Read Imbabura Highland Quichua ESDRAS 7 Bible Online

ESDRAS 7 - Imbabura Highland Quichua bible

ESDRAS 7

¹Chai punllacuna yalishca jipami, Persia llactata jatun mandaj Artajerjes shuti runa mandajui huatacunapica, Seraías shuti runapaj churi Esdras cura causajurca. Seraías shuti runaca, Azarías runapaj churimi carca. Azarías runaca, Hilcías shuti runapaj churimi carca.

²Hilcías shuti runaca, Salum shuti runapaj churimi carca. Salum shuti runaca, Sadoc shuti runapaj churimi carca. Sadoc shuti runaca, Ahitob shuti runapaj churimi carca.

³Ahitob shuti runaca, Amarías shuti runapaj churimi carca. Amarías shuti runaca, Azarías shuti runapaj churimi carca. Azarías runaca, Meraiot shuti runapaj churimi carca.

⁴Meraiot shuti runaca, Zeraías shuti runapaj churimi carca. Zeraías runaca, Uzi shuti runapaj churimi carca. Uzi shuti runaca, Buqui shuti runapaj churimi carca.

⁵Buqui shuti runaca, Abisúa shuti runapaj churimi carca. Abisúa shuti runaca, Finees shuti runapaj churimi carca. Finees shuti runaca, Eleazar runapaj churimi carca. Eleazar runaca, Aaronbaj churimi carca. Aaronga, punda callari curami carca.

⁶Chai Esdras shuti curami, Babilonia llactamanda vichai shamurca. Paimi, israelcunata Mandaj Taita Dios mandashcata, Moisés mandashcata na cungashpa ucha escribin carca. Paita Mandaj Taita Diospaj ushaica paihuan cajpimi, jatun mandaj Artajerjes shuti runaca, Esdras imatalla mañajpipash tucuita cun carca.

⁷Paihuanga, huaquin israelcunapash, curacunapash, levitacunapash, candajcunapash, pungupi cuidajcunapash, Diospaj huasipi servishpa causajcunapashmi, Jerusalenman tigramurca. Jatun mandaj Artajerjes shuti runa canchis huatata ña mandajujpimi tigramurca.

⁸Jatun mandaj Artajerjes runaca, canchis huata picha quillata ña mandajujpimi Esdrasca, Jerusalenman chayamurca.

⁹Paicunaca, callari quillapaj callari punllapimi, Babilonia llactamandaca llujshimui callarirca. Chai huatapajllata picha quilla callari punllapimi Esdrasca, Taita Diospaj ushaihuan pushamujpi, Jerusalenman chayamurca.

¹⁰Esdrasca, Mandaj Dios mandashcata aliguta yachajungapaj pactachingapaj, pactachinajuchun cushca shimicunata, imata rurachun mandashcata, Israel llactapi yachachingapajmi, tucui shunguhuan aliguta alichirishca carca.

¹¹Esdrasca, Mandaj Dios mandashcacunata, israelcunaman mandashcacunata, pactachinajuchun cushca shimicunata alipacha yachajushca, escribij curami carca. Escribishcata shujman yalichishpa, jatun mandaj Artajerjes shuti runa, Esdras curaman cushca cartaca, caimi:

¹²“Jatun mandajcunata jatun mandaj Artajerjes runami, jahua pachapi causajuj Taita Dios mandashcata alipacha yachajushca, escribij Esdras curataca, casilla ali causaiguta charipangui nipani.

¹³Caitaca, ñucapachami mandani: Ñuca mandajuj llactacunapi causanajuj tucui israelcuna cashpa, curacuna cashpa, levitacuna cashpapash, Jerusalenman canhuan tigranayachishpaca tigrachunlla.

¹⁴Cambaj Taita Dios mandashcatapash, canllatami charingui. Chaipi nijunshnallatami Judea llactapi, Jerusalenbi causajcunata ricugrichunga ñucapash, ñucaman yuyaita cuj canchis ayudajcunapash mandanchi.

¹⁵Ñucapash, ñucaman yuyaita cushpa ayudajcunapash, israelcunapaj Taita Diosman tucui munaihuan carashca culquita, orota apashpa ringuichilla. Chai Diosca, Jerusalenbimi causajun.

