Read Imbabura Highland Quichua NEHEMÍAS 1 Bible Online

NEHEMÍAS 1 - Imbabura Highland Quichua bible

NEHEMÍAS 1

¹Hacalías shuti runapaj churi Nehemías runagu rimashca shimicunami. Ñucaca, llactata mandana Susa shuti jatun pueblopimi carcani. Chaipi cajpimi, ishcai chunga huatapaj Quisleu nishca quillapica, cashna tucurca:

²Ñuca huauqui puramanda, Hanani shuti shuj huauquimi, Judá llactamanda huaquin runacunandi shamurca. Paicunatami, prezu apajpi pacajushpa quedashca Judá llacta runacunamandapash, Jerusalenmandapash tapurcani.

³Shina tapujpimi, cashna ninajurca: “Prezu apajpi pacajushpa, chai llactapillata huaquin puchushcacunaca, jatun llaquita apashpami, rimashpa pingaichijpi causanajun. Jerusalén muyundi pircacunatapash urmachishpami, chai pueblopaj pungucunatapash rupachishca” ninajurcami.

⁴Chaicunata uyashpami, ñucaca tiarishpa huacarcani. Tauca punllacunata ninan llaqui cashpami, jahua pachapi causajuj Taita Diospaj ñaupajpi na micushpa mañajurcani.

⁵Cashna nishpami mañajurcani: “Jahua pachapi causajuj Mandaj Taita Dioslla. Candaca ninandami mañapani. Canga, ninan ushaita charij, jatun manllana Diosmi capangui. Canda juyashpa, can mandashcacunata cazujcunahuanga, can ari nishcatapash pactachij, paicunata llaquij Diosmi capangui.

⁶Cunanga, canda servij ñuca mañashcataca, cambaj rinrihuan aliguta uyapangui. Cambaj ñavihuambash, aliguta ricupangui. Cunanga, canda servij israelcunamandami, tutandi, punllandi cambaj ñaupajpi mañajupani. Ñucanchi israelcuna juchata rurashpa canda fiñachishcatami villajupani. Ari ñucapash, ñuca ñaupa taitacunapaj huasi ucu puracunapashmi, juchata rurapashcanchi.

⁷Yapatapacha huaglishpami, candaca fiñachishcanchi. Can mandashca shimicunatapash, pactachinajuchun cushca shimicunata, imata rurachun nishcacunata na cazushpami, candaca fiñachipashcanchi. Chaicunataca, canda servij Moisesmanmi cushcangui.

⁸Cunanga, canda servij Moisesman imata nishcataca yaripairi. Canga cashnami nipashcangui: ‘Canguna juchata rurajpica, tucui llactacunamanmi caita chaita cachasha.

⁹Shina cajpipash canguna ñucapajman tigrarishpa, ñuca mandashcacunata cazushpa pactachinajujpica, tucui cai pacha tucuri manñacunaman, caita chaita cachashca cashpapash, cutinmi tandachimusha. Ñuca shuti chaipi causajuchun, ñuca agllashca pushtumanmi cangunataca pushamusha’ nipashcanguimi.

¹⁰Paicunaca canda servijcuna, can agllashcacunami capan. Paicunataca, cambaj ninan ushaihuan, ninan ushaita charij, cambaj maquihuanmi llujchimurcangui.

¹¹Cunanga, Mandaj Dioslla. Candaca ninandami mañapani. Canda servij ñuca mañajujtapash, cambaj shutita alicachingapaj munaj canda servijcuna mañajujtapash, cambaj rinrihuan aliguta uyapairi. Cunanga, canda servij ñucataca, tucuipi ali llujshichun, cai runapaj ñaupajpipash ali ricuringapaj ayudahuayari” nishpami mañajurcani. Ñucaca, jatun mandajman copapi vinota yalichishpami servijurcani.