Read Imbabura Highland Quichua ÉXODO 24 Bible Online

ÉXODO 24 - Imbabura Highland Quichua bible

ÉXODO 24

¹Mandaj Diosca, Moisestaca cashnami nirca: —Cambash, Aarón, Nadab, Abiú shuti runacunapash, israelcunata mandaj rucu puramanda canchis chunga rucucunapash, Mandaj Dios ñuca ñaupajman vichai shamuichi. Chaipica, carumandallata urai cumuringuichi.

²Shina cajpipash Moisesllami, Mandaj Dios ñucapajman quimirimungui. Paicunaca na quimirimungachu. Israelcunapash, canhuanga na vichai shamungachu— nircami.

³Moisés shamushpaca, Mandaj Dios tucui ima nishca shimicunata, tucui mandashcacunatapashmi israelcunaman villajurca. Shina villajujpimi, tucui gentecuna shujllashnalla tucushpa: —Mandaj Dios rimashca tucui shimicunataca, rurapashunllami— nishpa tigrachinajurca.

⁴Moisesca, Mandaj Dios tucui ima nishca shimicunata escribishpami, tutamandata jatarishpa, urcu chaqui uraman shuj altarta rurarca. Shinallata chunga ishcai Israel aillucuna imashna tiashcashnallatami, chunga ishcai rumicunata shayachirca.

⁵Shina rurashpaca, Israel puramanda chairalla viñaicunatami cacharca. Paicunami, Diosman animalcunata cushpa tucuillata rupachinajurca. Shinallata Mandaj Dioshuan ali cangapajpash, shicucunata cushpami huañuchinajurca.

⁶Moisesca, chai yahuartaca chaupita japishpami, jatun tastacunapi churarca. Caishuj chaupitaca, altar jahuapimi tsirapachijurca.

⁷Shinallata Dioshuan ari ninajushpa escribishca librota japishpami, israelcuna uyajta leyirca. Shina leyijpimi paicunaca, cashna ninajurca: —Ñucanchica, Mandaj Dios tucui ima nishcata cazushpa rurapashunllami— ninajurcami.

⁸Chai jipami Moisesca, yahuarta japishpa israelcunapaj jahuapi tsirapachishpa, cashna nirca: —Ricuichi, tucui caicunata rurangapaj, Mandaj Dios cangunahuan ari ninajushcata ricuchij yahuarmi— nircami.

⁹Chai jipaca Moisespash, Aaronbash, Nadadpash, Abiupash, israelcunata mandaj rucu puracunamanda canchis chunga rucucunapashmi vichai rinajurca.

¹⁰Shina rishpaca, israelcunapaj Taita Diostami ricunajurca. Paipaj chaqui ucupica, alpapi zafiro nishca rumicunata mandashcashnami carca. Tutamanda casajujpi, jahua pachapi punchapamba ricurijunshnami carca.

¹¹Ashtahuangarin Diosca paipaj maquitaca, israelcunata mandajcunapaj jahuapi chutashpa, na llaquichircachu. Shinamandami, Taita Diosta ricushpapash micunajurca, ufianajurca.

¹²Chai jipami Mandaj Diosca, Moisesta cashna nirca: —Ñucapajman, urcuman vichai shamushpa, chaipi shuyangui. Chaipimi, tabla rumicunatapash, mandashca shimicunatapash, israelcunata yachachingapaj mandashpa ñuca escribishcatapash cusha— nircami.

¹³Shina nijpimi Moisesca, paita servij Josuendi jatarirca. Shina jatarishpami Moisesca, Taita Diospaj urcuman vichai rirca.

¹⁴Mandaj rucucunataca, cashnami nirca: —Cangunapajman ñucanchi tigramungacaman, caipillata shuyanajuichilla. Ricuichi Aaronbash, Hur shuti runapash cangunahuanmi. Maijan cashpapash llaquita charishpaca, paicunapajman ringuichilla— nircami.

¹⁵Shina nishpa urcuman Moisés vichai rijpimi, urcutaca fuyu quilparca.

¹⁶Mandaj Diospaj punchapambaguca, Sinaí shuti urcupimi tiajurca. Fuyuca, urcutaca sucta punllacamanmi quilpariajurca. Canchis punlla tucujpica, chai fuyu chaupimandami Moisesta cayarca.

¹⁷Mandaj Diospaj punchapambaguca, urcu pundapica nina pillurishpa rupajunshnami, israelcunapaj ñavipica ricurijurca.

¹⁸Moisesca, fuyu chaupiman yaicushpami, urcuman vichai rirca. Moisesca, urcupimi chuscu chunga punllata, chuscu chunga tutata tiajurca.