Read Imbabura Highland Quichua ÉXODO 23 Bible Online

ÉXODO 23 - Imbabura Highland Quichua bible

ÉXODO 23

¹Napash shina cashcataca, ama shujcunaman villanguichu. Ama ñucata na manllaj runahuan tandanajushpa, pitapash llullashpa villanguichu.

²Ashtacacunahuan nalita rurangapaca, ama catinguichu. Juezcunaman villajushpaca, ama shujcunata manllaimandalla, cambash llullashpa llaquipi churanguichu.

³Imagutapash na charij runagu paipaj llaquita alichijuchun shamujpica, ama ñavita ricushpalla llaquichinguichu.

⁴Canda fiñaj runapaj huagrata tarishpa, na cashpaca burro chingashcata tarishpaca, tigrachingapaj apangui.

⁵Canda millanayachij runapaj burro, quipihuan llapi tucushca sirijujta ricushpaca, ¿na ayudashpa saquinguimanllu? Ashtahuangarin ayudashpa jatarichinami cangui.

⁶Cambaj llacta purallata mañashpa purij runagu llaquita charijpipash, pai japina cashcataca na shujman tigrachinachu cangui.

⁷Llulla shimimandaca, anchurinami cangui. Ima nalitapash na rurajta, imatapash cashcatapacha rurajtaca, na huañuchinachu cangui. Ñucata na manllaj runataca, ñucaca ima nalitapash na ruraj runatashnaca na ricushachu.

⁸Imatapash carajpica, na japinallachu cangui. Chai carashcacunaca, ñavita ñausayachinshna saquinllami. Imatapash cashcatapacha ruraj runagutapash, alita ruranataca shujman tigrachishpa rimanllami.

⁹Shuj llactamanda runagutaca, na ninanda llaquichinachu cangui. Shuj llactamanda shamushpa causajcunapaj shungupi imashna yarijtaca cangunallata yachanguichimi. Egipto llactapica, cangunapash shuj llactamanda rishcami causarcanguichi.

¹⁰Cambaj alpapica, sucta huatacaman tarpushpa, grano fucushcata cozechangui.

¹¹Ashtahuangarin canchis huatapica, imagutapash na charij cambaj llacta puracunallata micuchun yanga saquingui. Chai puchushcataca, urcu animalcunami micunga. Chashnallatami cambaj uvas chagrahuambash, olivos chagrahuambash rurana cangui.

¹²Sucta punllata trabajangui. Canchis punllapica samangui. Cambaj huagrapash, burropash samachunmi chashna samana cangui. Shinallata canda servij huarmipaj churipash, shuj llactamanda shamushpa causajuj runapash, ushaita cutin japichunmi chashna samana cangui.

¹³Cangunaman ñuca tucui ima nishcata pactachinguichi. Shuj dioscunapaj shutitaca, na parlanachu canguichi. Cangunapaj shimimandaca, chashna parloca uyaritapash ama uyarichun.

¹⁴Huatapica, quimsacaman ñucaman jatun fiestata ruranguichi.

¹⁵Levadura illaj tandata micui punllatapash pactachingui. Levadura illaj tandataca, Abib shuti quillapi canchis punllacaman, ñuca imashna canman mandashcashnallata micungui. Chai quillapimi, Egiptomandaca llujshimurcangui. Shina cashcamanda ñuca ñaupajpica, pipash na chushaj maquihuan ricurimungachu.

¹⁶Shinallata pambapi can tarpushcamanda punda fucushca granocunata cozechana fiesta punllatapash rurangui. Huata tucuripipash, pambapi can tarpushca granocunata tandachijushpapash, fiestata rurangui.

¹⁷Tucuilla jaricunami, Mandaj Jatun Diospaj ñaupajman, huatapi quimsacaman shamunga.

¹⁸Ñucaman cushpa huañuchishca animalpaj yahuartaca, levadurahuan rurashca tandahuanga, na caranachu cangui. Shinallata ñucaman carashpa huañuchishca animalpaj virapash, cayapaca na puchungachu.

¹⁹Cambaj alpapi punda fucushca granocunataca, canda Mandaj Taita Diospaj huasimanra punda apamungui. Huahua chivo aichagutaca, ama paipaj mamapaj lechepillata yanunguichu.

²⁰Ricui, ñucami cangunata ñaupashpa ñambi cuidashpa pushamuchun, ñuca Angelta cachamuni. Paimi cangunataca, tucui ñambi cuidashpa, ñuca alichishca llactaman pushamunga.

²¹Paipaj ñaupajpi ali cazushpa, pai ima nijtapash uyanguichi. Paita na cazujcunaca, na canachu canguichi. Canguna na cazushcataca, paica na cungangachu, ñuca shutica paihuanmi.

²²Ashtahuangarin pai ima nishcatapacha uyashpa, ñuca tucui ima nishcata rurajpica, cangunata fiñajcunataca ñucapashmi fiñasha. Shinallata cangunata ninanda llaquichijcunataca, ninandami llaquichisha.

²³Ñuca Angelca, canda ñaupashpa rishpami amorreo, heteo, ferezeo, cananeo, heveo, jebuseo nishca gentecunapaj llactaman pushanga. Paicunata tucuchijuchunmi mandasha.

²⁴Paicunapaj dioscunataca, na cungurinachu cangui. Servitapash, na servinachu cangui. Paicuna nalicunata ruranajunshnapash, na ruranachu cangui. Ashtahuangarin tucuillatami tucuchina cangui. Paicunapaj dioscunataca, tucuillatami faquina cangui.

²⁵Ashtahuangarin cangunata Mandaj Taita Dios ñucatalla servinguichi. Ñucami, cangunapaj tandatapash, yacutapash bendiciasha. Ñucami, cangunapaj chaupimanda tucui ung:uita anchuchisha.

²⁶Huahuata vijsayu cashpa urmachij huarmipash, huahuata tarinata na yachaj huarmipash, cangunapaj llactapica na tiangachu. Ñucami, mashna punllacunacaman can causana punllacunataca pactachisha.

²⁷Ñucami, jatun manllaita canda ñaupachishpa cachasha. Shina cachashpami, can maiman yaicujpipash chaipi causaj tucui gentecunata tucuchisha. Canda tucui fiñajcunataca, tigrashpa calpachunmi saquisha.

²⁸Heveo, cananeo, heteo nishca gentecunata cambaj ñaupajmanda llujchishpa cachachunmi, millai balun chuspicunata canda ñaupachishpa cachasha.

²⁹Paicunataca, na shuj huatapilla cambaj ñaupajmanda llujchishpa cachashachu. Jichushca pamballa tucujpi, urcu animalcuna jundashpa cangunata ama llaquichinajuchunmi, na chashna rurasha.

³⁰Cambaj huahuacuna mirashpa, chai llactata cambaj cachun japingacamanmi, paicunataca cambaj ñaupajmanda asha asha llujchishpa cachasha.

³¹Cambaj llacta linderocunataca, Puca Cuchamandapacha filisteocunapaj mama cuchacaman, jichushca pambamandaca, Eufrates jatun yacucaman cachunmi churasha. Cai llactapi causajcunataca, cambaj maquipi churajpimi, paicunataca cambaj ñaupajmanda llujchishpa cachangui.

³²Paicunahuanga, imatapash na ari ninachu cangui. Paicunapaj dioscunahuambash, na ari ninachu cangui.

³³Paicunaca, cambaj llactapica na causangachu. Chaipi causashpaca, paicunapaj dioscunata servichishpara ñucata fiñashpa, juchata rurachinman. Shina rurashpaca, nitijachinshna canda urmachingapajllami canga” nijurcami.