Read Imbabura Highland Quichua ESDRAS 10 Bible Online

ESDRAS 10 - Imbabura Highland Quichua bible

ESDRAS 10

¹Esdrasca, Taita Diospaj huasi ñaupajpi cungurishpa huacashpa, juchacunata villashpa Diosta mañajujpillatami, ashtaca ashtaca israelcuna Esdraspaj ladoman quimirimunajurca. Jaricuna, huarmicuna, huahuacuna quimirimushpami, tucui gentecuna ninanda llaquirishpa huacanajurca.

²Shina huacanajujpimi, Elam shuti runapaj mirai Jehiel shuti runapaj churi Secanías shuti runaca, Esdrastaca cashna nirca: “Ñucanchimi, ñucanchi Taita Diostaca na cazushpa juchata rurashcanchi. Llactapi causanajuj puracunamandami, shuj llacta huarmicunahuan cazarashcanchi. Chashna cajpipash israelcunapaca, ali tucunata shuyana tianrami.

³Shina cashcamanda cunanga, tucui huarmicunatapash, paicunahuan charishca huahuacunatapash llujchishpa cachangapaj, ñucanchi Taita Dioshuan ari nishunchi. Chaitaca, ñuca jatun Diospash, ñucanchi Taita Diosta manllajcunapash yarichishcashnallatami rurangapaj munanchi. Shinallata mandashcapi nijunshnallatami rurangapaj munanchi.

⁴Jatari, canmi caitaca ruranapacha cangui, ñucanchipash canhuanmi canchi. Shina cashcamandaca shinlli tucushpa, chaita ucha rurailla” nircami.

⁵Shina nijpimi Esdrasca, shayarishpa curacunata, levitacunata mandajcunatapash, tucuilla israelcunatapash, Dios mandashcapi nishcashnallata paicuna pactachinajuchun juramentuchirca. Chaimandami paicunaca juramentunajurca.

⁶Chai jipami Esdrasca, Taita Diospaj huasi ñaupajmanda anchurishpa, Eliasib shuti curapaj churi Johanán shuti cura tiajuj ucuman yaicurca. Chaipica, prezu apai tucushcamanda tigramushcacuna juchata rurashcamandami, micunatapash na micushpa, yacutapash na ufiashpa, ninanda llaquirishca tiajurca.

⁷Chaimandami, prezu apai tucushcamanda tucuilla tigramushcacunataca, Jerusalenman tandanajuchun nishpa Jerusalenbipash, Judá llactapipash villachirca.

⁸Shinallata israelcunata mandajcuna, mandaj rucucuna, Jerusalenman tandanajumuchun nishcashnallata, quimsa punllacaman maijambash na shamujpica, paipaj tucuilla alpacunatapash quichunami. Shinallata prezu apai tucushca puracunapaj tandanajuimandapash llujchishpa cachai tucunami nishpami villachirca.

⁹Chaimandami, nara quimsa punlla chayajpillata Judá aillu, Benjamín aillu runacunaca, iscun quillapaj ishcai chunga punllapi, Jerusalenman tandanajumurca. Tucui gentecunami, Taita Diospaj huasi canlla plazapica, chai huarmicunata cachashcamandapash, tamianamandapash manllashpa chujchushpa tianajurca.

¹⁰Shina tianajujpimi cura Esdrasca, shayarishpa cashna nijurca: —Cangunaca, shuj llactamanda huarmicunahuan cazarashpami, juchata rurashcanguichi. Shinami israelcunapaj jahuapica, ashtahuan juchata mirachishcanguichi.

¹¹Cunanga, cangunapaj ñaupa taitacunata Mandaj Taita Diostami jatunyachina canguichi. Chai jipaca, cai llactapi causanajuj gentecunamanda, shuj llactamanda huarmicunamanda anchurishpa, Diospaj munaita ruraichi— nijurcami.

¹²Shina nijujpimi, tucuilla tandanajushcacunaca shinllita caparishpa cashna nishpa tigrachinajurca: —Can nishcashnallatami rurashun.

¹³Ashtahuangarin gentecunaca ashtacamari, punllacunapash tamia punllacunamari. Chaimandami ñambilla tianajuitaca, na ushanchi. Ashtacacunami cai juchata rurashcanchi. Chaimandami chai ruranataca, shuj punllapi, ishcai punllapica na tucuchi ushashun.

¹⁴Tucuilla caipi tandanajungapaj randica, ñucanchita mandajcunalla caipi quedashpachari ali capanman. Ñucanchi pueblocunapi causajcuna, shuj llactamanda huarmicunahuan cazarashcacunapash, ñucanchi pueblocunapi mandaj rucucunapash, chai huarmicunapaj juezcunapash, canguna cayashca punllapi shamushpachari ali capanman. Ñucanchi nalita rurashcamanda, Taita Dios ñucanchihuan ninanda fiñarishcata yalichingacamanmi, chashna rurana— ninajurcami.

