Read Imbabura Highland Quichua ÉXODO 21 Bible Online

ÉXODO 21 - Imbabura Highland Quichua bible

ÉXODO 21

¹Cai mandashcacunatami, israelcunaman villana cangui:

²“Hebreopura runata, canda servichun can randijpica, sucta huatatallami servishpa causanga. Ashtahuangarin canchis huatapica, imatapash na cushpami llujshinga.

³Pailla yaicumushca cashpaca, paillami llujshinga. Huarmindi yaicushca cashpaca, paipash paipaj huarmipashmi llujshinga.

⁴Paipaj amo, paiman huarmita cushca cajpi, chai huarmica cusaman churicunata, ushicunata ungushca cajpica, huarmipash paipaj huahuacunapashmi, paipaj amopajpi quedanga. Servij runaca, paillami llujshinga.

⁵Servij runaca: ‘Ñuca amota, ñuca huarmita, ñuca huahuacunatapash juyanimi, na saquishpa llujshishachu’ nijpica,

⁶paipaj amoca, paitaca juezcunapajmanmi pushanga. Chai jipaca, paitaca pungu ladopi, na cashpaca pilar ladopi shayachishpami paipaj amoca, rinrita utujuna jirruhuan rinrita utujunga. Shina rurajpimi, huañungacaman paita servishpa causanga.

⁷Pipash paipaj ushita, servij cachun jatujpica, chai jatui tucushca ushica, caishuj servij jaricunashnaca na llujshingallachu.

⁸Chai amopaj ñaupajpi nali ricurishca cajpi, paipaj huarmi cachun na japishpaca, chai cuitsataca paipaj familiacuna, culquita cushpa llujchishpa apachun, chai amoca saquichunlla. Paita na munashpapash, na rijsishca gentecunamanga na jatui ushangachu.

⁹Ashtahuangarin paipaj churihuan cazarachishca cashpaca chai amoca, paipaj ushitashnami charinga.

¹⁰Churiman shuj huarmita japishpa cazarachijpipash chai churica, punda huarmimambash micunata, churajunataca chashnallatami cushpa charinga. Shinallata cazarashca huarmihuan imashna causanashnallatami, aliguta causanga.

¹¹Cai quimsa mandashcacunata maijandapash na rurajpica chai huarmica, ima culquitapash na cushpa, yanga llujshingallami.

¹²Maijan cashpapash, maijandapash chugrichishpa huañuchishpaca, paipashmi huañuchi tucunga.

¹³Ashtahuangarin chugrichishpa huañuchinataca na yashca purijujpita, Taita Diosllata paipaj maquipi churajpimi huañuchinga. Chashna tucujpica, ñucami pai maiman rishpa pacajugrinatapash ricuchisha.

¹⁴Shina cajpipash maijan cashpapash, cumba runaguta fiñashpa huañuchishapachami yashpa purijushpallata huañuchijpica, ñuca altarmanda anchuchishpami huañuchinga.

¹⁵Maijan cashpapash paipaj taitata, paipaj mamata macashpa chugrichishpaca, paipashmi huañuchi tucunga.

¹⁶Shinallata maijan cashpapash shuj genteta shuhuashpa jatushca cajpi, na cashpaca nara jatushca pai charijushcata tarijpipash, chai shuhuaca huañuchi tucungami.

¹⁷Shinallata maijan cashpapash paipaj taitata, paipaj mamata, ima llaquipash japishpaca alimi canman nishpaca, huañuchi tucungami.

¹⁸Shinallata maijangunapash fiñanajushpa shuj runaca, paipaj cumba runaguta rumihuan cashpa, na cashpaca maquihuan huactashpa chugrichijpipash, chai runaca na huañushpami, camapi sirijunga.

¹⁹Shina cashpapash, cutin jatarishpa tauna caspihuan purijujpica, chugrichij runaca na huañuchi tucungachu. Camapi sirijushpa, imatapash na rurai ushashcamandallami culquita cunga. Shinallata paillatami jambichinga.

