Read Imbabura Highland Quichua ÉXODO 14 Bible Online

ÉXODO 14 - Imbabura Highland Quichua bible

ÉXODO 14

¹Mandaj Diosca, Moisesmanmi cashna nishpa villajurca:

²“Israelcunataca cashna ni: ‘Cutin tigrashpa, Baal-zefón shuti pueblo chimba purapi mama cuchahuan, Migdol shuti pueblohuan chaupipi tiaj Pi-hahirot pueblo chimba purapi carpacunata shayachishpa tiarichi. Chai pueblopaj chimba purapi mama cucha ladollapi, carpacunata shayachishpa tiarichi.

³Faraónga, israelcunamandaca cashnami nijunga: Vichai tucushcashnami, cai llactapilla purinajunga. Jichushca pambami, vichashcatashna saquishca nijungami.

⁴Ñucami, cangunata catichun, Faraonbaj shunguta shinlliyachisha. Faraondapash, paipaj tucui soldadocunatapash tucuchishcamandami, ucaca punchapambami cangui ni tucusha. Shinallata Egiptopi causajcunaca, ñucalla Mandaj Dios cajtapashmi yachanajunga’ ni” nijurcami. Shina nijpimi, chai nishcataca chashnallata ruranajurca.

⁵Egipto llactata jatun mandajmanmi, israelcuna pacajushpa rinajujta villashca carca. Shina villajpimi Faraonbash, paita servijcunapash, israelcunata shungupi fiñashpa, cashna ninajurca: “Israelcuna ñucanchita servinajunata saquishpa richunga, ¿imashpata saquishcanchiyari?” ninajurcami.

⁶Shinamandami Faraonga, paipaj carretata caballocunapi huatashpa, paipaj soldadocunatapash paihuan tandachirca.

⁷Shinallata sucta patsaj agllashca ali carretacunata, Egiptomanda tucui carretacunata, chai carretacunapi purij soldadocunata mandajcunatapashmi tandachirca.

⁸Egipto llactata jatun mandaj Faraonbaj shungutaca, Mandaj Diosllata shinlliyachijpimi Faraonga, israelcunata catijurca. Ashtahuangarin israelcunaca, Diospaj ninan ushaita charij maquihuan llujchijpimi llujshishca carca.

⁹Egiptopi causajcunaca, tucuilla caballocunandi, Faraonbaj carretacunandi, caballopi tiarij Faraonbaj soldadocunandi, paipaj tucuilla soldadocunandimi catinajurca. Israelcunataca, Baal-zefón shuti pueblo chimba purapi, Pi-hahirot shuti pueblo ladopi mama cucha ladollapi carpacunata shayachishpa tianajujtami japigrirca.

¹⁰Faraón ña chayamujujpi israelcuna vichai ricushpaca, Egiptopi causajcuna paicunapaj huashata catimunajujtami ñapash ricurca. Chaimandami israelcunaca, ninandapacha manllarishpa, Mandaj Diosta caparishpa mañanajurca.

¹¹Moisestapash cashnami ninajurca: —Jichushca pambapi ñucanchi huañuchun llujchimungapaca Egiptopica, huañushcata pambana utujucunaca, ¿nachu tiarca? ¿Imashpata ñucanchitaca, Egiptomanda llujchimushpa cashna rurashcangui?

¹²¿Nachu cashna tucunataca, Egiptopi cashpallata candaca cashna ninajurcanchi?: ‘Egiptopi causajcunata servishpa causachun ñucanchitaca saquilla. Jichushca pambapi huañungapaj randica, Egiptopi causajcunata servishpa causanami ashtahuan ali canga’ ninajurcanchimi— ninajurcami.

¹³Shina nijpimi Moisesca, israelcunataca cashna nirca: —Na manllanachu canguichi, shinlli shayarichi. Shina shayarishpaca, Mandaj Dios cangunata, cunan imashna quishpichijta ricuichi. Cunambi ricunajunguichi, chai Egipto runacunataca, cangunapaj tucui causaipi ima horapash na ashtahuan ricushpami causanguichi.

¹⁴Mandaj Diosmi, cangunamandaca macanajunga. Cangunaca, imatapash na manllanachu canguichi— nircami.

¹⁵Shina nijpimi Mandaj Diosca, Moisestaca cashna nijurca: —¿Imashpata ñucata caparijungui? Israelcunataca, richilla ni.

¹⁶Canga, cambaj vara caspita alsashpa, mama cucha jahuaman cambaj maquita chutashpa, ishcaipi shicanyachingui. Israelcunaca, mama cucha ishcaipi shicanyashpa chaquishca chaupitami yalinajunga.

