Read Imbabura Highland Quichua NEHEMÍAS 9 Bible Online

NEHEMÍAS 9 - Imbabura Highland Quichua bible

NEHEMÍAS 9

¹Chai quillapajllata ishcai chunga chuscu punllapimi israelcunaca na micushpa, cañamuta churajushpa, alpata churarishpa tandanajurca.

²Israelpaj miraicunaca, shuj llactamanda shamushca gentecunamandaca, ñami shicanyarishca carca. Paicunaca shayanajushpallatami, paicunapaj juchacunatapash, paicunapaj ñaupa taitacuna nalita rurashcacunatapash villanajurca.

³Shina villashpaca, paicuna shayanajushca pushtupillatami, paicunata Mandaj Taita Dios mandashpa escribichishca librotaca, quimsa horascaman leyijta uyanajurca. Shuj quimsa horastaca, paicunapaj juchacunata villashpami, paicunata Mandaj Taita Diosta alicachinajurca.

⁴Chai jipami, Jesúa, Bani, Cadmiel, Sebanías, Buni, Serebías, Bani, Quenani shuti levitacunaca, paicunapaj rurashca gradas jahuapi shayarishpa, paicunata Mandaj Taita Diosta caparishpa mañanajurca.

⁵Shina mañashca jipami Jesúa, Cadmiel, Bani, Hasabnías, Serebías, Hodías, Sebanías, Petaías shuti levitacunaca, cashna ninajurca: “Cangunata Mandaj Taita Diostaca, na tucurina causaita causaicaman aligumari cangui ningapaj jatarichi. Alimari cangui nishpa alicachi tucushcataca, ashtahuan yalishpa cambaj punchapamba shutiguca alicachi tucupachun.

⁶Canllami Mandaj Dios cangui. Canllami jahua pachatapash, ashtahuan jahuaman jahua pachatapash, chaipi imalla tiajcunandi, cai pachatapash, caipi imalla tiajcunandi, mama cuchatapash, chaipi imalla tiajcunandi rurashcangui. Tucui chaicunaman causaita cushcamandami, jahua pachapi causanajuj angelcunapash, candaca ninanda alicachinajun.

⁷Mandaj Dioslla, canmi taita Abramda agllaj Taita Dios cangui. Shina agllashpami, caldeocunapaj Ur shuti pueblomanda llujchishpa, Abraham shutita shutichishcangui.

⁸Paitaca, tucui shunguhuan cambaj ñaupajpi cazujujta ricushpami, cananeo, heteo, amorreo, ferezeo, jebuseo, gergeseo nishca gentecunapaj llactata, paipaj miraicunaman carangapaj paihuan ari nishcangui. Imatapash cashcatapacha ruraj cashpami, chaitaca pactachishcangui.

⁹Shinallata ñucanchi ñaupa taitacunataca, Egiptopi llaquinayaita causanajujtami ricushcangui. Chaimandami, Puca Cucha manñapi cashpa caparishpa mañajpipash uyashcangui.

¹⁰Faraondapash, tucui paita servijcunatapash, paipaj llactapi tucui causajcunatapash ninanda fiñashpami, shuj ricuchinacunata, jatun manllarinacunata rurashcangui. Chaita rurashpami, tucuicuna rijsishca tucushcangui. Canga, israelcunata ninanda jariyashpa llaquichinajujta yachashpami, chashna rurarcangui.

¹¹Israelcunapaj ñaupajpica, mama cuchatapashmi ishcai ladoman chaupishcangui. Shinamandami chai chaupitaca, chaquishca alpata yalinajushca. Ashtahuangarin paicunata llaquichingapaj catijcunataca, jatun rumita yacu ucuman shitanshnami, yacu ucupi shitashpa saquishcangui.

¹²Israelcunataca, punllapica pilarshnalla shayajuj fuyuhuan, tutaca pilarshnalla shayajuj ninahuan punchayachishpami, maita rinatapash ñanda ricuchishpa pushashcangui.

¹³Sinaí shuti urcuman uriajumushpami, paicunahuanga jahua pachamanda rimamushcangui. Chaipica, ali yachachishcacunata, na llullaj mandashcacunata, pactachinajuchun cushca shimicunata, aligutalla mandashcacunatami cushcangui.