²⁰Maijan cashpapash paita servij jarita, na cashpaca paita servij huarmita cashpapash, caspihuan huactashpa chugrichijpi, paipaj maquipi huañujpica, llaquichi tucungami.

²¹Ashtahuangarin shuj punllata, na cashpaca ishcai punllata causajushpa huañujpica, paipaj servijllata cashcamanda, na llaquichi tucungachu.

²²Maijan runacunapash macanajunajushpa vijsayu huarmita chugrichijpi, huahuata urmachishpapash chai huarmica na huañungachu. Shina cajpipash chai macanajuj runacunaca, chai huarmipaj cusa mashna culquita cuchun nishcashnallata, juezcunapash mandashcashnallatami llaquichi tucunajunga.

²³Ashtahuangarin huañushca cajpica, paicunatapashmi huañuchina canguichi.

²⁴Ñavita llujchijpica, ñavitallatami llujchina. Quiruta llujchijpica, quirutallatami llujchina. Maquita faquijpica, maquitallatami faquina. Chaquita faquijpica, chaquitallatami faquina.

²⁵Rupachijpipash, randimi rupachina. Chugrichijpipash, randimi chugrichina. Huactajpipash, randimi huactana.

²⁶Maijan cashpapash paita servij jaripaj, na cashpaca paita servij huarmipaj ñavita chugrichishpa, ñavita huaglichishpaca, ñavita huaglichishcamandami cacharishpa cachanga.

²⁷Shinallata paita servij jarita cashpa, na cashpaca paita servij huarmita cashpapash, quiruta llujchishpaca, paipaj quiruta llujchishcamandami cacharishpa cachanga.

²⁸Jarita cashpapash, huarmita cashpapash, shuj huagra tupajpi huañujpica, chai huagrataca rumicunahuanmi huañuchinga. Chai aichataca, na micunachu. Ashtahuangarin huagra dueñotaca, na imatapash rurangachu.

²⁹Shina cashpapash, pundamandallata tupanata yachaj cajpi, huagra dueñoman villashca cajpipash, chai huagrataca na huatashcangachu. Shina na huatajpi, jarita cashpa, huarmita cashpapash huañuchijpica, huagrataca rumicunahuanmi huañuchinga. Shinallata huagra dueñopashmi huañuchi tucunga.

³⁰Huagra dueño runaca, paipaj huagra huañuchishcamanda, paita ama huañuchingapaj mashna culquita cuhuai nijpica, mashnata mañashcatami cunga.

³¹Churita, na cashpaca ushita tupashpa huañuchishca cajpica, cai mandashcata catishpami, huagra dueñotaca llaquichinga.

³²Shuj servij jarita, servij huarmita cashpapash, huagra tupashpa huañuchijpica, huagra dueño runami, quimsa patsaj chuscu chunga ishcai gramota pezaj culquita cunga. Huagrataca, rumicunahuanmi huañuchinga.

³³Maijan cashpapash, yacuta llujchina jatun utujuta, na cashpaca yacuta tandachina jatun utujutami allashca canga. Chai utujuta na quilpajpi chaipica huagra cashpa, na cashpaca burro cashpapash urmajpica,

³⁴utujuta allachishca runami, chai animalmanda mashnata cuchun nijpipash cunga. Huañushca animaltaca, paimi japinga.

³⁵Maijambaj huagra cashpapash, paipaj cumba runagupaj huagrata tupashpa huañuchijpica, huañuchij huagrata jatushpami, chai huagra jatushca culquitaca chaupiringa. Shinallata huañushca huagratapashmi chaupiringa.

³⁶Ashtahuangarin pundamandallata chai huagra tupanata yachajpipash, chai huagra dueñoca, na huatashca cangachu. Shina cajpi huagrata huañuchijpica, huañushca huagra dueñomanmi, shuj causaj huagrata cunga. Huañushca huagrataca, huañuchij huagra dueñomi japinga.