Read Imbabura Highland Quichua ÉXODO 17 Bible Online

ÉXODO 17 - Imbabura Highland Quichua bible

ÉXODO 17

¹Tucuilla tandanajushca israelcunami, Sin nishca jichushca pambamanda llujshishpa, Mandaj Dios mandashcashnallata, asha asha rinajurca. Chaimanda rishpaca, Refidim shuti pambaman chayashpami, carpacunata chaipi shayachishpa tianajurca. Chaipica gentecuna ufiachunga, yacupash na tiarcachu.

²Chaimandami israelcunaca, Moisesta ninanda fiñashpa: —Ñucanchi ufiachun, yacuta carayari— ninajurca. Shina ninajujpimi Moisesca, paicunata cashna nirca: —¿Ima nishpata ñucataca, ninanda fiñanguichi? ¿Imashpata Mandaj Diostaca, imatapash rurachun munashpa fiñachinguichi?— nircami.

³Shinami israelcunaca, chaipica ninanda yacunayachishpa, Moisestaca nalicachishpa cashna ninajurca: —¿Imapajta ñucanchitaca, Egiptomanda llujchimurcangui? ¿Ñucanchipash, ñucanchi huahuacunapash, ñucanchi animalcunapash yacunayachishpa huañuchunllari pushamurcangui?— ninanjurcami.

⁴Shinamandami Moisesca, Mandaj Diosta caparishpa, cashna nishpa mañajurca: —Cai gentecunahuanga, ¿imatata rurashayari? Jipamangarin rumicunahuanmi huañuchihuanga— nijurcami.

⁵Shina mañajujpimi Mandaj Diosca, Moisestaca cashna nirca: —Israelcunapaj ñaupajman yalishpa, israelcunata mandaj rucucunata pushai. Shinallata jatun yacuta huactashca cambaj vara caspitapash apashpa ri.

⁶Ricui, ñucaca Horeb shuti urcuman canda ñaupashpa rishpami, jatun rumi jahuapi shuyajusha. Chaipimi, chai jatun rumita can huactajpi, chai rumimandaca yacu llujshinga. Chai yacutami, gentecunaca ufianga— nircami. Shina nijpimi Moisesca, israelcunata mandaj rucucunapaj ñaupajpi, chashnallata rurarca.

⁷Chai jipaca, chai pambataca Masah nishpapash, Meriba nishpapashmi shutichirca. Israelcunaca, paicunapura fiñanajushpa rimanajushcamanda: “¿Mandaj Diosca ñucanchi chaupipichu, nachu ñucanchi chaupipi?” nishpa, Mandaj Diostaca imatapash rurachun munashpa fiñachishcamandami, chashna shutichirca.

⁸Chai jipami, amalecitacuna shamushpa Refidim shuti pambapi israelcunahuan macanajurca.

⁹Shinamandami Moisesca, Josuetaca cashna nirca: —Israel runacunata agllashpa, amalecitacunahuan macanajungapaj llujshi. Cayami ñucaca, Taita Diospaj vara caspita chaririaj, urcu pundapi shuyasha— nircami.

¹⁰Shina nijpimi Josueca, Moisés mandashcashnallata amalecitacunahuan macanajujurca. Moisespash, Aaronbash, Hur shuti runapashmi, urcu pundaman vichai rirca.

¹¹Chaipica cashnami tucurca: Moisespaj maquita vichai chutajpica, israelcunami mishanajurca. Ashtahuangarin Moisespaj maquita urai churajpica, amalecitacunami mishanajurca.

¹²Moisespaj maqui shaijujpimi, shuj rumita japishpa, pai tiarichun paipaj ucu ladopi churanajurca. Chai rumi jahuapi tiarijpimi Aaronhuan, Hur shuti runahuanga, ishcandi maquita huandushpa charinajurca. Shujca shuj lado maquita, caishujca chaishuj lado maquitami charinajurca. Chashnami Moisesca, paipaj maquita shinlli vichai chutashpa, indi huashajungacaman tiajurca.

¹³Josueca, amalecitacunataca paicunapaj soldadocunandimi, espadahuan huañuchishpa tucuchijurca.

¹⁴Mandaj Diosca, Moisestaca cashnami nirca: —Caitaca yarina cachun, shuj libropi escribi: ‘Amalecitacunataca, cai pachapi ama ashtahuan yarinajuchunmi, tucuillata tucuchisha’ ninmi nishpa, Josueman villangui— nircami.

¹⁵Shina nijpimi, Moisesca shuj altarta rurashpa, chai altartaca: “Mandaj Diosmi, ñuca bandera” nishpa shutichirca.

¹⁶Moisesca, cashnatapash nircarami: “Mandaj Dios mandashpa tiajujta, amalecitacuna fiñashpa jatarishcamandaca, Mandaj Diosmi amalecitacunapaj mirai miraicunahuan macanajunga” nircami.