Read Imbabura Highland Quichua ESDRAS 8 Bible Online

ESDRAS 8 - Imbabura Highland Quichua bible

ESDRAS 8

¹Ñaupa taitacunapaj huasi ucu puracunata mandajcunapash, jatun mandaj Artajerjes shuti runa mandajui punllacunapi, Babilonia llactamanda ñucahuan vichai tigramushca taitacunapaj shuticunapash, caicunami:

²Finees shuti runapaj mirai puramandaca, Gersón shuti runami shamurca. Itamar shuti runapaj mirai puramandaca, Danielmi shamurca. Davidpaj mirai puramandaca, Hatús shuti runami shamurca.

³Secanías shuti runapaj, Paros shuti runapaj mirai puramandaca Zacariasmi, cuentai tucushca patsaj picha chunga runacunandi shamurca.

⁴Pahat-moab shuti runapaj mirai puramandaca, Zeraías shuti runapaj churi Elioenai shuti runami, ishcai patsaj runacunandi shamurca.

⁵Secanías shuti runapaj mirai puramandaca, Jehaziel shuti runapaj churimi, quimsa patsaj runacunandi shamurca.

⁶Adín shuti runapaj mirai puramandaca, Jonatanbaj churi Ebed shuti runami, picha chunga runacunandi shamurca.

⁷Elam shuti runapaj mirai puramandaca, Atalías shuti runapaj churi Jesaías shuti runami, canchis chunga runacunandi shamurca.

⁸Sefatías shuti runapaj mirai puracunamandaca, Micael shuti runapaj churi Zebadía shuti runami, pusaj chunga runacunandi shamurca.

⁹Joab shuti runapaj mirai puramandaca, Jehiel shuti runapaj churi Obadías shuti runami, ishcai patsaj chunga pusaj runacunandi shamurca.

¹⁰Silomit shuti runapaj mirai puramandaca, Josifías shuti runapaj churimi, patsaj sucta chunga runacunandi shamurca.

¹¹Bebai shuti runapaj mirai puramandaca, Bebai shuti runapaj churi Zacariasmi, ishcai chunga pusaj runacunandi shamurca.

¹²Azgad shuti runapaj mirai puramandaca, Hacatán shuti runapaj churi Johanán shuti runami, patsaj chunga runacunandi shamurca.

¹³Adonicam shuti runapaj mirai puramandaca, Elifelet, Jeil, Semaías shuti runacunami, canchis chunga runacunandi shamurca.

¹⁴Bigvai shuti runapaj mirai puramandaca, Utai shuti, Zabud shuti runacunami, sucta chunga runacunandi shamurca.

¹⁵Paicunata tandachishpami, Ahava shuti puebloman yalijuj, jatun yacu manñapi carpacunata shayachishpa, quimsa punllacaman tianajurcanchi. Israel puracunapi, cura puracunapi, levitacunapaj miraicunata mascashpapash, chaipica na tarircanichu.

¹⁶Chaimandami Eliezer, Ariel, Semaías, Elnatán, Jarib, Elnatán, Natán, Zacarias, Mesulam, shuti pushajcunatapash, Joiarib shuti, Elnatán shuti yachachijcunatapash tandachircani.

¹⁷Paicunataca, Casifia shuti pushtupi causajcunata mandaj Iddo shuti runapajmanmi cacharcani. Iddo shuti runaman, Diospaj huasipi servijcunaman, paipaj huauquicunaman villachunga yachachishpami, Casifia shuti pushtuman cacharcani. Diospajta rurajcunata, ñucanchi Taita Diospaj huasiman pushamuchunmi cacharcani.

¹⁸Chaimandami, ñucanchita ayudaj Taita Dios ayudajpi, shuj ali yachaj runata ñucanchipajman pushamurca. Taita Israelpaj churi Leví shuti runapaj nieto, Mahli shuti runapaj miraipura Serebías shuti levitatami pushamurca. Paipaj churicunandi, huauquicunandica, chunga pusaj runacunami shamurca.

¹⁹Shinallata Merari shuti runapaj mirai puramandaca, Hasabías shuti, Jesaías shuti runacunatami pushamurca. Paicunapaj churicunandi, huauquicunandica, ishcai chunga runacunatami pushamurca.

²⁰Diospaj huasipi servijcunatapashmi pushamurca. Paicunataca, levitacunata ayudashpa Diospajta ruranajuchunmi Davidpash, shuj mandajcunapash churashca carca. Diospaj huasipi servijcunataca, ishcai patsaj ishcai chunga runacunatami pushamurca. Paicunataca, tucuillatami shutipi cayashpa churarca.

²¹Chai jipaca, Ahava shuti jatun yacu manñapillatami, na micushpa ninandapacha llaquirishpa, ñucanchi Taita Diospaj ñaupajpi mañangapaj yarichircani. Chaipica ñucanchimandapash, ñucanchi huahuacunamandapash, ñucanchi ima charishcacunamandapash, ñucanchita ali ñambi pushachumbashmi mañangapaj yarircanchi.