¹⁴Samana punllatapash cambajlla shicanyachishca cachunmi mandashcangui. Chai mandashca shimicunata, pactachinajuchun cushca shimicunata, mandashcacunataca, canda servij Moisespaj maquihuanmi escribichishcangui.

¹⁵Yarjachinajujpipash, jahua pachamanda tandagutami carashcangui. Yacunayachijujpipash, jaca rumimanda yacuta llujchishpami carashcangui. Llactaman yaicushpa, llactata japinajuchunmi mandashcangui. Chai llactata carashami nishpami, cambaj maquita alsashpa juramentushcangui.

¹⁶Ashtahuangarin paicunapash, ñucanchi ñaupa taitacunapashmi jariyashpa, shinlliyashcapacha tucushpa, can mandashcacunataca na cazushca.

¹⁷Uyangapaj na munashpami, juyaillacunata paicunaman can rurashcacunataca, yaritapash na yarinajushca. Ashtahuangarin shinlliyashcapacha tucushpa na cazushpami, Egiptopi cutin gañan causangapaj pushachun munashpa, shuj mandajta agllashca. Shina cajpipash canga juyaj, llaquij, na ñapash fiñarijlla, alitalla ruraj, ima nalita rurajpipash, cungajlla Taita Diosmi cangui. Shina cashpami, paicunataca na jichushpa saquishcangui.

¹⁸Chai jahuapash, paicunaca imatapash yacuyachishpa, paicunamanllata shicuta rurashpami, cashna ninajushca: ‘Caimi, Egiptomanda cangunata vichai pushamuj Taita Dios’ nishpami, millanayaicunata ruranajushca.

¹⁹Chashna rurajpipash canga, tucuillata ninanda juyaj cashpami, jichushca pambapica, na saquishcangui. Punllapi paicunata pushaj pilarshnalla shayajuj fuyutapash, tutapi paicuna maita rina cajpipash, punchayachishpa pushaj pilarshnalla shayajuj ninatapash, paicunamandaca na anchuchishcanguichu.

²⁰Ashtahuangarin paicunata yachachingapajmi, cambaj juyailla Espirituta cachamushcangui. Maná nishca micunagutapash carajushcanguillami. Yacunayachijpipash, yacutami carashcangui.

²¹Canga, jichushca pambapipash chuscu chunga huatacunatami cuidashpa charishcangui. Imapash na illajpimi causanajushca. Paicunapaj churajunacunapash na maucayashcachu, paicunapaj chaquipash na punguishcachu.

²²Llactacunatapash, asha asha chaupishpami, chai llactapi causanajuj gentecunandi cushcangui. Jatun mandaj Sehón shuti runa mandajuj Hesbón shuti pueblotapash, jatun mandaj Og shuti runa mandajuj Basán shuti llactatapashmi, paicunaca japinajushca.

²³Paicunapaj huahuacunatapash, jahua pachapi tiaj luzerocunatashnami, ashtacatapacha mirachishcangui. Shinamandami paicunataca, paicunapaj punda taitacunaman carashami nishca llactata japishpa causanajuchun, chai llactaman pushashcangui.

²⁴Paicunapaj miraicuna shamushpami, chai llactataca japinajushca. Paicunapaj ñaupajpimi, chai llactapi causajushca cananeocunapaj ñavitaca, urai cumuchishcangui. Chai cananeocunataca, munashcata llaquichinajuchunmi, paicunata jatun mandajcunandi, chai llactapi causajushca gentecunandi, chai miraicunapaj maquipi churashcangui.

²⁵Shinallata muyundi pircashca pueblocunata, ali fucuj alpacunata, huasicunata, tucui ima alicunahuan junda huasicunatapashmi japinajushca. Yacuta tandachingapaj rurashca jatun utujucunata, uvas chagracunata, olivos yuracunata, shuj shuj fucuj ashtaca yuracunatapashmi japinajushca. Shina japishpaca, vijsa pactajta micushpami, can juyashpa carashcamanda cushijushpa causanajushca.

²⁶Ashtahuangarin paicunaca, can mandashcata na cazushpa, nalita rurashpami candaca fiñachishca. Can mandashcatapash, huashaman churashpami, cambajman tigrachingapaj paicunata rimaj, can imata nishcata villajcunatapash huañuchinajushca. Chashnami, jatun millanayaicunata ruranajushca.

