Read Imbabura Highland Quichua ÉXODO 11 Bible Online

ÉXODO 11 - Imbabura Highland Quichua bible

ÉXODO 11

¹Mandaj Diosca, Moisestaca cashnami nirca: —Faraonbajmambash, Egipto llactamambash, shuj llaquichinata apamunarami cani. Chashna llaquichishca jipaca, paillatami cangunataca caimanda richun saquinga. Caimandaca, cangunataca tucuillata llujchishpa cachangapachami.

²Cunanga, ñuca agllashcacunataca, jaricunaca paicunapaj ladollapi causaj jaricunata, huarmicunaca paicunapaj ladollapi causaj huarmicunata orota, culquita rurashca juyailla charishcacunata mañachun mandai— nircami.

³Mandaj Diosca, pai agllashcacunataca, Egiptopi causajcunapaj ñavipi ali ricurichunmi rurarca. Shinallata Moisespashmi, Egipto llactapica, Faraonda servijcunapaj ñaupajpipash, chai llactapi causajcunapaj ñaupajpipash, ali runagupachami nishpa rijsi tucushca carca.

⁴Moisesca cashnami nijurca: —Mandaj Diosca, cashnami nirca: ‘Chaupi tutami ñucaca, Egiptopi causajcunapaj chaupita yalisha.

⁵Punda churicunami, Egipto llactapica tucuilla huañunga. Mandangapaj tiarinapi tiajuj Faraonbaj punda churimanda callarishpa, rumipi cutashpa shujcunata servij huarmipaj punda churicamanmi huañunga. Shinallata punda huacharishca jari animalcunapashmi tucuilla huañunga.

⁶Tucuilla Egipto llactapimi, ninan caparinajui tianga. Ima horapash chashnaca na tiashcachu. Jipa punllacunapipash, chashnaca na tiangachu’ nircami.

⁷Ashtahuangarin tucuilla israelcunataca, runacunamanda callarishpa, animalcunacaman shuj alcullapash na caningachu. Egiptopi causajcunahuan, israelcunahuan Mandaj Dios shicanyachishcata canguna yachachunmi, chashna canga.

⁸Shinamandami, cambaj cai tucuilla servijcunapash, ñucapajman urai shamushpa, ñuca ñaupajpi cungurishpa cashna ninajunga: ‘Cambash, can mandajuj tucuilla gentecunapash, ripaichilla’ ninajungami. Shina nijpimi, ñucaca llujshisha— nijurcami. Shina nishpallami Moisesca, ninanda fiñarishpa, Faraonbaj ñaupajmanda llujshirca.

⁹Mandaj Diosca, Moisestaca cashnami nirca: —Faraonga, cangunataca na uyangapaj munangachu. Imapash juyaillacunata ashtahuan rurashpa, Egipto llactapi ñuca ricuchijuchunmi, chashna tucunga— nircami.

¹⁰Jatun manllarinacunata rurashpa cai tucuita ricuchinacunataca, Faraonbaj ñaupajpimi Moisespash, Aaronbash ruranajurca. Mandaj Diosllatami, Faraonbaj shungutaca shinlliyachishca carca. Shinamandami israelcunataca, paipaj llactamandaca na llujchishpa cacharca.