Read Imbabura Highland Quichua NEHEMÍAS 2 Bible Online

NEHEMÍAS 2 - Imbabura Highland Quichua bible

NEHEMÍAS 2

¹Jatun mandaj Artajerjes shuti runaca, ishcai chunga huatata mandajujpimi, Nisán shuti quillapi cashna tucurca: Vinotaca, paipaj ñaupajpillata cajpimi japishpa, jatun mandaj ufiachun yalichircani. Ñucaca, ima horapash paipaj ñaupajpica, na llaquilla cashcanichu. Chai horas llaquilla cajta ricushpami,

²jatun mandajca cashna nihuarca: —¿Imashpata canga, llaquilla ñavi cangui? Canga, na ungushcachu cangui. Ashtahuangarin cambaj shungupimi, llaquita charingui yarin— nijpimi, ninanda manllarircani.

³Shinamandami jatun mandajtaca, cashna nircani: —Jatun mandajlla, canga causaita causajupailla. ¿Imashpata na llaquilla ñavi cashayari? Ñaupa ñuca taitacunata pambashca pueblomari jichushca pambashna quedashca. Chai pueblopaj jatun pungucunatapash, ninahuanmi tucuchishca— nircanimi.

⁴Shina nijpimi, jatun mandajca: —¿Imatata rurachun ningui?— nihuarca. Shina nijpimi ñucaca, jahua pachapi causajuj Taita Diosta mañarcani.

⁵Chai jipami jatun mandajtaca, cashna nircani: —Can jatun mandajpaj yuyaipi ali cajpi, canda servij ñucapash cambaj ñaupajpi ali ricurishca cajpica, Judá llactapi punda ñuca taitacunata pambashca tiajuj pueblota cutin alichigringapaj cachahuai— nircanimi.

⁶(Jatun mandaj huarmipash, paipaj ladopimi tiajurca). Chaipimi jatun mandajca, cashna nihuarca: —¿Mashna punllacunatashi chaipi cangui? ¿Ima horashi tigramungui?— nircami. Ima hora ñuca tigramunata villajpimi, jatun mandajpaca ñucata cachana ali ricurijpi cachahuarca.

⁷Jatun mandajtaca, caitapash nircanirami: —Jatun mandajpaj yuyaipi ali cajpica, cashna rurapai: Judá llactaman ñuca rijujpi ama jarcachunga. Jatun yacu chimba lado llactacunapi mandajcunaman cungapaj, cartacunata escribishpa cuhuayari.

⁸Shinallata Diospaj huasi ladopi tiaj huasicunapi pungucunata, jatun pircacunapi pungucunata, ñuca causana huasita caspicunahuan rurangapajpash caspicunata cuhuachun, can jatun mandajpaj bosqueta cuidaj Asaf shuti runaman shuj cartata cuhuayari— nircanimi. Mandaj Diospaj juyaj maquihuan ñucata ayudajpimi, jatun mandajca ñuca imatalla mañashcatapash ari nihuarca.

⁹Chai jipami ñucaca, jatun yacu chimba ladota mandajcunapajman shamushpa, jatun mandaj escribishpa cachashca cartacunata curcani. Jatun mandajca ñucahuanga, soldadocunata mandajcunatapash, caballopi tiarishca soldadocunatapashmi cachamurca.

¹⁰Israelcunaman alita rurangapaj maijan cashpapash shamushcata yachashpami, Horón shuti pueblomanda Sanbalat shuti runapash, jatun mandajta servij amonitapura Tobías runapash, ninandapacha fiñarirca.

¹¹Jerusalenman chayamushpa, quimsa punllata ña chaipi cashca jipami,

¹²ñucaca tuta jatarishpa, huaquin runacunandi rircani. Shina rishpapash, Jerusalenbi ñuca imata rurachun Taita Dios yarichishcataca, maijan runamambash na villarcanichu. Chaipica, caballopi tiarishpa ñucahuan rijcunaca illarcami. Ñucallami, caballopi tiarishca carcani.

¹³Chai tutaca, Pugru pambaman llujshina punguta llujshishpami, Dragón shuti pugyu ladomambash, Mapata llujchishpa shitana pungu ladomambash rircani. Chaimandaca, Jerusalén pircacunatapash urmachishcata, pungucunatapash ninahuan tucuchishcatami ricurcani.

¹⁴Chai jipaca, Pugyuman llujshina pungumanmi yalircani. Shinallata Jatun Mandajpaj yacu tanque ladomambashmi yalircani. Ashtahuangarin ñuca tiarishca rijuj caballohuanga, maita yalinapash na tiarcachu.

¹⁵Jatun yacu ladota tuta vichai rishpami, muyundi jatun pircata ali ricurcani. Chaimanda muyushpa rishpami, Pugru pambaman llujshina pungutallata tigrashpa yaicurcani.

¹⁶Ashtahuangarin cati mandajcunaca, ñuca maiman rishcatapash, imata rurajujtapash na yacharcachu. Shinallata Judá llacta runacunaman, curacunaman, alicachi tucushcacunaman, cati mandajcunaman, chaipi imatalla rurajcunamambash, ñucaca nara villarcanichu.

¹⁷Shinamandami cashna nircani: —Jerusalenga jichushca pambashna tucushcamanda, pungucunatapash ninahuan tucuchishcamanda, ñucanchi jatun llaquipi cajtaca, cangunallata alimi ricunguichi. Shina cashcamandaca, shujcuna ama ashtahuan nalicachishpa rimanajuchunga shamuichi, Jerusalén muyundi pircacunata alichishunchi— nircanimi.

¹⁸Chai jipami ñuca Taita Diosca, paipaj maquihuan ñucata imashna aliguta ayudashcatapash, jatun mandaj ñucahuan parlashca shimicunatapash villarcani. Shina villajpimi paicunaca: —Alichi callaringapaj, jatarishunchi— ninajurca. Shinami, paicunapaj maquipash ashtahuan shinlli tucushpa, alita ruranajurca.

¹⁹Ashtahuangarin Horón shuti pueblomanda Sanbalat shuti runapash, jatun mandajta servij amonitapura Tobías shuti runapash, arabepura Gesem shuti runapash chaita uyashpami, ñucanchita asishpa ricunajurca. Ñucanchitaca yangapi churashpami, cashna ninajurca: —¿Imatata cangunaca cashna ruranajunguichi? ¿Jatun mandajta fiñashpachu na cazunajunguichi?— ninajurcami.

²⁰Shina nijpimi, cashna nishpa tigrachircani: —Ñucanchitaca, jahua pachapi causaj Taita Diosmi tucuipi ayudanga. Shina ayudajpimi, paita servij ñucanchica jatarishpa, cutin alichishun. Ashtahuangarin cangunaca, Jerusalenbica imata ruranatapash, imata japinatapash, imata yarinatapash, na charishpami causanguichi— nircanimi.