Read Imbabura Highland Quichua 2 CRÓNICAS 6 Bible Online

2 CRÓNICAS 6 - Imbabura Highland Quichua bible

2 CRÓNICAS 6

¹Chaimandami Salomonga, cashna nirca: “Mandaj Dioslla, canga yana tutapimi causasha nircangui.

²Shina cajpipash ñucaca, can causajuchunga shuj huasita shayachishpami, causaita causaicaman can chaipi causachun, shuj ucutapash rurarcani” nircami.

³Jatun mandajca tigrarishpa ricushpami, chaipi tandanajushca tucui israelcunata bendiciarca. Chaipica, tucuilla tandanajushca israelcunami shayanajurca.

⁴Paica cashnami nijurca: “Israelcunata Mandaj Taita Diosca, alicachi tucushca cachun. Ñuca taita Davidman pai imatalla nishcataca, paipaj maquihuambacha rurashpami pactachishca. Paica, cashnami nishca carca:

⁵‘Ñuca agllashcacunata Egipto llactamanda llujchimushca punllamandapacha, tucui Israel aillucunapaj pueblocunamandaca, maijan pueblotapash ñuca shuti causana huasita shayachijuchunga, na agllarcanichu. Ñuca agllashca israelcunata mandaj cachumbash, maijan runatallapash na agllarcanichu.

⁶Ashtahuangarin ñuca shuti chaipi causajuchunga, cai Jerusalendami agllarcani. Ñuca agllashca israelcunata mandachumbash, Davidtami agllarcani’ nishcami carca.

⁷Chaimandami ñuca taita Davidca, israelcunata Mandaj Taita Diospaj shutipi mañana huasita shayachinata, paipaj shungupi yarijushca carca.

⁸Ashtahuangarin Mandaj Diosca, ñuca taita Davidtaca cashnami nishca carca: ‘Ñuca shutipi mañana huasita shayachinatami, cambaj shungupi yarijushcangui. Can chaita yarijushpaca, alitami yarijushcangui.

⁹Shina cashpapash, chai huasitaca na can shayachinguichu. Ashtahuangarin canmanda llujshishca cambaj churimi, ñuca shutipi mañana huasitaca shayachinga’ nishcami carca.

¹⁰Mandaj Diosca, paipaj shimihuan chashna nishcataca pactachishcami. Chaimandami ñucaca, Mandaj Dios imashna nishcashnallata, ñuca taita Davidpaj randi israelcunata mandashpa tiarinapi tiarircani. Shinallata israelcunata Mandaj Taita Diospaj shutipi mañana huasitapashmi shayachircani.

¹¹Cai huasipimi, israelcunahuan Mandaj Dios ari ninajushpa escribishcata alichishca arcata churarcani” nijurcami.

¹²Shina nishca jipami Salomonga, Mandaj Diospaj altar ñaupajpi shayarishpa, tucui israelcuna ricujta maquita vichai chutarca.

¹³Salomonga, shayarina shuj bronce patatami rurachishca carca. Chai shayarinaca jatumbajpash, anchomambash ishcai metro, ishcai chunga picha centimetromi carca. Vichaiman medijpica, shuj metro, quimsa chunga picha centimetromi carca. Chai shayarinataca, chaupi patiopimi churashca carca. Chaiman vitsiashpami, tucui israelcunapaj ñaupajpi cungurishpa, maquita jahua pachaman vichai chutashpa cashna nijurca:

¹⁴“Israelcunata Mandaj Taita Dioslla. Can Taita Diosman rijchajca, jahua pachapipash, cai pachapipash na tianllu. Canda tucui shunguhuan cazushpa, cambaj ñaupajpi ali purij canda tucui servijcunata llaquishpami, can imata ari nishcatapash pactachijungui.

¹⁵Canda servij ñuca taita Davidman cushami nishcataca pactachishcanguimi. Cambaj shimihuan villashcataca, cambaj maquihuambacha rurashpami, cunan punllapi ricushcashnallata pactachijungui.

