Read Imbabura Highland Quichua 2 CRÓNICAS 4 Bible Online

2 CRÓNICAS 4 - Imbabura Highland Quichua bible

2 CRÓNICAS 4

¹Shinallata shuj bronce altartapashmi rurachirca. Chai altarca, iscun metro jatunmi carca. Anchomambash, iscun metrollatami carca. Vichaimambash, chuscu metro chaupimi carca.

²Shinallata bronceta yacuyachishpami, shuj mama cucha nishcatapash, alipacha redondota rurachirca. Chaitaca, shuj ladomanda chaishuj ladocaman medijpica, chuscu metro chaupimi carca. Vichaiman medijpica, ishcai metro, ishcai chunga picha centimetromi carca. Racuta caupushca puchahuan muyundita medijpica, chunga quimsa metro chaupi jatunmi carca.

³Chai mama cucha nishca ladopica, chuscu chunga picha centímetro carupimi, chunga calabaza nishcacunata muyundipi churashca carca. Chaicunataca, chai mama cucha nishcahuan tandachishpa yacuyachishpami, ishcai jilata rurashca carca.

⁴Chaica, chunga ishcai huagracunapaj jahuapimi tiajurca. Chai huagracunaca, quimsaca vichaiman, shuj quimsaca indi huashajuj ladoman, caishuj quimsaca uraiman, caishuj quimsaca indi llujshimuj ladoman ricushpami shayajunajurca. Chai mama cucha nishcaca, paicunapaj jahuapi tiajujpimi, huashacunaca ucu ladoman carca.

⁵Chai mama cucha nishcataca, canchis centímetro chaupi racutami rurashca carca. Chai muyundipica, shuj copapaj shimishnalla, na cashpaca lirio sisa shimishnallami carca. Chaipica, patsaj chunga shuj huaranga litro yacutami apan carca.

⁶Shinallata yacuta churana chunga tanquetapashmi rurachirca. Chaicunataca, pichataca ali ladoman, shuj pichataca lluqui ladomanmi churarca. Chai yacupimi, Diosman cushpa tucuillata rupachina animalpaj aichataca maillashpa mapa illajta saquina carca. Ashtahuangarin chai mama cucha nishcataca, maquita chaquita curacuna chaipi maillarichunmi churashca carca.

⁷Shinallata orota rurashca chunga candelerotapashmi, imashna rurana cashcashnallata rurarca. Chaicunataca, pichataca ali ladoman, shuj pichataca lluqui ladomanmi, Diospaj huasi ucupi churarca.

⁸Shinallata chunga mezacunatapash rurashpami, pichataca ali ladoman, shuj pichataca lluqui ladoman, Diospaj huasi ucupillata churarca. Patsaj jatun tastacunatapashmi, oromandallata rurarca.

⁹Shinallata curacunapaj patiotapash, shuj jatun patiotapash, chai patiocunaman llujshina pungucunatapash, broncehuanmi quilparca.

¹⁰Mama cucha nishcataca, Diospaj huasi ali ladopimi, indi llujshimuj ura ladoman churarca.

¹¹Hiram shuti runaca, jatun mangacunata, palacunata, jatun tastacunatapashmi rurarca. Shinami chai Hiram shuti runaca, Diospaj huasipaj imatalla ruranataca, jatun mandaj Salomonman rurashpa tucuchirca.

¹²Ishcai pilarcunata, racuta caupushca puchacunata, chai ishcai pilar jahuapi tianajuj capitel nishcacunata, shinallata ishcai linllitapashmi rurarca. Chai linllicunataca, pilarcunapaj jahuapi tianajuj ishcai capitelta muyundi quilpangapajmi rurarca.

¹³Granadilla nishcatapash, ishcai linllicunapajmi rurachirca. Chai chuscu patsaj granadillataca, chai pilarcunapaj umapi churashca capitelcunata muyundi quilpangapajmi, ishcai jilata huarcurca.

¹⁴Shinallata carretacunatapashmi rurarca. Chai carretacunapimi, yacu tanquecunata churarca.

¹⁵Yacuta churana jatun pailatapash, chai pailata huandushca shayanajuj chunga ishcai huagratapashmi rurarca.

¹⁶Calderocunata, palacunata, garfio nishcacunatapashmi rurarca. Hiram-abi shuti runaca, ashtahuan ali broncetami, Mandaj Diospaj huasipi tucui imatalla charinacunataca, jatun mandaj Salomonman rurarca.

¹⁷Chaicunataca, Sucot shuti pueblohuan, Seredata shuti pueblohuan chaupipi tiajuj Jordán yacu lado quillu alpa pambacunapimi, jatun mandajca rurachirca.

¹⁸Salomonga, tucui chaicunataca ashtacatapachami rurachirca. Chaimandami, chai broncecuna mashnata pezajtapash na yachai usharca.

¹⁹Shinami Salomonga, Taita Diospaj huasipi tucui imatalla charinacunatapash, oro altartapash rurachirca. Shinallata Diosman shicanyachishca tandata churana mezacunatapashmi rurachirca.

²⁰Shinallata candelerocunatapash, chaipi churana lamparacunatapashmi, ashtahuan ali orohuan rurachirca. Chaicunataca, mandashcapi nijunshnallata Diospajlla shicanyachishca ucu ñaupajpi michata japichingapajmi rurachirca.

²¹Sisacunata uchilla lamparacunata, tenazacunatapash oromandami rurashca carca. Ashtahuan alipacha orotami rurashca carca.

²²Shinallata pavizacunata anchuchinacunata, jatun tastacunata, cucharacunata, incensariocunataca, ashtahuan ali orohuanmi rurarca. Diospaj huasiman yaicuna pungucunatapash, Diospajlla shicanyachishca ucuman yaicuna pungucunatapash, Diospaj huasiman yaicuna jatun pungucunatapash, orohuanllatami rurachirca.