Read Imbabura Highland Quichua NEHEMÍAS 5 Bible Online

NEHEMÍAS 5 - Imbabura Highland Quichua bible

NEHEMÍAS 5

¹Chai punllacunapica, gentecunaca paicunapaj huarmicunandimi, Judá llactapi causanajuj paicunapaj huauquicunatallata fiñashpa, ninanda caparishpa rimanajurca.

²Huaquingunaca, cashnami ninajurca: “Ñucanchica, ñucanchi churicunandi, ñucanchi ushicunandi, ashtacacunami canchi. Shinamandami, yarjaimanda ama huañungapaca, granocunata ñucanchiman mañachinajuchun mañarcanchi” ninajurcami.

³Huaquingunaca, cashnami ninajurca: “Ñucanchica, yarjaimanda micunata randingapajmi, ñucanchi alpacunata, ñucanchi uvas chagracunata, ñucanchi huasicunata prendashpa saquircanchi” ninajurcami.

⁴Cutin huaquingunaca, cashnami ninajurca: “Ñucanchica, jatun mandajman impuestota cungapajmi, ñucanchi alpacunata, ñucanchi uvas chagracunata cungapaj, ñaupashpa culquita mañarcanchi.

⁵Ashtahuangarin ñucanchica, ñucanchi huauqui purallatami canchi. Ñucanchi huahuacunapash, paicunapaj huahuacunashnallatami. Shina cajpipash ñucanchi churicunata, ñucanchi ushicunataca paicunapaj gañanguna tucuchunmi jatuna tucurcanchi. Shinallata ñucanchi ushicunamandapash, huaquingunaca ñami paicunapaj gañanguna tucushca. Alpacunapash, uvas chagracunapash, ña shujcunapan cashcamandami, ñucanchi ushicunataca cutin randishpa llujchimuitaca na ushanchi” ninajurcami.

⁶Paicuna chashna nishpa caparinajujta uyashpami, ninandapacha fiñarircani.

⁷Shinamandami aligutapacha yarishca jipaca, alicachi tucushcacunatapash, mandajcunatapash, cashna nishpa shinllitapacha rimarcani: “¿Imamandata cangunapaj huauquicunaman imata mañachishcamandapash mirachishpa cuchun tucuicuna mañanajunguichi?” nircanimi. Shina nishca jipami, tucui israelcunata fiñashpa tandachishpa,

⁸cashna nircani: “Ñucanchica, ñucanchi usharishcaguta rurashpami, Judá llactapi causaj cangunapaj huauquicunata, shuj llactapi causajcunaman jatushcamanda, randishpa llujchimurcanchi. Ashtahuangarin cangunaca, cangunapaj huauquicunataca, ¿cutinllu ñucanchi randichun jatunajunguichira?” nircanimi. Shina nijpimi paicunaca, imatapash na nishpa upalla uyanajurca.

⁹Cashnatapashmi nircanimi: “Cangunaca, nalitami ruranajunguichi. Ashtahuangarin ñucanchi Taita Diostami manllana canguichi. Shuj llactacunapi causaj ñucanchita fiñajcuna ama nalicachishpa rimanajuchunga, ¿nachu Taita Diosta manllana canguichi?

¹⁰Ñucapash, ñuca huauquicunapash, ñucata servijcunapashmi culquita, trigota, shujcunaman mañachircanchi. Cunanga, paicunata chashna llaquichinataca saquishunchi.

¹¹Shinallata cunanga, paicunapaj alpacunata, uvas chagracunata, olivos tarpushca pambacunata, huasicunataca tigrachipaichi ninimi. Granomanda cashpa, vinomanda cashpa, aceitemanda cashpa, patsajmanda shujguta mirashca culquita canguna japinajushca cashpapash, tigrachinami canguichi” nircanimi.

¹²Shina nijpimi paicunaca, cashna ninajurca: “Can nishcashna rurashpa, tucuita tigrachishunllami. Imatapash na nishunllu” ninajurcami. Shina nijpimi ñucaca, curacunata cayashpa paicunapaj ñaupajpi chashnatapacha rurachun nishpa juramentuchircani.

¹³Shinallata ñuca churajushcata chafsirishpami, cashna nircani: “Caita na pactachij tucui ruranacunataca paipaj huasimandapash, pai imatalla rurashcamandapash, Taita Diosca chashna chafsinshna cachachun. Chashna chafsinshna imapash illajta saquichun” nijpimi, tucui tandanajushca gentecunaca: “¡Shina cachun!” nishpa, Mandaj Diosta alicachinajurca. Chashna nishcashnallatami, gentecunaca pactachinajurca.

¹⁴Judá llactata mandaj cachun ñucata churashca punllamandapacha, jatun mandaj Artajerjes shuti runa ishcai chunga huatata mandajuimandapacha, quimsa chunga ishcai huatata mandajungacamanmi, chunga ishcai huatata mandajurcani. Chai huatacunapica ñucapash, ñuca llacta huauquicunapash mandajcuna mañanataca, ima horapash na mañashpami causarcanchi.

¹⁵Ashtahuangarin ñucapaj punda mandanajushca mandajcunaca, micunamandapash, vinomandapash, chaupi kiloshna culquitapash yalishpa mañashpami, israelcunataca llaquichishpa causanajushca. Shinallata paicunata servijcunapashmi, israelcunataca mandanajushca. Ashtahuangarin ñucaca, Taita Diosta manllaj cashpami, na shina rurarcani.

¹⁶Shinallata Jerusalén muyundi cai jatun pircatapashmi, ñuca alichina cashcataca alichircani. Shina rurashpapash, paicunapaj alpacunataca na randishpami saquircanchi. Ñucata tucui servijcunapash, ñucanchihuan tandanajushpami chai pircata ruranajurca.

¹⁷Chai jahuapash, Judá llactapi causanajuj patsaj picha chunga runacuna, shuj mandajcuna, ñucanchi muyundi llactacunamanda shamushcacunapashmi, ñucahuan tiarishpa micunajurca.

¹⁸Punllandi micungapaca, ashtahuan ali shuj huagrata, agllashcalla sucta ali llamacunatami huañuchishpa yanun carca. Ñucamambash, alasyu animalcunatami huañuchishpa yanun carca. Vinopash, chunga punllapi, chunga punllapimi ashtacapacha tiarca. Shina cajpipash cai llactapi causajcunaca, gañan tucushpa ninanda llaquichi tucushcamandami, ñucaca mandajcuna mañanataca, ima horallapash na mañarcani.

¹⁹Ñuca Taita Dioslla, cai llactapi causajcunaman cashna tucuita ñuca rurashcamandaca, ñucamambash alita ruranata yarihuanguiyari.