Read Imbabura Highland Quichua NEHEMÍAS 12 Bible Online

NEHEMÍAS 12 - Imbabura Highland Quichua bible

NEHEMÍAS 12

¹Salatiel shuti runapaj churi Zorobabel runahuan, Jesúa shuti curahuan vichai tigramuj curacunapaj, levitacunapaj shuticunaca, caicunami: Seraías, Jeremías, Esdras,

²Amarías, Maluc, Hatús,

³Secanías, Rehum, Meremot,

⁴Iddo, Gineto, Abías,

⁵Mijamín, Maadías, Bilga,

⁶Semaías, Joiarib, Jedaías,

⁷Salú, Amoc, Hilcías, Jedaías shuti curacunami, paicunapaj huauquicunandi Jesúa causajui punllacunapi tigramurca.

⁸Levita puramandaca: Jesúa, Binúi, Cadmiel, Serebías, Judá, Matanías shuti runacunami tigramurca. Matanías runaca, paipaj huauquicunandimi, Diosta alicachishpa candanacunata candachinajurca.

⁹Bacbuquías shuti, Uni shuti levitacunapashmi, paicunapaj huauquicunandi, tucuicunallata Diospajta ruranajurca.

¹⁰Jesúa shuti runaca, Joiacim shuti churitami charirca. Joiacim runaca, Eliasib shuti churitami charirca. Eliasib runaca, Joiada shuti churitami charirca.

¹¹Joiada shuti runaca, Jonatán shuti churitami charirca. Jonatanga, Jadúa shuti churitami charirca.

¹²Joiacim shuti cura causajui punllacunapica, caicunami curacunapaj familiata mandajcuna carca: Seraías shuti runapaj familiataca, Meraías shuti runami mandajurca. Jeremiaspaj familiataca, Hananías runami mandajurca.

¹³Esdraspaj familiataca, Mesulam shuti runami mandajurca. Amarías shuti runapaj familiataca, Johanán shuti runami mandajurca.

¹⁴Melicú shuti runapaj familiataca, Jonatanmi mandajurca. Sebanías shuti runapaj familiataca, Josemi mandajurca.

¹⁵Harim shuti runapaj familiataca, Adna shuti runami mandajurca. Meraiot shuti runapaj familiataca, Helcai shuti runami mandajurca.

¹⁶Iddo shuti runapaj familiataca, Zacariasmi mandajurca. Ginetón shuti runapaj familiataca, Mesulam runami mandajurca.

¹⁷Abías shuti runapaj familiataca, Zicri shuti runami mandajurca. Miniamín shuti runapaj familiataca, Moadías shuti runahuan, Piltai shuti runahuanmi mandanajurca.

¹⁸Bilga shuti runapaj familiataca, Samúa shuti runami mandajurca. Semaías shuti runapaj familiataca, Jonatanmi mandajurca.

¹⁹Joiarib shuti runapaj familiataca, Matenai shuti runami mandajurca. Jedaías shuti runapaj familiataca, Uzi shuti curami mandajurca.

²⁰Salai shuti runapaj familiataca, Calai shuti runami mandajurca. Amoc shuti runapaj familiataca, Eber shuti runami mandajurca.

²¹Hilcías shuti runapaj familiataca, Hasabías shuti runami mandajurca. Jedaías shuti runapaj familiataca, Natanaelmi mandajurca.

²²Eliasib, Joiada, Johanán, Jadúa shuti runacuna causanajui punllacunamanda, Persia llactata jatun mandaj Darío mandajui punllacunacamanmi, levitacunapaj, curacunapaj familiacunata mandajcunapaj shuticunataca, shuj libropi escribinajurca.

²³Shinallata Eliasib shuti runapaj nieto Johanán shuti runa causajui punllacunacamanmi, Leví shuti runapaj mirai familiacunata mandajcunapaj shuticunataca, shuj libropi escribinajurca.

²⁴Levitacunata mandajcunaca: Hasabías shuti runapash, Serebías runapash, Cadmiel shuti runapaj churi Jesúa shuti runapashmi carca. Paicunapaj huauquicunaca, Taita Diosta servij David escribichishcapi nijunshnallata, Diosta pashi nishpa alicachingapajmi, paicunapaj ñaupajman yaicuna horas chayajpi rishpa candanajurca.

²⁵Matanías, Bacbuquías, Obadías, Mesulam, Talmón, Acub shuti levitacunaca cuidajcunami carca. Paicunaca, yaicuna pungucunapimi cuidanajurca.

²⁶Paicunaca, Jesúa shuti runapaj churi Joiacim shuti runa causajui punllacunapi, Judá llactata mandaj Nehemías causajui punllacunapi, escribij Esdras cura causajui punllacunapimi cuidan carca. Joacim shuti runaca, Josadac shuti runapaj nietomi carca.

²⁷Jerusalén muyundi jatun pircata tucuchishpa Diosman mingangapajmi, tucuilla levitacunataca maipi causanajujpipash, mascashpa Jerusalenman pushamugrirca. Paicunataca, platillocunahuan, salterio nishcacunahuan, cítara nishcacunahuan, Diosta alicachishpa candashpa, Taita Diosman minganajuchunmi pushamugrirca.

²⁸Shina pushagrijpimi, Jerusalén muyundi llactacunapi causanajuj, Netofa shuti pueblo muyundi uchilla llactacunapi causanajuj candajcunapaj churicunapash tandanajurca.

