Read Imbabura Highland Quichua ÉXODO 2 Bible Online

ÉXODO 2 - Imbabura Highland Quichua bible

ÉXODO 2

¹Leví shuti runapaj familia puramanda shuj jarimi, Levipaj mirai puramandallata shuj ushita cazararca.

²Chai huarmi vijsayu tucushpami, shuj jari huahuaguta ungurca. Chai huahuagutaca, juyaillagu cajta ricushpami, paitaca quimsa quillacaman pacashpa charirca.

³Chaimanda ashtahuan yalishpa pacaita na ushashpami, sucusta rurashca canastata japishpa, asfalto nishca, brea nishcahuan javirca. Chai canastapi churashpami huahuataca, sucus viñashca yacu manñapi churarca.

⁴Shina churashpami, chai huahuagupaj shuj panica, huahuagu ima tucujtapash ricungapaj carumanda chapajurca.

⁵Faraonbaj ushica, jatun yacupi armangapajmi urai rirca. Chaipi cajpimi, paita cuidaj cuitsacunapash, jatun yacu manñapi purinajurca. Chaipimi paica, sucusta rurashca canastataca, sucus ucupi tiajujta ricurca. Shina ricushpami, paita servij shuj cuitsataca, canastata japichun cacharca.

⁶Chai canastata pascashpaca, shuj huahuagutami ricurca. Chaipica, chai huahuagu huacajujtami ricurca. Chai huahuaguta llaquishpami: —Cai huahuaguca, hebreocunapajmi— nijurca.

⁷Shina nijujpimi, chai huahuagupaj panica, Faraonbaj ushitaca cashna nirca: —Cai huahuaguta canman viñachishpa cuchun, hebreapura shuj huarmita cayagrishachu?— nircami.

⁸Shina nijpimi, Faraonbaj ushica: —Ripailla— nirca. Shina nijpimi, jarihuan nara tacarishca cuitsagu rishpaca, chai huahuapaj mamata pushamurca.

⁹Paitami, Faraonbaj ushica cashna nirca: —Cai huahuata apashpa, ñucaman viñachipai. Viñachishcamandaca culquita cushami— nircami. Shina nijpimi chai huarmica, huahuata japishpa pai viñachirca.

¹⁰Chai huahua ña viñajpica, Faraonbaj ushipajmanmi apamurca. Faraonbaj ushica, paipaj quiquin churitashnami rurarca. Paica: —Cai huahuataca, yacumandami llujchircani— nishpami, Moisés shutita shutichirca.

¹¹Chai punllacunapimi, cashna tucurca: Moisesca ña jatun cashpami, paipaj huauquicunata ricungapaj llujshirca. Paicunataca, ninan shinlli ruranacunahuan cajtami ricujurca. Shinallata paipaj huauqui puracunamanda hebreopura shuj runata, Egipto llactamanda shuj runa macajujtapashmi ricurca.

¹²Shinamandami, paica caita chaita ricushpa, pipash na ricurijpica, Egipto llacta runataca huañuchishpa, t'iyu alpahuan quilpashpa saquirca.

¹³Cati punllapash llujshishpami, ishcai hebreo runacuna ninandapacha fiñanajushpa macanajunajujta ricurca. Chaita ricushpami, ashtahuan yalishpa macajuj runataca: —¿Imashpata cambaj cumbatallata macajungui?— nirca.

¹⁴Shina nijpimi chai runaca, cashna nishpa tigrachirca: —¿Pita candaca, ñucanchita mandajpash, ñucanchi juezpash cachun churarcayari? ¿Canga, Egipto llacta runata huañuchishcashnallata, ñucatapash huañuchishallami yanguichu?— nircami. Shina nijpimi, Moisesca: “Ñuca huañuchishcataca, yachashcami cashca” yashpa, ninanda manllarirca.

¹⁵Chashna tucushcata Faraón uyashpami, Moisesta huañuchingapaj munarca. Ashtahuangarin Moisesca, Faraonbaj ñaupajmanda pacajushpami, Madián llactapi causagrirca.

¹⁶Yacuta llujchingapaj allashca jatun utuju ladopi pai tiajujpimi, Madián shuti llactamanda curapaj canchis ushicunaca, yacuta vishishpa pilón rumipi jundachishpa, paicunapaj taitapaj llamacunaman yacuta carangapaj shamunajurca.

¹⁷Ashtahuangarin llamata michij runacuna shamushpami, chaimanda calpachinajurca. Shinamandami Moisesca jatarishpa, chai cuitsacunata mitsashpa, paicunapaj llamacunaman yacuta cararca.

¹⁸Chai cuitsacuna paipaj taita Reuelpajman tigrajpimi, taitaca: —¿Imashpata cunanga, ñapash shamunguichi?— nirca.

¹⁹Shina nijpimi paicunaca, cashna nishpa tigrachinajurca: —Llama michij runacuna ñucanchi llamacunata calpachinajujpimi, Egipto llactamanda shuj runagu mitsarca. Shinallata yacutapash vishishpami, ñucanchi llamacunaman carca— ninajurcami.

²⁰Shina nijpimi paipaj ushicunataca, cashna nirca: —¿Chai runaguca maipitayari? ¿Chai runagutaca, imashpata saquishpa shamurcanguichiyari? Micuchun cayamuichi— nircami.

²¹Moisesca, chai taitapaj huasipi causangapajmi, ari nishpa quedarca. Paica, Séfora shuti paipaj ushitami, Moisespaj huarmi cachun curca.

²²Moisespaj huarmica, shuj jari huahuagutami ungurca. Chai huahuagutaca: “Shuj llactamanda shamushpami, shujcunapaj llactapi causajuni” nishpami, Gersón shutita shutichirca.

²³Ña tauca punllacuna yalishca jipaca, cashnami tucurca: Egipto llactata jatun mandajpashmi huañurca. Israelcunaca, gañan tucushpa causashpami, aij nishpa caparinajurca. Paicuna gañan tucushpa causashcamandami, paicunapaj caparinajushcapash, Taita Diospajman vichai chayarca.

²⁴Taita Diosca, paicuna aij ninajujta uyashpami Abrahamman, Isaacman, Jacoboman ari nishcata yarirca.

²⁵Taita Diosca, israelcunataca ricujurcami. Shinamandami Taita Diosca, paicunata ayudangapaj yarijurca.