Read Imbabura Highland Quichua NEHEMÍAS 8 Bible Online

NEHEMÍAS 8 - Imbabura Highland Quichua bible

NEHEMÍAS 8

¹Ña canchis quillapipash israelcunaca, paicunapaj pueblocunapillatami causanajurca. Chaimandami tucui gentecunaca, Yacuman llujshina pungu chimbapura plazapi shujllashnalla tandanajurca. Chaipimi escribij Esdrastaca, Moisés mandashpa escribichishcata apamui ninajurca. Chai mandashcataca, Mandaj Diosmi israelcunaman cushca carca.

²Shina nijpimi Esdras curapash, chai canchis quillapaj punda punllapi tandanajushca jaricunapaj, huarmicunapaj, ña entendi ushanalla tucui gentecunapaj ñaupajman, chai mandashcata apamurca.

³Esdrasca, Yacuman llujshina pungu chimba purapi, paicuna tandanajushca plaza ñaupajpi shayarishpaca, yurajlla punllayajujmanda chaupi punllacamanmi, librotaca jaricunapaj, huarmicunapaj, ña entendi ushanalla tucui gentecunapaj ñaupajpi leyijurca. Chai leyishcataca, tucui gentecunami paicunapaj rinrihuan aligutapacha uyanajurca.

⁴Escribij Esdrasca, shayaringapaj caspicunahuan rurashca jahuapi shayarishpami, chai librotaca leyijurca. Paipaj ali ladopica, Matatías, Sema, Anías, Urías, Hilcías, Maasías shuti runacunami shayanajurca. Shinallata lluqui ladopica, Pedaías, Misael, Malquías, Hasum, Hasbadana, Zacarías, Mesulam shuti runacunami shayanajurca.

⁵Esdrasca, tucuicunata yali ashtahuan jahuapi shayajushpami, chai librotaca, tucuicuna ricujta pascarca. Chai escribishcata pascajpica, tucui gentecunami aliguta uyanajurca.

⁶Chaimandami Esdrasca, Mandaj jatun Taita Diosta alicachirca. Shina alicachijpimi, tucui gentecuna maquita vichai churashpa: “¡Shina cachun! ¡Shina cachun!” ninajurca. Shinallata alpapi cungurishpa ninanda llaquirishpami, Mandaj Diostaca alicachinajurca.

⁷Levita puramandaca: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán, Pelaía shuti runacunami, chai mandashcataca tucui israelcunaman aliguta yachachinajurca. Shina yachachinajujpimi, shuj pushtupilla shayarishpa aliguta uyanajurca.

⁸Taita Dios mandashcata escribishca librotaca, aliguta entendinallata leyijujpimi, tucuicuna yuyaita japishpa aliguta entendinajurca.

⁹Chaita uyashpaca, tucui gentecunami huacanajurca. Shina huacanajujpimi, mandaj Nehemías runapash, escribij Esdras curapash, chai leyishcata entendichij levitacunapash, cashna ninajurca: “Cunanga, ñucanchita Mandaj Taita Diosman shicanyachishca punlla cashcamandami, na llaquirina canguichi, na huacana canguichi” ninajurcami.

¹⁰Chai jipami, paicunataca cashnatapash nirca: “Cai punllataca, ñucanchi Jatun Diosca, paipajlla cachun shicanyachishca punllami. Vira aichacunata micungapaj richi, ali mishqui vinotapash ufiachi. Ima micuna yanushcata na charijcunamambash, ashaguta carashpa cachaichi. Na llaquirinachu canguichi. Ashtahuangarin Mandaj Dios cushijuita cushcamandami, ushaita charinguichi” nircami.

¹¹Levitacunapashmi, tucui gentecunata cashna nishpa upallayachinajurca: “Cunanga, Mandaj Dios shicanyachishca punllami. Ama llaquirishpa, upalla caichilla” ninajurcami.

¹²Paicunaman yachachishca shimicunata entendishpami, tucui gentecuna micushpa, ufiashpa, shujcunamambash carashpa ninanda cushijungapaj rinajurca.

¹³Chai cayandi punllami, tucui gentecunapaj familiacunata mandajcuna, curacuna, levitacunaca, mandashca shimicunata yachajungapaj, escribij Esdraspajman tandanajurca.

¹⁴Paicunaca, Moisesman Mandaj Dios mandashpa escribichishcapimi, cashna nishcata ricunajurca: “Israelcunaca, canchis quillapi jatun fiestata rurashpaca, yuramanda malquicunahuan chugllacunata rurashpami causana canguichi” nishcatami ricunajurca.

¹⁵Shinallata tucuilla pueblocunapi, Jerusalenbi causajcuna yachachun, cashna nishpa villachun mandashcatami ricunajurca: “Mandashcapi escribishcashnallata, chugllacunata rurangapaj urcuman llujshishpa, olivos malquicunata, sacha olivos malquicunata, arrayán malquicunata, palmera malquicunata, fanga junda tucui yuramanda malquicunata apamuchun” nishcatami ricunajurca.

¹⁶Shinamandami gentecuna llujshishpaca, malquicunata apamushpa chugllacunata ruranajurca. Tucuicunami, paicunapaj huasi jahuapi tiaj patiocunapi, paicunapaj huasi patiocunapi, Diospaj huasi patiocunapi chugllacunata ruranajurca. Yacuman llujshina pungu ladolla plazapipash, Efraín shuti pungu ladolla plazapipashmi chashna ruranajurca.

¹⁷Chai tucuilla tandanajushcacunaca, prezu apai tucushcamanda tigramushcacunami, chugllacunata rurashpa, chai chugllacunapi tianajurca. Israelcunaca, Nun shuti runapaj churi Josué causajui punllacunamanda chai punllacamanmi, chashnataca na rurashca carca. Ña chaicunata ruranajushpami, ninandapacha cushijunajurca.

¹⁸Taita Dios mandashcata escribishca librotami Esdrasca, callari punllamandapacha canchis punllacaman, punllandi leyijurca. Chai jatun fiestataca, canchis punllacaman rurashpami, ña pusaj punllapica, imashna rurachun mandashcashnallata, jatun tandanajuita ruranajurca.