²⁹Gilgal shuti pueblopi causanajuj huasi ucu purapash, Geba shuti, Azmavet shuti pambacunapi causajcunapashmi shamunajurca. Chai candajcunaca, Jerusalén pueblo muyundipi uchilla llactacunata rurashpami causanajushca carca.

³⁰Paicuna shamujpimi curacunapash, levitacunapash mapa illaj tucunajurca. Gentecunatapash, Jerusalén pungucunatapash, jatun pircatapashmi, mapa illajta ruranajurca.

³¹Chai jipami ñucaca, Judá llactata mandajcunataca, jatun pirca jahuaman richun mandarcani. Tandanajushca ashtaca candajcunatapash ishcaipi shicanyachishpami, ñaupashpa rinajuchun churarcani. Shuj shicanyachi tucushca candajcunataca, Mapata llujchishpa shitana pungu ladoman ali lado pirca jahuata richunmi churarcani.

³²Chai candajcunapaj huashata catishpami Osaías runaca, Judá llactata mandajcunata ishcaipi shicanyachishca caishuj mandajcunahuan rinajurca.

³³Azarías, Esdras, Mesulam,

³⁴Judá, Benjamín, Semaías, Jeremías shuti mandajcunapashmi rinajurca.

³⁵Curacunapaj churicunami, trompetata huacachishpa rinajurca. Zacariasca, Jonatanbaj churimi carca. Jonatanga, Semaías runapaj churimi carca. Semaías runaca, Matanías runapaj churimi carca. Matanías runaca, Micaías runapaj churimi carca. Micaías runaca, Zacur shuti runapaj churimi carca. Zacur shuti runaca, Asaf runapaj churimi carca.

³⁶Paicunapaj huauqui puramandaca, Semaías, Azarael, Milalai, Gilalaia, Maai, Natanael, Judá, Hanani shuti runapashmi carca. Paicunami, Taita Diospajta ruraj Davidpaj tocanacunata tocanajurca. Chai tocajcunata ñaupashpaca, escribij Esdrasmi rijurca.

³⁷Pugyuman llujshina punguca, paicunapaj chimba purapi cajpimi, Davidpaj puebloman vichai rina gradasta, pirca jahuaman vichai rina ñanda rinajurca. Davidpaj huasimandaca, Yacuman llujshina pungucamanmi vichai rinajurca. Chai punguca, indi llujshimuj ladomanmi.

³⁸Caishuj chaupi candajcunaca, lluqui ladomanmi rinajurca. Ñucaca, chaupi caishuj gentecunahuanmi, Jorno shuti torrecunamanda ashtahuan ancho pircacaman paicunata catishpa, pirca jahuata rijurcani.

³⁹Efraín nishca jatun pungumandaca, Mauca jatun pungutapash, Pijicunahuan yaicuna pungutapash, Hananeel nishca torretapash, Hamea nishca torretapash, Llamacunahuan yaicuna pungutapash yalishpami, Prezuna huasi pungupi quedarcani.

⁴⁰Chai jipami, ishcaipi shicanyarishpa tandanajushca candajcunaca, Taita Diospaj huasiman chayarca. Ñucapash, ñucahuan purinajuj mandajcunandimi chayarcani.

⁴¹Trompetata huacachinajuj curacunaca, caicunami carca: Eliacim, Maaseías, Miniamín, Micaías, Elioenai, Zacarías, Hananías,

⁴²Maasías, Semaías, Eleazar, Uzi, Johanán, Malquías, Elam, Ezer shuticunami carca. Candajcunaca, shinllitapachami candanajurca. Paicunata mandashpa candachijca, Izrahías shuti runami carca.

⁴³Chai punllapica, ashtaca animalcunatami Diosman cushpa huañuchinajurca. Taita Diosllata samachishpa jatun cushijuita cujpimi, ninanda cushijunajurca. Chaipica huarmicunapash, huahuacunapashmi cushijunajurca. Jerusalenbi chashna ninan cushijunajuica, caru llactacamanmi uyarirca.

⁴⁴Chai punllapica, imapash ninan valishcacunata, Diosman imatalla carangapaj apamushcacunata, punda fucushcacunata, chungamanda shujguta cushcacunata alichina ucucunapimi, cuidaj runacunata churarca. Paicunataca, pueblo muyundi pambacunapi fucushcacunata, shinallata mandashcapi nijunshnallata curacunaman, levitacunaman caranacunata apamushcacunata, chai ucucunapi tandachinajuchunmi churarca. Diosta servij curacunamanda, levitacunamandaca, Judá llactapi causajcunapaca, jatun cushijuimi tiarca.

⁴⁵Curacuna, levitacunaca, paicunapaj Diostapash servishpa, juchamanda cunatapash cushpami pactachinajurca. Candajcunapash, pungucunapi cuidajcunapashmi pactachinajurca. Paicunaca Davidpash, paipaj churi Salomombash escribishpa mandashcashnallatami pactachinajurca.

⁴⁶Jatun mandaj David shuti, Asaf shuti runacuna causanajui punda huatamandapachami, Taita Diosta pashi nishpa alicachishpa candanacunata candachijcunaman yachachij tiarca.

⁴⁷Zorobabel shuti runapash, Nehemías runapash causajui punllacunapimi, tucuilla israelcunaca, candajcunamambash, pungucunapi cuidajcunamambash micunacunata cunajurca. Imata cuna cashpapash, punllandimi cunajurca. Shinallata levitacunaman cungapajpashmi, shuj ashata shicanyachinajurca. Chai cushcacunamandaca levitacunapashmi, Aaronbaj miraicunaman shuj ashata shicanyachinajurca.