Read Imbabura Highland Quichua NEHEMÍAS 6 Bible Online

NEHEMÍAS 6 - Imbabura Highland Quichua bible

NEHEMÍAS 6

¹Jerusalén muyundi jatun pircata ñuca shayachishcata, chai pircapi shuj utujullapash na quedashcatami, Sanbalat shuti runapash, Tobías shuti runapash, arabepura Gesem shuti runapash yacharca. (Shina cashpapash jatun pungucunapica, chai punllacunacamambash tablacunataca nara churashcachu carca).

²Sanbalat shuti runapash, Gesem shuti runapashmi, ñucaman cashna nichun cachamushca carca: “Ono nishca pambapi tiaj maijan uchilla llactapipash, tandanajungapaj shamui” nishpami cachamushca carca. Ashtahuangarin paicunaca, ñucata llaquichinatami yarinajushca carca.

³Shinamandami ñucapash, villaj runacunata cashna nishpa cacharcani: “Ñucaca, shuj jatun ruranatami charini. Chaimandami na rita ushani. Ñuca rurajushcata saquishpa cangunapajman rijpica, chai rurajushcapash chaipimi quedanga” nichunmi cacharcani.

⁴Shina cajpipash, chaitallata nichunmi chuscucaman ñucapajman cachamurca. Ñucapash, punda nishcashnallatami tigrachircani.

⁵Shina tigrachijpimi Sanbalat shuti runaca, na sellashca cartata, caihuanga pichacaman paipaj servijhuan cachamushca carca.

⁶Chai cartapica, cashnami escribishca carca: “Shuj llactapi causajcunapash, cashna nijtami uyanchi: ‘Cambash, Judá llactapi causajcunapash, jatun mandajta na cazushpa jatarinata yarishpami, chai jatun pircataca alichinajun’ nijtami uyanchi. Gasmu nishca Gesem shuti runapash, chashnallatami nijun. Chaicunata uyashpaca, can jatun mandaj tucungapaj munajujtami uyanchi.

⁷Shinallata: ‘¡Judá llactapica, jatun mandaj tianmi!’ nishpa, canmanda Jerusalenbi causajcunaman villanajuchunga, Dios ima nishcata villajcunatami churashcangui ninmi. Cunanga, chashna nishcacunaca, jatun mandajpica uyaringami. Shina cashcamanda pai nara yachajpillata, ucha shamui ñucanchihuan parlangui” nishpami escribishca carca.

⁸Shinamandami, cashna nichun cacharcani: “Can nishcashnaca, imapash na chashnachu. Ashtahuangarin cambaj shungupi yarishcatallami, shina nijungui” nircanimi.

⁹Tucui paicunaca, cashna nishpami ñucanchita manllachinajurca: “Paicunaca, chai jatun pircata ruranajushpapash, paicunapaj maqui shaijujpica, chai ruranajushcataca na tucuchingachu” ninajurcami. Shinamandami ñucaca: “Taita Dioslla, cunanga ñuca maquitapash shinllichihuayari” nishpa mañarcani.

¹⁰Chai jipami ñucaca, Delaía shuti runapaj churi Semaía shuti runapaj huasiman shamurcani. Paica, Mehetabel shuti runapaj nietomi carca. Semaías shuti runaca, paipaj huasipi vicharishca tiajushpami, cashna nirca: “Taita Diospaj huasi ucupi tandanajushun. Chaipica, Diospaj huasi pungucunata vicharishunllami. Canda huañuchingapajmi shamunajun. Ari, cunan tutallatami canda huañuchingapaj shamunga” nircami.

¹¹Shina nijpimi, cashna nircani: “¿Ñucashna shuj runaca pacajungachu? Ñucashna runaca, ¿maijan runata causaita quishpichingapaj, Diospaj huasiman yaicungayari? Na yaicushachu” nircanimi.

¹²Chaipimi, Taita Diosca na cachamujushcata yacharcani. Ashtahuangarin Sanbalat shuti runahuan, Tobías runahuan culquita pacalla cujpillami, Dios villashcatashna villashpa, ñucata fiñashpa rimajuhuashca carca.

¹³Chashna nishpa ñucata manllarishpa juchata rurachunmi, culquita pacalla japishca carca. Ñuca shutipash nali ricurijpi, ñucata juchachishpa rimanajuchunmi, chashna rurashca carca.

¹⁴Taita Dioslla, Sanbalat shuti, Tobías shuti runacuna caicunata rurashcashnallata llaquichingapaj yaripairi. Noadías shuti villaj huarmipash, caishuj villajcunapash, ñucata manllachishpa pandachingapaj munashcataca yaripairi.

¹⁵Jerusalén muyundi jatun pircacunataca, Elul shuti quillapaj ishcai chunga picha punllapimi tucuchircanchi. Picha chunga ishcai punllapimi tucuchircanchi.

¹⁶Chaita yachashpami, ñucanchita tucui fiñajcunapash, ñucanchi muyundi llactacunapi causajcunapash manllarishpa, pingai tucunajurca. Chai ruranacunataca, ñucanchi Taita Dios ayudajpi tucuchishcatami yachanajurca.

¹⁷Shinallata chai punllacunapica, Judá llactapi mandajcunaca, tauca cartacunatami Tobías shuti runaman cachanajurca. Shinallata Tobías runapashmi, paicunaman tigrachijurca.

¹⁸Tobías runaca, Ara shuti runapaj churi Secanías shuti runapaj ushihuanmi cazarashca carca. Paipaj churi Johanán shuti runapash, Berequías runapaj churi Mesulam shuti runapaj ushihuanmi cazarashca carca. Chaimandami, Judá llactapi causaj ashtaca gentecunaca, Tobías runahuan shujlla yuyai tucushpa tandanajushca carca.

¹⁹Shinallata ñuca ñaupajpica, imalla alicunata Tobías runa rurashcatami parlanajurca. Tobías runamambash, ñuca imatalla nishcatami villagrinlla carca. Chaimandami Tobiasca, ñucata manllachingapaj cartacunata cachamujurcalla.