Read Imbabura Highland Quichua NEHEMÍAS 3 Bible Online

NEHEMÍAS 3 - Imbabura Highland Quichua bible

NEHEMÍAS 3

¹Shinamandami, curacunata mandaj Eliasib shuti curapash, paipaj huauqui curacunandi jatarishpa, Llamacunahuan yaicuna punguta alichinajurca. Chai pungucunataca paicunami, Hamea shuti torrecaman alichinajurca. Hananeel shuti torrecamanmi, pircatapash alichinajurca.

²Paicunapaj ladopica, Jericó shuti pueblomanda runacunami alichinajurca. Chai catipica, Imri shuti runapaj churi Zacur shuti runami alichijurca.

³Senaa shuti runapaj miraicunaca, Pijihuan yaicuna pungutami alichinajurca. Paicunami caspicunata churashpa, jarcana caspicunata, aldabacunata churashpa, pungucunata shayachinajurca.

⁴Paicunapaj ladopica, Urías runapaj churi Meremot shuti runami alichijurca. Meremot shuti runaca, Cos shuti runapaj nietomi carca. Paicunapaj ladopica, Berequías runapaj churi Mesulam shuti runami alichijurca. Mesulam shuti runaca, Mesezabeel shuti runapaj nietomi carca. Paicunapaj ladopica, Baana shuti runapaj churi Sadoc shuti runami alichijurca.

⁵Paicunapaj ladopica, Tecoa shuti pueblopi causajcunami alichinajurca. Ashtahuangarin paicunata mandajcunaca, paicunapaj Jatun Diospajta ruranapica na ayudanajurcachu.

⁶Mauca pungutaca, Paseah shuti runapaj churi Joiada shuti runahuan, Besodías shuti runapaj churi Mesulam runahuanmi alichinajurca. Paicunami chai pungucunataca, caspicunata churashpa, jarcana caspicunata, aldabacunata churashpa shayachinajurca.

⁷Paicunapaj ladopica, gabaonitapura Melatías shuti runahuan, meronotitapura Jadón shuti runahuan, Gabaón shuti, Mizpa shuti pueblocunapi causanajuj runacunahuanmi, chai pircataca alichinajurca. Paicunaca, jatun yacu chimba lado llactata mandajuj runa mandajpimi causanajurca.

⁸Paicunapaj ladopica, culquita imacunatapash ruranata yachajpura Harhaía shuti runapaj churi Uziel shuti runahuan, mishquillagu ashnajuj jambicunata ruraj runapaj churi Hananías shuti runahuanmi alichinajurca. Shinami paicunaca, Jerusalén muyundi pircacunataca, ancho pircacaman alichijurca.

⁹Paicunapaj ladopica, Hur shuti runapaj churi Refaías shuti runami alichijurca. Paimi, shuj chaupi Jerusalendaca mandajurca.

¹⁰Shinallata paicunapaj ladopica, Harumaf shuti runapaj churi Jedaías shuti runami, paipaj huasi chimba puracaman alichijurca. Paipaj ladopica, Hasabnías shuti runapaj churi Hatus shuti runapashmi alichijurca.

¹¹Harim shuti runapaj churi Malquías shuti runahuan, Pahat-moab shuti runapaj churi Hasub shuti runahuanga asha pircatapash, Jornocunapaj torretapashmi alichinajurca.

¹²Paicunapaj ladopica, Halohes shuti runapaj churi Salum shuti runami, paipaj ushicunahuan alichijurca. Salum shuti runaca, Jerusalén chaishuj chaupitami mandajurca.

¹³Pugru pambaman llujshina pungutaca, Hanún shuti runami, Zanoa shuti pueblopi causajcunahuan alichijurca. Paicunami, jarcana caspicunata, aldabacunata churashpa, pungucunata shayachinajurca. Pircatapash, Mapata llujchishpa shitana pungucamanmi alichijurca. Chai punguman chayajtaca, chuscu patsaj picha chunga metromi carca.

¹⁴Mapata shitana pungutaca, Recab shuti runapaj churi Malquías shuti runami alichijurca. Malquías runaca, Bet-haquerem shuti llactatami mandajurca. Paica, jarcana caspicunata, aldabacunata churashpa alichishpami pungutaca shayachirca.

¹⁵Colhoze shuti runapaj churi Salum shuti runaca, Mizpa shuti llactatami mandajurca. Paica, pugyuman llujshina pungutami alichijurca. Paica, caspicunata churashpa, jarcana caspicunata, aldabacunata churashpa alichishpami, pungucunataca shayachirca. Pircatapash, jatun mandajpaj huerta ladopi tiaj Siloé shuti tanque ladomandaca, Davidpaj puebloman uriajuna gradascamanmi alichijurca.