¹⁷Ricuichi ñucami, Egiptopi causajcunapaj shungutaca, cangunata catichun shinlliyachisha. Faraondapash, paipaj tucui soldadocunatapash, paipaj carretacunapi purij runacunatapash, caballocunapi tiarij runacunatapash tucuchishcamandami, ucaca punchapambami cangui ni tucusha.

¹⁸Shina rurajpimi ñucataca, Mandaj Dios cajta yachanajunga. Faraonbi, paipaj carretacunapi purij runacunapi, caballocunapi tiarij paipaj runacunapi, punchapambami cangui ni tucujpimi, Egiptopi causajcunaca chashna yachanajunga— nijurcami.

¹⁹Shina nishca jipami, tandanajushca rinajuj israelcunapaj ñaupajpi rijushca Taita Diospaj angelca anchurishpa, paicunapaj huashata catijurca. Shinallata paicunapaj ñaupajpi rijushca pilarshnalla shayajuj fuyupash anchurishpami, paicunapaj huashaman yalirca.

²⁰Chai fuyuca, Egiptomanda tandanajushca soldadocuna catinajujpi, tandanajushca israelcunapash rinajuj chaupipimi rijurca. Egipto llacta soldadocunapaca fuyupash, yana tutapashmi carca. Ashtahuangarin israelcunataca, tuta cajpipash punchayachijurcami. Chai tutapica, caishujmanda chaishujmanda na tuparinajurca.

²¹Moisesca, paipaj maquitaca mama cucha yacu jahuamanmi chutarca. Chashna chutajpimi Mandaj Diosca, tucui chai tutapica indi llujshimuj ladomanda, shinlli huairahuan mama cuchata chaupirca. Shina chaupijpi mama cucha chaquijpimi, yacucunaca shicanyashpa quedarca.

²²Shina cajpimi israelcunaca, mama cucha chaquishca chaupita yalinajurca. Yacucunaca ali ladomambash, lluqui ladomambash, patashna cajpimi chashna yalinajurca.

²³Egipto soldadocunaca, paicunapaj huashata catishpami, mama cucha chaupicaman yaicunajurca. Faraonbaj tucuilla caballocunandi, paipaj carretacunandi, caballopi tiarishca paipaj gentecunandimi, chashna yaicunajurca.

²⁴Tutamanda ña pacarimujujpica, cashnami tucurca: Mandaj Diosca, pilarshnalla ninamanda pilarshnalla fuyumandami, tandanajushca Egipto soldadocunataca ricurca. Shina ricushpami, tandanajushca Egipto soldadocunataca muspachirca.

²⁵Paicunapaj carretacunapaj ruedacunata anchuchishpami, paicunataca ninandapacha muspachijurca. Chaimandami Egipto soldadocunaca, cashna ninajurca: —Israelcunapaj ñaupajmandaca, pacajushpa calpashunchi. Mandaj Diosmi paicunamandaca, Egipto soldadocunata fiñashpa macanajujun— ninajurcami.

²⁶Mandaj Diosca, Moisestaca cashnami nirca: —Cambaj maquita mama cucha jahuaman chutai. Egipto runacunapaj jahuapi, paicunapaj carretacunapaj jahuapi, paicunapaj caballocunapaj jahuapi yacu quilpachun chashna chutai— nircami.

²⁷Shina nijpimi Moisesca, paipaj maquita mama cucha jahuaman chutarca. Ña punllayajujpimi, mama cuchaca ninan shinllitapacha shamushpa quilparijurca. Shina quilparijujpimi, Egipto soldadocuna pacajungapaj calpanajushpaca, mama cucha yacuhuan tuparinajurca. Chashnami Mandaj Diosca, Egipto soldadocunataca mama cucha chaupipi tucuchirca.

²⁸Yacucuna tigrashpami carretacunata, caballocunata, israelcunata catishpa mama cuchaman yaicushca, Faraonbaj tucuilla soldadocunatapash quilparca. Paicuna puramandaca, shujllapash na puchurcachu.

²⁹Israelcunaca, mama cucha chaquishca chaupitami yalirca. Yacucunaca, ali ladomambash, lluqui ladomambash, patashna cajpimi chashna yalirca.

³⁰Chashnami Mandaj Diosca, chai punllapica israelcunataca, Egipto soldadocunapaj maquimanda quishpichirca. Israelcunaca, Egipto soldadocunataca, mama cucha manñapi huañushca sirinajujtami ricunajurca.

³¹Israelcunaca, cai jatun rurashcataca Egipto soldadocunata, Mandaj Dios fiñashpa chashna rurashcatami ricunajurca. Chaimandami israelcunaca, Mandaj Diosta manllashpa, Mandaj Diostapash, paita servij Moisestapash crinajurca.