¹⁶Tucui Babilonia llactapi tiaj tucui culquita, orota mashna tarishcataca, israelcunapash, curacunapash, paicunapaj munai imatalla cushcacunandi apanguilla. Chaicunataca, Jerusalenbi paicunapaj Taita Diospaj huasipajmi, paicunapaj munai caranajunga.

¹⁷Chai culquihuanga shicucunata, jari llamacunata, maltun llamacunata, Diosman imatalla caranacunandi, talina vinondimi, aligutapacha ricushpa randina cangui. Chaicunataca, Jerusalenbi cangunapaj Taita Diospaj huasipi tiajuj altarpi Diosman cushpa rupachingui.

¹⁸Caishuj asha culquihuan, orohuanga, cangunapaj huauquicunahuan imata rurangapaj ali cajpipash, cangunapaj Taita Dios munashcashna ruranguichilla.

¹⁹Cambaj Taita Diospaj huasipi servichun, ima tiashcacunata canman tigrachishcataca, Jerusalenbi Taita Diospaj ñaupajpi cutin tigrachinguilla.

²⁰Cambaj Taita Diospaj huasipi tucui imalla minishtirishcata cunapacha cajpica, jatun mandaj ñucapaj huasimanda imalla ninan valishcacunata cunguilla.

²¹Jatun mandaj Artajerjes ñucapachami, jatun yacu chimba lado llactapi ñuca culquita tucui alichijcunataca, cashna mandani: Jahua pachapi causajuj Taita Dios mandashcata escribij cura Esdras, tucui imatalla mañashcataca ucha cunguichilla.

²²Sucta chunga pusaj quintalta pezaj culquita, chuscu patsaj chuscu chunga quintal trigota, quimsa huaranga canchis patsaj litro vinotapash, quimsa huaranga canchis patsaj litro aceitetapash cunguichi. Cachitacarin, mashnata mañajpipash cunguichilla.

²³Jahua pachapi causajuj Taita Dios tucui mandashcataca, jahua pachapi causajuj Taita Diospaj huasipaca, imatapash uchalla ruranguichilla. ¿Imashpata paica, jatun mandaj ñuca mandajuj llactatapash, ñuca churicunatapash ninanda fiñashpa llaquichingayari?

²⁴Caitapashmi, canguna yachachun villanchi: Curacunata, levitacunata, candajcunata, pungupi cuidajcunata, Diospaj huasipi servishpa causajcunata, chaipi imata ashtahuan rurajcunataca, tributota, impuestota, imamandalla cunatapash, pipash na japinachu.

²⁵Shinallata can Esdrasca, cambaj Taita Diosmanda yachaita charishcashnallata, jatun yacu chimba lado llactapi causajcunata, cambaj Taita Dios mandashcacunata tucui yachajcunata mandachunga, juezcunata, mandajcunata churangui. Chai mandashcacunata maijan na yachajpipash, canllata yachachingui.

²⁶Cambaj Taita Dios mandashcata, jatun mandaj ñuca mandashcata maijan cashpapash na cazujpica, ucha llaquichi tucushca cachun. Huañuchi tucushpa, na cashpaca paicuna causanajuj llactamanda llujchi tucushpa, na cashpaca culquita cushpa, na cashpaca prezu churai tucushpa llaquichi tucuchun” nishpa escribishpami curca.

²⁷Ñucanchi taitacunata Mandaj Taita Diosca, ninanda alicachi tucushca cachun. Paimi, pai Mandaj Diospaj huasita aliguta alichinajuchun, ñucanchita jatun mandaj ayudachun yuyaita cushca. Paica, Jerusalenbimi causajun.

²⁸Shina ali yuyaiguta cujpimi, jatun mandajpash, paiman yuyaita cuj ayudajcunapash, paita servij ushaita charij tucui mandajcunapash ninanda llaquihuarca. Ñucapash, ñuca Taita Dios shinllichijpimi, israelcunata mandajcunatapash Jerusalenman ñucahuan vichai tigramuchun tandachircani.