Read Imbabura Highland Quichua ÉXODO 15 Bible Online

ÉXODO 15 - Imbabura Highland Quichua bible

ÉXODO 15

¹Shinamandami Moisespash, israelcunapash cai candanata cashna nishpa, Mandaj Diosman candanajurca: “Jatun manllarinacunata rurashpa ricuchishcamandami ñucaca, Mandaj Diosman candasha. Paica caballocunandi, soldadocunandimi, mama cuchapi huashajuchishca.

²Mandaj Diosca ñucata shinllichij, ñuca candana Diosmi. Paimi ñucata quishpichihuashca. Paimi ñucapaj Taita Dios, paitami alicachisha. Ñuca taitapaj Taita Diosmi, paitami jatunyachisha.

³Mandaj Diosca, macanajunata ali yachaj runashnami. Paica, Mandaj Dios shutimi.

⁴Faraonbaj carretacunataca, paipaj soldadocunandimi, mama cuchapi huashajuchirca. Paipaj soldadocunata mandachun agllashca soldadocunapash, Puca Cuchapimi pambai tucurca.

⁵Manllanayai ucu ucu yacucunami quilparca. Rumishnami ucu ucucaman, urai huashajunajurca.

⁶Mandaj Dioslla, cambaj ali lado maquimi, jatun manllarinacunata, ninan ushaihuan rurashca. Mandaj Dioslla, cambaj ali lado maquimi fiñajcunataca faquinshna llaquichishca.

⁷Canda fiñashpa jatarijcunataca, cambaj jatun ushaihuanmi urmachishcangui. Canga ninanda fiñarishpami, paicunataca chaquishca fangacunatashna tucuchishcangui.

⁸Cambaj samaita fucujpimi, yacuca mundunashcashna tucurca. Ninanda rinajuj yacucunapash, shujlla mundunshnami tucurca. Manllanayai ucu ucupi tiaj yacucunapash, chaupi cuchapi shinlliyashpami, casilla tucushpa jarcarirca.

⁹Fiñaj runaca, cashnami nijurca: ‘Paicunata catishpami, prezu japisha. Paicuna imata charishcacunata quichushpami chaupisha. Chaicunahuanmi ñuca almaca, ninanda cushijunga. Ñuca espadata llujchishpami, ñuca maquihuan tucuchisha’ nijurcami.

¹⁰Cambaj huairahuan fucujpimi, mama cuchaca paicunata pambarca. Llasha llasha plomoshnami, ashtaca ashtaca yacucunapi huashajunajurca.

¹¹Mandaj Dioslla, dios puracunamandaca canshna shuj Diosca, ¿pita tiangayari? Canshna, jucha illajpachaca, ¿pita tiangayari? Canga, jatun manllanayai juyailla ruranacunata, jatun manllarinacunata rurashcamanda, manllana Diosmi cangui.

¹²Cambaj ali lado maquita chutajpimi, alpaca paicunata langarca.

¹³Can quishpichishca cai gentecunataca, can llaquishpami pushamurcangui. Cambaj ushaihuanmi, jucha illaj cambaj llactaman pusharcangui.

¹⁴Gentecunaca, caita uyashpami chujchunajunga. Filistea llactapi causajcunataca, nanaimi japinga.

¹⁵Shinamandami, Edom llactata mandajcunaca musparinajunga. Moab llactapaj ninan shinlli runacunatapash, manllaimanda chujchuimi japinga. Canaán llactapi tucui causajcunaca, manllarishpami imatapash na rurai ushanajunga.

¹⁶Paicunapaj jahuapica chujchuipash, manllaipash shamuchun. Jatun ushaita charij cambaj maquita ricushpaca, rumishna upa tucuchun. Mandaj Dioslla, cambaj cai quishpichishca gentecuna yalingacaman, chashna cachun.

¹⁷Paicunataca can pushashpami, can carashca urcupi tarpunshna churapangui. Mandaj Dioslla, can alichishca can causajuj pushtupi chashna churapangui. Mandaj Dioslla, cambajlla cachun cambaj maquihuan shinllita shayachishca huasipi chashna churapangui.

¹⁸Mandaj Diosmi, causaita causaicaman tucui causaipi mandajungalla” nishpami candanajurca.

¹⁹Faraonga, caballopi tiarishcami, paipaj carretacunandi, caballocunapi tiarishca paipaj gentecunandi, mama cuchaman yaicurca. Mandaj Diosca, mama cucha yacutaca, paicunapaj jahuapimi tigrachirca. Ashtahuangarin israelcunaca, cucha chaquishca chaupitami yalinajurca.

²⁰Shinallata Aaronbaj pani, profeta Mariaca, shuj panderota japishpami, huactai callarirca. Tucuilla huarmicunapashmi, panderota huactashpa danzashpa, Mariata catishpa llujshinajurca.

²¹Shinallata Mariaca, cashna nishpami candajurca: “Mandaj Diostaca, ninambacha jatun cashcamanda candaichi. Paimi, caballocunatapash, caballopi tiarishca soldadocunatapash, mama cuchapi pambarca” nijurcami.

²²Israelcunata Puca Cuchamanda llujshichun Moisés mandajpimi, Shur nishca jichushca pambaman llujshirca. Quimsa punllatami, yacuta na tari ushashpa, jichushca pambapi purinajurca.

²³Chai jipaca, Mara nishca pambamanmi chayarca. Chaiman chayashpaca, chai Mara nishca pambapi tiaj yacuca jayaj cajpimi chai yacutaca, na ufiai ushanajurca. Chaimandami, Mara nishpa shutichinajurca.

²⁴Shina cashcamandami, israelcunaca: “¿Imatata ufiana canchi?” nishpa, Moisestaca fiñashpa nalicachinajurca.

²⁵Chaimandami Moisesca, Mandaj Diosta caparishpa mañajpi, Mandaj Diosca shuj yurata ricuchirca. Chai yurata yacupi shitajpimi, yacuca mishquiyarca. Chaipimi, pactachinajuchun cushca shimicunatapash, mandashca shimicunatapash paicunaman curca. Chaipillatami paicunataca cazujta, na cazujtapash ricujurca.

²⁶Chaipica, cashnami nijurca: “Canda Mandaj Taita Dios rimashcataca, aligutapacha uyashpa, paipaj ñaupajpipash aligutalla rurashpa causangui. Pai mandashcacunatapash ali uyashpa, pactachinajuchun pai cushcacunatapash tucuita cazungui. Shina causajujpica, Egipto llactapi causajcunaman cachamushca ung:uicunataca, imatallapash na cachamushachu. Ñucami, cambaj ung:uita alichij Mandaj Dios cani” nijurcami.

²⁷Chai jipaca, chunga ishcai pugyu yacucuna, canchis chunga palmera quirucuna tiaj Elim shuti pushtumanmi chayarca. Chaipimi yacu ladocunapi, carpacunata shayachishpa tianajurca.