, Jeremías runaguhuan villachishca pactachun Mandaj Diosllata, Persia llactata jatun mandaj Ciro shuti runaman shuj yuyaita curca. Shinamandami, pai mandajuj tucui llactacunapica shimihuanllapash, escribichishpapash cashna nishpa villachun mandarca:

²³“Persia llactata jatun mandaj Ciro shuti runami, cashna nin: Jahua pachapi causajuj Mandaj Taita Diosmi, cai pachapi tiaj tucui llactacunata mandachun cuhuarca. Paillatami, Judá llactapi tiaj Jerusalenbi paipaj huasita shayachijuchumbash mandahuarca. Shina cashcamandaca, pai agllashca puracunamanda Diosta catijcuna tiashpaca, tucuilla vichai tigrachunlla. Paicunata Mandaj Taita Diosca, paicunahuan cachun” nishpami villachirca.