Read Imbabura Highland Quichua ÉXODO 16 Bible Online

ÉXODO 16 - Imbabura Highland Quichua bible

ÉXODO 16

¹Tandanajushca israelcuna, Elim shuti pueblomanda llujshishpaca, Sin nishca jichushca pambamanmi shamurca. Chai pambaca, Elim pueblopaj, Sinaí shuti urcupaj chaupipimi. Egipto llactamanda llujshishca punllamandaca, quilla chunga picha punllapimi chaiman chayarca.

²Chai jichushca pambapica, tucuilla tandanajushca israelcunami Moisestapash, Aarondapash fiñashpa nalicachinajurca.

³Israelcunaca, paicunataca cashnami ninajurca: —Egipto llactapillata, Mandaj Diospaj maquipi huañushpami ali canchiman carca. Chaipica, aicha mangacunahuanmi tiarinajun carcanchi. Tandatapash, na ushangacamanmi micunajun carcanchi. Cai tucui ashtaca gentecunataca, yarjaimanda huañuchingapajmi, cai juchishca pambaman llujchimushcanguichi— ninajurcami.

⁴Shina ninajujpimi Mandaj Diosca, Moisestaca cashna nirca: —Ricui ñucami, jahua pachamanda tandata tamiachimusha. Chaitaca gentecuna llujshishpami, shuj punlla micui pactanatalla pallanajunga. Ñuca mandashcata cazujta, na cazujtapash, ñuca yachachunmi chashna ruranajunga.

⁵Ashtahuangarin sucta punllapica, shuj punlla micungapaj japij cashcamandapash, caya punlla micungapaj chaupita yalishpa pallanajuchun— nircami.

⁶Shina nijpimi Moisespash, Aaronbash, tucuilla israelcunataca cashna ninajurca: —Mandaj Dios cangunata Egipto llactamanda llujchishcataca, chishimanmi yachanguichi.

⁷Caya tutamandami, Mandaj Diostaca punchapamba cajta ricunguichi. Mandaj Diosca, paita fiñashpa canguna nalicachinajujtami uyashca. Canguna ñucanchita fiñashpa nalicachinajuchunga ñucanchica, ¿imata canchiyari?— ninajurcami.

⁸Moisesca cashnatapash nircarami: —Mandaj Diosca, chishimanmi aichata micuchun cangunaman caranga. Tutamandapica, tandatami na ushangacaman micuchun caranga. Mandaj Diosca, paita fiñashpa canguna nalicachishcatami uyashca. Ñucanchica, ¿imata canchiyari? Canguna ñucanchita fiñashpa nalicachishpa rimanajushpaca, Mandaj Diostami fiñashpa nalicachishcanguichi— nircami.

⁹Chai jipami Moisesca, Aarondaca cashna nirca: —Tucuilla tandanajushca israelcunata, cashna ni: ‘Mandaj Diospaj ñaupajman quimirichi. Paica, canguna fiñashpa nalicachinajujtaca uyashcami’ ni— nircami.

¹⁰Tandanajushca tucuilla israelcunaman Aarón villajujpillatami, jichushca pambata ricunajurca. Shina ricunajujpimi, Mandaj Diospaj punchapambaguca fuyupi ñapash ricurirca.

¹¹Chashna ricurishpami Mandaj Diosca, Moisestaca cashna nirca:

¹²—Ñucami, israelcuna fiñashpa nalicachinajujta uyarcani. Chaimanda, paicunaman cashna nishpa villangui: ‘Chishica aichatami micunguichi. Tutamandaca, tandatami na ushangacaman micunguichi. Shinamandami ñucataca, cangunata Mandaj Taita Dios cajta yachanguichi’ nishpa villangui— nircami.

¹³Chai chishillatami, codorniz nishca alasyu animalcuna vichai shamushpa, carpacunata quilparca. Tutamandapica jamzi tamiami, carpa muyundicunapi urmamujurca.

¹⁴Jamzi tamia shutumujushca jarcarijpica, ñapashmi jichushca pambapica shuj uchilla, jamzi, yuraj casashnalla ricurirca.

¹⁵Chaita israelcuna ricushpaca, ima cajta na yachashpami, caishuj chaishuj: “¿Caica imata?” ninajurca. Shina ninajujpimi Moisesca, cashna nirca: —Canguna micuchun, Mandaj Dios carashca tandami.

¹⁶Caitaca, Mandaj Diosmi cashna mandarca: ‘Chaitaca, tucuicunallata canguna micui ushanatalla pallaichi. Mashna puracuna tiashpapash, shujpajllami ishcai kilo yalita pallana canguichi. Carpapi tiajcunamambash, tucuicunamanllatami pallana canguichi’ nishpami mandarca— nircami.