¹⁵Shina nishcataca, Asael shuti runapaj churi Jonatán runahuan, Ticva shuti runapaj churi Jahazías shuti runahuanllami, nalichu ninajurca. Paicuna shina ninajujpimi, Mesulam shuti, Sabetai shuti levitacunapash, paicunapura tucushpa ayudanajurca.

¹⁶Prezu apai tucushcacunapaj miraicunaca, imashna nishcashnallatami ruranajurca. Chaimandami Esdras curapash, ñaupa taitacunapaj huasi ucu puracunata mandajcunapash, paicunapaj ñaupa taitacunapaj huasi ucu puracuna imashna cashcashnallata agllai tucurca. Paicunaca, shutipi cayajpimi, chunga quilla callari punllapica, chai huarmicunata llujchishpa cachashcamanda parlangapaj tiarinajurca.

¹⁷Shuj llactamanda huarmicunahuan cazarashca chai tucui israelcunata imashna cashcata callarishpa ricushpaca, caishuj huata callari quillapaj punda punllapimi tucuchirca.

¹⁸Shuj llactamanda huarmicunahuan cazarashca curacunapaj churicunaca, caicunami tiarca: Josadac shuti runapaj churi Jesúa shuti runapaj churicunapash, paipaj huauqui Maasías, Eliezer, Jarib, Gedalías shuti curacunapashmi carca.

¹⁹Paicunaca, paicunapaj huarmicunata llujchishpa cachashumbacha nishpami, maquita cunajurca. Paicuna chashna nalita rurashca juchamandaca, llamacunamanda shuj jari llamatami Diosman cunajurca.

²⁰Imer shuti runapaj mirai puramandaca: Hanani shuti, Zebadías shuti curacunami, chashna cazarashca carca.

²¹Harim shuti runapaj mirai puramandaca: Maasías, Elías, Semaías, Jehiel, Uzías shuti curacunami carca.

²²Pasur shuti shuti runapaj mirai puramandaca: Elioenai, Maasías, Ismael, Natanael, Jozabad, Elasa shuti curacunami carca.

²³Levita puracunamandaca: Jozabad, Simei, Kelita nishca Kelaía, Petaías, Judá, Eliezer shuti levitacunapashmi carca.

²⁴Diospaj huasipi candaj puracunamandaca: Eliasib shuti runapashmi carca. Diospaj huasi pungupi cuidaj puracunamandaca: Salum, Telem, Uri shuti runacunami carca.

²⁵Shinallata caishuj israelcunaca, caicunami: Paros shuti runapaj mirai puramandaca: Ramía, Jezías, Malquías, Mijamín, Eleazar, Malquías, Benaía shuti runacunami carca.

²⁶Elam shuti runapaj mirai puramandaca: Matanías, Zacarías, Jehiel, Abdi, Jeremot, Elías shuti runacunami carca.

²⁷Zatu shuti runapaj mirai puramandaca: Elioenai, Eliasib, Matanías, Jeremot, Zabad, Aziza shuti runacunami carca.

²⁸Bebai shuti runapaj mirai puramandaca: Johanán, Hananías, Zabai, Atlai shuti runacunami carca.

²⁹Bani shuti runapaj mirai puramandaca: Mesulam, Maluc, Adaía, Jasub, Seal, Ramot shuti runacunami carca.

³⁰Pahat-moab shuti runapaj mirai puramandaca: Adna, Quelal, Benaía, Maasías, Matanías, Bezaleel, Binúi, Manasés shuti runacunami carca.

³¹Harim shuti runapaj mirai puramandaca: Eliezer, Isías, Malquías, Semaías, Simeón,

³²Benjamín, Maluc, Semarías shuti runacunami carca.

³³Hasum shuti runapaj mirai puramandaca: Matenai, Matata, Zabad, Elifelet, Jeremai, Manasés, Simei shuti runacunami carca.

³⁴Bani shuti runapaj mirai puramandaca: Madai, Amram, Uel,

³⁵Benaía, Bedías, Quelúhi,

³⁶Vanías, Meremot, Eliasib,

³⁷Matanías, Matenai, Jaasai,

³⁸Bani, Binúi, Simei,

³⁹Selemías, Natán, Adaía,

⁴⁰Macnadebai, Sasai, Sarai,

⁴¹Azareel, Selemías, Semarías,

⁴²Salum, Amarías, José shuti runacunami carca.

⁴³Nebo shuti runapaj mirai puramandaca: Jeiel, Matatías, Zabad, Zebina, Jadau, Joel, Benaía shuti runacunami carca.

⁴⁴Tucui cai runacunami, shuj llactamanda huarmicunahuan cazarashca carca. Cai runacunapaj huaquin huarmicunaca, ñami huahuacunata charishca carca.