²⁷Chashna causanajushcamanda paicunata fiñajcunapaj maquipi churajpimi, chai fiñajcunaca llaquichinajushca. Shina llaquichinajui punllacunapimi, candaca caparishpa mañanajushca. Shina mañanajushcataca, jahua pachamandami uyashcangui. Shina uyashpami, canga ninanda llaquij cashcashnallata, chai fiñajcunapaj maquimanda cacharichinajuchun quishpichijcunata cachamushcangui.

²⁸Shina cajpipash ima llaquipash illaj ali causanajushpaca, cutinmi cambaj ñaupajpica nalita ruranajushca. Chaimandami paicunataca, paicunata mandashpa charij, paicunata fiñajcunapaj maquipi saquishcangui. Chaimandami paicunaca, cutin canda mañanajushca. Paicuna mañanajushcataca jahua pachamanda uyashpami, can imashna llaquij cashcashnallata cutin cutin cacharichishcangui.

²⁹Can mandashcata tigrashpa cazunajuchunmi, shinllita tacurishcangui. Ashtahuangarin paicunaca ninanda jariyashpa, can mandashcacunatapash na uyanayachishpami, can yachachishcacunatapash na cazushpa juchata ruranajushca. Chai mandashcacunata cazujcunaca, cazushcamandami causanga. Paicunaca jariyashpa, shinlliyashcapacha tucushpami na uyanajushca.

³⁰Chashna cajpipash, paicunataca tauca huatacamanmi na llaquichishcangui. Ashtahuangarin cambaj Espirituhuan, can imata nishcata villajcunamambash yarichishpami villachishcangui. Chashna villachijpipash na uyanayachijpimi, shuj llactamanda gentecunapaj maquipi churashcangui.

³¹Ashtahuangarin canga, ninandapacha llaquij cashpami na tucuchishcangui. Jichuitapash na jichushcanguichu. Canga, ninanda juyaj, llaquij Taita Diosmi cangui.

³²Cunanga, ñucanchi Taita Dioslla. Canga, ushaita charij, jatun manllana Taita Diosmi capangui. Canga, imatalla nishcatapash pactachij, ninanda llaquij Diosmi capangui. Ñucanchita jatun mandajcuna, ñucanchita shuj mandajcuna, ñucanchi curacuna, can ima nishcata villajcuna, ñucanchi punda taitacuna, tucuilla cambaj gentecuna llaquita apanajushcataca, ama yanga saquipaichu. Asiria llactata jatun mandajcuna quichushca punllamanda cunan punllacaman ninan llaquita cambaj ñaupajpi apanajushcataca, ama saquipaichu.

³³Ashtahuangarin canga, imatapash cashcatapacha ruraj cashpami, ñucanchitaca chashna llaquichishcangui. Canga, aligutallami rurashcangui. Ashtahuangarin ñucanchimi, nalita rurashcanchi.

³⁴Ñucanchita jatun mandajcuna, ñucanchita shuj mandajcuna, ñucanchi curacuna, ñucanchi punda taitacunaca, paicuna ali tucuchun can shinlli tacurishpa mandashcacunataca na pactachishcachu. Can mandashca shimicunata, imashna causachun can yachachishca shimicunata villajpipash, na uyanayachishcachu.

³⁵Llactacunata paicuna mandanajujpica, ashtaca alicunatami carashcangui. Ali fucuj ashtaca alpacunatami, paicunapaj ñaupajpi carashcangui. Chashna carajpipash, candaca na servinajushcachu. Paicuna nalita ruranajushcatapash na saquishcachu.

³⁶Ricui, cunanga servijcunami tucushcanchi. Ricui, caipi fucushcacunata, imalla tiajcunata micushpa causachun, ñucanchi ñaupa taitacunaman carashca cai llactapillatami, servijcuna tucushpa causanajunchi.

³⁷Ñucanchi juchacunamandaca, llactapi ninanda fucushca granocunatapash, ñucanchita mandachun churashca jatun mandajcunami micunajun. Paicunaca ñucanchitapash, ñucanchi animalcunatapash, paicuna munashcatami mandashpa llaquichinajun. Chaimandami ñucanchica, jatun llaquipi causanajunchi” ninajurcami.

³⁸Tucui chai llaquicunamandami, ñucanchica pactachingapajpacha ari nishpa escribircanchi. Chaipica, ñucanchita mandajcunapash, ñucanchi levitacunapash, ñucanchi curacunapashmi paicunapaj shutita churarca.