¹⁷Shina nijpimi israelcunaca, chashnallata ruranajurca. Shujcunaca ashtacata, shujcunaca ashatallami pallanajurca.

¹⁸Chai tandachishcata ishcai kilo yalita medijpica, llashajta pallaj runapajpash, ashatalla pallaj runapajpash chashnallatami carca. Tucuicunallatami micungapaj pactanatalla tandachinajurca.

¹⁹Moisesca, paicunataca cashnami nirca: —Chai tandataca, cayapaca pipash na puchuchinachu canguichi— nircami.

²⁰Ashtahuangarin paicunaca, Moisestaca na cazushpami, paicuna puramanda huaquingunaca cayandi punllapajpash puchuchinajurca. Chai puchushcapica, jurushpami ashnayajurca. Shinamandami Moisesca, paicunahuanga ninanda fiñarirca.

²¹Chai tandataca, tucui tutamandami mashnata micui ushanatalla, tucuicunallata tandachinajurca. Tandachijpi puchushcataca, indi rupajyachishpami yacuyachirca.

²²Sucta punllapica, chaupi yalitami shujpajlla, chuscu kilo chaupita pallanajurca. Chaitaca, israelcunata tucui mandajcunami, Moisespajman shamushpa villanajurca.

²³Shina villajpimi paicunataca, Moisesca cashna nijurca: —Mandaj Diosca, cashnami nirca: ‘Cayapaca, Diospajlla shicanyachishca samana punllami. Mandaj Diosmanlla shicanyachishca samana punllami. Cusana tiajpica, cunanda cusaichilla. Yanuna cashpapash, cunanllata yanuichilla. Canguna micujpi tucui puchushcataca, cayapaj saquichilla’ nircami— nijurcami.

²⁴Shina nijpimi paicunaca, Moisés mandashcashnallata cayapajpash alichinajurca. Chaica juruitapash na jururcachu, ashnayaitapash na ashnayarcachu.

²⁵Shinamandami Moisesca, cashna nirca: —Chaitaca cunan micuichilla. Cunan punllami, Mandaj Diospaj samana punlla. Cunanga, pambapica imallapash na tariringachu.

²⁶Sucta punllatami, micunataca tandachina canguichi. Ashtahuangarin canchis punllapica, samana punllami. Chai punllapica, imapash na tiangachu— nircami.

²⁷Chaipica cashnami tucurca: Canchis punllapi huaquinguna pallangapaj llujshishpaca, imatapash na tarinajurcachu.

²⁸Shina cajpimi Mandaj Diosca, Moisestaca cashna nijurca: —¿Ima punllacamanda ñuca mandashcacunatapash, ñuca mandashca shimicunatapash, na cazungapaj munanguichi?

²⁹Samana punllata, Mandaj Dios cushcata ricuichi. Chaimandami sucta punllapica, ishcai punllapaj pactana tandata caramun. Maipi tianajunguichi, chaipillata tucuicuna casi tiaichi. Canchis punllapica, tianajuj pushtumandaca, pipash na llujshinachu canguichi— nijurcami.

³⁰Chashnami israelcunaca, canchis punllapica samanajurca.

³¹Israelcunaca, chai tandataca, Maná nishpami shutichinajurca. Chaica, yuraj culantropaj muyushnalla, balun mishquihuan ñutu ñutu tandagushnalla, mishqui mishquigumi carca.

³²Moisesca cashnami nirca: —Mandaj Diosca, caitami cashna mandarca: ‘Ishcai kilo yalita jundachishpa, cangunapaj miraicunaman alichichi. Egipto llactamanda cangunata ñuca llujchimushpa, jichushca pambapi cangunaman carashca tandata ricunajuchun, chashna tandachichi’ nishpami mandarca— nircami.

³³Moisesca, Aarondaca cashnami nirca: —Shuj funduta japishpa chaipica, ishcai kilo yali maná shuti tandata churai. Chaitaca, cangunapaj miraicunamambash alichiriajuchun, Mandaj Diospaj ñaupajpi churai— nircami.

³⁴Shina nijpimi Aaronga, imashna causanata yachachishcata alichishca tiajuj arca ñaupajpi tandata alichingapaj, Mandaj Dios imashna Moisesman mandashcashnallata churarca.

³⁵Shinami israelcunaca, paicuna causana llactaman chayangacaman, chuscu chunga huatacaman, maná shuti tandata micunajurca. Maná shuti tandataca, Canaán llacta linderocunaman chayangacamanmi micunajurca.

³⁶(Shuj efa nishcamanda chungacaman chaupishpa pezashcami, shuj gomer nishca tucun).