¹⁶Paipaj catipica, Azbuc shuti runapaj churi Nehemiasmi alichijurca. Paica, Bet-sur shuti chaupi llactatami mandajurca. Paimi Davidtapash, paipaj familiacunatapash pambashca utuju chimba puracaman, yacuta tandachina tanque ladocaman, ninan Shinlli runacuna causashca huasi ladocaman alichijurca.

¹⁷Paipaj catipica, levitacunami alichinajurca. Paicuna puramandaca, Bani shuti runapaj churi Rehum shuti runami alichijurca. Paipaj ladopica, Keila shuti shuj chaupi llactata mandaj Hasabías shuti runami, pai mandajushca llactapaj shutipi alichijurca.

¹⁸Paipaj catipica, paicunapaj huauquicunami alichinajurca. Henadad shuti runapaj churi, Keila shuti caishuj chaupi llactata mandaj Bavai shuti runami alichijurca.

¹⁹Paipaj ladopica, Jesúa shuti runapaj churi Ezer shuti runami, macanajunacunata alichina huasiman vichai rina chimbapura ñan tigranacaman, shuj asha pircata alichijurca. Ezer shuti runaca, Mizpa shuti pueblopi causajcunatami mandajurca.

²⁰Paipaj catipica, Zabai shuti runapaj churi Baruc shuti runami, ñan tigranamanda callarishpa, curacunata mandaj Eliasib shuti curapaj huasi pungucaman, shuj asha pircata alichijurca. Paica, tucui shunguhuan alichijurca.

²¹Paipaj catipica, Urías shuti runapaj churi Meremot shuti runami, shuj asha pircata alichijurca. Meremot shuti runaca, Cos shuti runapaj nietomi carca. Paica, Eliasib shuti runapaj huasi pungumandaca, huasi tucuricamanmi alichijurca.

²²Paipaj catipica, pugru pambapi causanajuj curacunami alichinajurca.

²³Paicunapaj catipica, Benjamín shuti, Hasub shuti curacunami, paicunapaj huasi chimba purapillata alichinajurca. Paicunapaj catipica, Maasías shuti runapaj churi Azarías runami, paipaj huasi ladolla pircataca alichijurca. Azariasca, Ananías runapaj nietomi carca.

²⁴Paipaj catipica, Henadad shuti runapaj churi Binúi shuti runami, shuj asha pircata alichijurca. Paica, Azarías runapaj huasimanda callarishpaca, jatun pirca huashajurishca ñan tigranacaman, caishuj ñan tigranacamanmi alichijurca.

²⁵Uzai shuti runapaj churi Palal shuti runaca, chai ñan tigrana chimba purapi tiaj pircatapash, jatun mandajpaj huasi ladopi tiaj jatun torretapashmi alichijurca. Chai torreca, prezuna huasi ñaupajpimi carca. Paipaj catipica, Faros shuti runapaj churi Pedaías shuti runami alichijurca.

²⁶Ofel shuti uchilla pueblopi causajcunaca, Diospaj huasipi servishpa causajcunami carca. Paicunami caishuj pircataca, indi llujshimuj chimba ladoman tiaj Yacuman llujshina pungucaman alichinajurca. Shinallata vichai llujshishca jatun torretapashmi alichinajurca.

²⁷Paicunapaj catipica, Tecoa shuti pueblopi causajcunami, vichai llujshishca jatun torremanda callarishpa, Ofel shuti uchilla pueblopi causajcuna alichishca ladocaman, shuj asha pircata alichinajurca.

²⁸Caballocunahuan yaicuna pungumanda callarishpami curacunaca, paicunapaj huasi chimba lado pircataca tucuicuna alichinajurca.

²⁹Paicunapaj catipica, Imer shuti runapaj churi Sadoc shuti runami, paipaj huasi chimbapura pircata alichijurca. Paipaj catipica, Indi llujshimuj lado pungupi cuidaj, Secanías shuti runapaj churi Semaís runami alichijurca.

³⁰Paipaj catipica, Selemías shuti runapaj churi Hananías runapaj, Salaf shuti runapaj churi Hanún shuti runapashmi, shuj asha pircata alichijurca. Hanún shuti runaca, Salaf shuti runapaj picha churicunapaj cati churimi carca. Paicunapaj catipica, Berequías shuti runapaj churi Mesulam shuti runami, pai causajuj ucu chimba lado pircataca alichijurca.

³¹Paipaj catipica, culquita imacunatapash ruranata yachaj runapaj churi Malquías runami alichijurca. Paica, Diospaj huasipi servishpa causajcunapaj huasi pungucaman, shinallata randishpa jatushpa causajcunapaj huasicamanmi alichijurca. Chai huasicunaca, fiñanajushcata Alichingapaj tandanajuna huasi pungu chimba purapimi. Ñan tigranapi tiaj huasicamanmi alichijurca.

³²Culquita imacunatapash ruranata yachajcuna, randishpa jatushpa causajcunaca, chai ñan tigranapi tiaj huasimanda callarishpaca, Llamacunahuan yaicuna pungu ladocamanmi alichinajurca.