¹⁶Israelcunata Mandaj Taita Dioslla, cunanga canda servij ñuca taita Davidman pactachishapachami nishcataca pactachipairi: ‘Cambaj mirai puramanda ñuca ñaupajpi, Israel llactata mandangapaj tiarinapi tiarij runaca na illangachu. Chaipaca, ñuca ñaupajpi can ali purishcashnallata, cambaj churicunapash ñuca mandashcata cazushpa, ali purinatallami charin’ nishcanguimi.

¹⁷Shina cashcamanda israelcunata Mandaj Taita Dioslla, cunanga canda servij Davidman pactachishapachami nishcataca pactachipailla.

¹⁸Ashtahuangarin Taita Diosca, ¿cai pachapi runacunahuan causangapachachu imashi? Ricui, jahua pachaca ashtahuan jahuaman jahua pachapash can causangapaca, na pactanllu. Ñuca shayachishca cai huasicarin, maitata pactangayari.

¹⁹Shina cajpipash ñucata Mandaj Taita Dioslla, canda servij ñuca mañajujtaca ricuhuanguimi. Canda servij ñuca cambaj ñaupajpi caparishpa, canda ninanda mañajujtaca uyahuanguimi.

²⁰Cai huasitaca tutapash, punllapash ricuriajupanguilla. ‘Ñuca shutica, chaipimi causanga’ nishca pushtutaca ricuriajupanguilla. Canda servij ñuca caipi mañashcataca uyahuangui.

²¹Shinallata canda servij ñucapash, can agllashca israelcunapash mañanajujtaca uyapangui. Cai huasipi mañanajujtaca, can causajuj jahua pachamandami uyapangui. Shina uyashpaca, ñucanchi juchacunata cungapangui.

²²Maijan cashpapash paipaj cumbatallata fiñashpa juchata rurajpica, juramentuipacha nishpami, cai huasi ucupi tiajuj altar ñaupajpi juramentuchun pushamunga.

²³Shina juramentujpica, jahua pachamanda uyashpami, canda servijcunata aliguta ricushpa imatallapash rurapangui. Canda na manllajmambash, pai japinatallata cushpami, pai nalita rurashcatallata, paipaj jahuapi cachamupangui. Imatapash cashcatapacha rurajtaca, imatapash cashcatapacha pai rurashcamandami, chashna alita rurashpa causachun chasquipangui.

²⁴Can agllashca israelcunaca, yachashpata paicunallata canda na cazushcamanda, paicunata fiñajcunapaj ñaupajpi mishai tucungapashchari. Chashna tucujpica cambajman tigrarishpami, cambaj ñaupajpi cambaj shutita alicachishpa, cai huasipi mañanajunga.

²⁵Shina mañajpica, jahua pachamanda uyashpami, can agllashca israelcunapaj juchataca cungapangui. Shina cungashpami paicunamambash, paicunapaj ñaupa taitacunamambash, can carashca llactaman tigrachimupangui.

²⁶Paicuna juchata rurashpa canda fiñachishcamandami, jahua pacha vicharishpa na tamianga. Paicunata can llaquichijpica, cai huasi ladoman tigrarishpa canda mañashpami, cambaj shutita alicachishpa, cambajman tigrarinajunga.

²⁷Shina rurajpica, jahua pachamanda uyashpami, canda servijcunapaj juchatapash, can agllashca israelcunapaj juchatapash cungapangui. Canda cazushpa purichumbash, ali ñanda ricuchishpami yachachipangui. Can agllashcacunaman can carashca cambaj llactapipashmi tamiachipangui.

²⁸Cai llactapica jatun yarjaipash, na cashpaca jatun ung:uicunapash, chagracuna indipi chaquinapash, na cashpaca ima ung:uihuan chaquinapash, langostacuna, na cashpaca fahuashpa purij jurucuna tucuchinapashmi tianga. Na cashpaca, ñucanchi causanajuj llactaman ñucanchita fiñajcuna shamushpa, chaupipi churanapash, na cashpaca imapash shuj llaqui cashpa, ung:ui cashpapashmi tianga.

²⁹Shina tucujpica, maijan runa cashpa, na cashpaca can agllashca tucui israelcuna cashpapashmi, canda mañanajunga. Maijan cashpapash paipaj shungupi ninan llaquihuan, nanaihuan cajta yachashpami, cai huasiman paicunapaj maquita chutashpa ninanda mañanajunga.