²²Jatun mandajtaca, pundallatami ñucanchica cashna nircanchi: “Ñucanchi Taita Diosca, paita tucui shunguhuan catijcunataca imacunapipash cuidanmi. Ashtahuangarin paimanda anchurijcunataca, ninanda fiñashpami paipaj ushaihuan llaquichin” nircanchimi. Chaimandami, ñucanchita fiñajcunamanda ñambi cuidachun soldadocunata, caballopi tiarishca soldadocunata cachapai ningapaca, jatun mandajta pinganayarca.

²³Shinamandami ñucanchi Taita Diostaca, ali pushahuangui nishpa, na micushpa mañarcanchi. Chai mañashcata uyashpami, ñucanchitaca aliguta pushamurca.

²⁴Chai jipaca, curacunata mandaj, chunga ishcai curacunatami agllarcani. Chai agllashcacunaca Serebías shuti Hasabías shuti curacunami carca. Paicunahuanga, paicunapaj chunga huauquicunapashmi carca.

²⁵Paicunamanmi jatun mandajpash, paiman ali yuyaita cujcunapash, caishuj mandajcunapash, chai llactapi causaj tucui israelcunapash, ñucanchi Taita Diospaj huasipaj carashca culquita, orota, Diospaj huasipi imatalla charishcacunataca pezashpa curcani.

²⁶Chuscu patsaj chuscu chunga ishcai quintalta pezaj culquita, culquitallata rurashca sucta chunga pusaj quintalta pezaj imalla tiashcacunata, sucta chunga pusaj quintalta pezaj orotapashmi pezashpa, paicunapaj maquipi curcani.

²⁷Chai jahuapash, huaranga dracma nishca orocunatapash, ishcai chunga jatun tastacunatapash, alipacha punchapamba bronceta rurashca ishcai vasocunatapashmi curcani. Chaicunaca, oroshnallata valishcami carca.

²⁸Chaicunata cushpami, chai curacunataca cashna nircani: “Cangunaca, Mandaj Diospajlla shicanyachishcami canguichi. Diospaj huasipi imatalla charishcacunapash, culquipash, oropash, ñucanchi punda taitacunata Mandaj Taita Diosman tucui munaihuan carashcacunapash, Diospajlla shicanyachishcami.

²⁹Caicunataca, curacunata, levitacunata mandajcunapaj ñaupajpi, Jerusalenbi causaj israelcunapaj ñaupa taitacunata mandajcunapaj ñaupajpi pezangacaman, Taita Diospaj huasi ucucunapi aliguta alichishpa cuidanguichi” nircanimi.

³⁰Shina nijpimi curacuna, levitacunaca, ñuca pezashpa cushca culquita, orota, shuj imatalla charishcacunataca, Jerusalenbi ñucanchi Taita Diospaj huasiman apamungapaj japirca.

³¹Huata callari chunga ishcai punllapimi, Ahava shuti jatun yacu ladomanda Jerusalenman ringapaj llujshimui callarircanchi. Chai ñanda shamunajujpica, ñucanchi Taita Diosmi ñucanchita fiñajcunamandapash, ñambi chapashpa shuhuajcunamandapash cuidashpa pushamurca.

³²Jerusalenman ña chayamushpaca, quimsa punllatami chaipi samarcanchi.

³³Ña chuscu punlla jipami, ñucanchi apamushca culquita, orota, imatalla charishcacunataca, ñucanchi Taita Diospaj huasipi pezachircanchi. Chaicunataca, Urías shuti runapaj churi Meremot shuti curami pezarca, Paihuanga, Finees shuti curapaj churi Eleazar curapashmi chaipi carca. Levita puramanda Jesúa shuti runapaj churi Jozabad shuti runapash, Binúi shuti runapaj churi Noadías shuti runapashmi chaipi carca.

³⁴Chai punllacunallatami, chaicunataca tucuillata cuentashpa pezashpaca, mashna cajtapash apuntashpa, tucuillata paicunaman curcanchi.

³⁵Chai jipami, prezu apai tucushcamanda tigramushcacunapaj miraicunapash, israelcunapaj Taita Diosman animalcunata cushpa tucuillata rupachinajurca. Paicunaca, chunga ishcai shicucunata, iscun chunga sucta jari llamacunata, canchis chunga canchis maltun llamacunata, chunga ishcai jari chivocunatami, juchamanda Mandaj Diosman cushpa, tucui chaicunataca tucuillata rupachinajurca.

³⁶Chai jipami, jatun mandaj Artajerjes shuti runa escribishpa cachamushcataca, jatun yacu chimba lado llactata mandaj sátrapa nishca mandajcunamambash, soldadocunata mandajcunamambash cunajurca. Paicunami israelcunatapash, Taita Diospaj huasita alichinajuchumbash ayudanajurca.