³⁰Shina mañajpica, can causajuj jahua pachamanda uyashpami, paicunapaj juchatapash cungapangui. Shina cungashpami, paicunapaj shunguta can rijsishcamandaca, paicuna imatalla rurashpa causashcashnallata tucuicunaman cupangui. Canllami, huañuna aichayu runacunapaj shungutaca rijsipangui.

³¹Ñucanchi ñaupa taitacunaman can carashca llactapi paicuna causanajui tucui punllacunapi canda manllashpa, can yachachishcacunata cazushpa causanajuchunmi, chashna rurapangui.

³²Shinallata shuj llactamanda shamushca na can agllashca Israelpura cashpapash, cambaj jatun shutita, cambaj ninan ushaita uyashpami shamunga. Shinallata cambaj rigrata chutashpa imatalla rurashcata yachashpa shamushpami, cai huasi ladoman tigrarishpa canda mañanajunga.

³³Shina mañanajujpimi, can causajuj jahua pachamanda uyapangui. Shina uyashpami, shuj llactamanda cajpipash, paicuna imata mañashcashnallata rurapangui. Shina rurajpimi, tucui cai pachapi causajcunaca, can agllashca israelcunashnallata cambaj shutita rijsishpa canda manllashpa causanajunga. Shinallata ñuca shayachishca cai huasipi cambaj shutita jatunyachishpa mañanatapashmi yachanajunga.

³⁴Can agllashca israelcunaca, paicunata fiñajcunahuan macanajungapajmi, can maita cachashca ñanda llujshishpa rinajunga. Shina rinajushpami, can agllashca cai pueblopi, cambaj shutipi mañangapaj ñuca shayachishca cai huasi ladoman tigrarishpa mañanajunga.

³⁵Paicuna ninanda mañashcataca, jahua pachamanda uyashpami, paicunamanda shayarishpa ayudapangui.

³⁶(Juchata na ruraj runaca, shujllapash na tianllu). Canda na cazushpa juchata rurajpimi, paicunahuanga ninanda fiñaringui. Shina fiñarishpami, paicunata fiñajcuna japishpa, caru llactaman, ladolla llactaman cashpapash, prezu apachun paicunata fiñajcunapaj ñaupajpi churangui.

³⁷Paicunaca, prezu apai tucushca llactacunapi cashpami, paicunallata canda na cazushcata yachanajunga. Prezu apai tucushca llactapimi, cambajman tigrarishpa cashna nishpa mañanajunga: ‘Juchatami rurashcanchi, jatun nalitapachami rurashcanchi. Diosta na manllashpami, chashna rurashcanchi’ ninajungami.

³⁸Paicuna prezu apai tucushca llactacunapi cashpami, paicunapaj tucui shunguhuan, tucui almahuan cambajman tigrarinajunga. Prezu apai tucushca llactapi cashpami, paicunapaj ñaupa taitacunaman can carashca cai llactaman, can agllashca cai puebloman, cambaj shutipi mañangapaj ñuca shayachishca cai huasi ladoman tigrarishpa, canda mañanajunga.

³⁹Paicuna ninanda mañanajujtaca, can causajuj jahua pachamanda uyashpami, paicunamanda shayarishpa ayudapangui. Can agllashcacunataca, juchata rurashpa canda fiñachishcatapashmi cungapangui.

⁴⁰Cunanga ñuca Taita Dioslla, caipi canda ninanda mañanajujtaca, cambaj ñavihuan ricupanguiyari. Cambaj rinrihuan aliguta uyariajupanguiyari.

⁴¹Mandaj Taita Dioslla, cunanga cambash, cambaj ushaita ricuchijuj arcapash, can samana pushtupi causangapaj jatarishpa ripashunlla. Mandaj Taita Dioslla, canda servij curacunapash quishpirishcata ricuchij churajunata churajushca cachun. Cambajlla causajcunaca, can alita rurashcacunahuan cushijunajuchun.

⁴²Mandaj Taita Dioslla, aceiteta talishpa javishca cambaj jatun mandajtaca, ama jichushpa saquipaichu. Canda servij Davidta llaquijushcataca yaripairi” nijurcami.