Read Imbabura Highland Quichua ÉXODO 25 Bible Online

ÉXODO 25 - Imbabura Highland Quichua bible

ÉXODO 25

¹Mandaj Diosca, Moisestaca cashnami nijurca:

²“Israelcunataca, cashna ningui: ‘Ñucaman imatalla carashcacunata japipaichi. Tucui jaricuna, paicunapaj tucui shungu munashpapacha ñucaman carashcacunata japipaichi.

³Chai carashcacunata japinacunaca, caicunami canga: Orota, culquita, cobreta,

⁴azul, morado, yana puca puchacunata, ashtahuan juyailla lino puchata, chivo milmata,

⁵jari llama caracunata pucata tenishpa, tejón nishca animalpaj caracunata, acacia caspita,

⁶michata japichingapaj aceiteta, talishpa javina aceiteta, mishquillagu ashnajuj inciensota rurana yacuta,

⁷ónice nishca rumicunatapash, efod nishcapi, pectoral nishcapi muyundi churana rumigucunatapash japinguichi.

⁸Ñucapajlla shuj huasi tiachumbash ruranguichi. Chaipimi, paicunapaj chaupipi causasha.

⁹Jatun carpata ruranata, ñuca ricuchishcashnallata tucui ima minishtishcacunata ruranata, ñuca ricuchishcashnallata chashnatapacha ruranguichi.

¹⁰Shinallata acacia caspi arcatapashmi ruranajunga. Chai arcataca, shuj metro chunga centímetro largota, sucta chunga canchis centímetro anchota ruranajunga. Shinallata sucta chunga canchis centímetro jatundami ruranajunga.

¹¹Chai arcataca ucumambash, canllamambash, ashtahuan ali orohuan quilpangui. Chai jahua manñataca, orohuan muyundi juyaillaguta rurangui.

¹²Chaipi churangapaca, orota yacuyachishca, chuscu oro argollacunata rurangui. Chai argollacunataca, chuscundi esquinapi ishcaitaca shuj ladoman, shuj ishcaitaca caishuj ladoman churangui.

¹³Acacia caspi varacunata rurashpaca, orohuan jahualla quilpangui.

¹⁴Chai vara caspicunataca, chaicunahuan arcata huandushpa apangapaj, arcapaj ishcandi ladopi churashca argollacunapi churachingui.

¹⁵Chai vara caspicunaca, chai arcapaj argollacunapimi quedanga. Chaimandaca na anchuchinachu.

¹⁶Imashna causanata yachachishcataca, canmanmi cusha. Chaitaca, chai arcapi churangui.

¹⁷Arcapaj tapataca, ashtahuan ali orota rurangui. Shuj metro chunga centímetro largota, sucta chunga picha centímetro anchota rurangui.

¹⁸Shinallata ishcai querubín nishcacunatapash, orotallata rurangui. Chaicunataca, tapa jahua ishcandi manñacunapi, martillohuan aliguta labrashpa rurangui.

¹⁹Shuj querubindaca, caishuj manñapi, caishuj querubindaca caishuj manñapi rurangui. Chaicunataca, ishcandi manñapi tapahuanllata shujllata rurangui.

²⁰Querubingunaca, alascunata jahualla pascashcami, paicunapaj alascunahuan arca tapata quilpanajunga. Querubingunapaj ñavicunaca, caishujhuan chaishujhuan chimba purami, chai tapata ricunajunga. Querubingunapaj ñavicunahuanmi, chashna ricunajurca.

²¹Shina rurashpaca tapataca, arca jahuapi churangui. Imashna causanata yachachishcataca, canmanmi cusha. Chaitaca, chai arcapi churangui.

²²Chaipimi canman villasha. Chai tapa jahuamandami, imashna causanata ñuca yachachishcacuna tiajuj arca tapapi tianajuj ishcai querubingunapaj chaupimanda canhuan rimasha. Israelcunaman mandana tucui shimicunatami, canman mandasha.

²³Shinallata shuj mezatapash, acacia caspita rurangui. Chai mezataca, iscun chunga centímetro largota, chuscu chunga picha centímetro anchota rurangui. Shinallata sucta chunga canchis centímetro jatunda rurangui.

²⁴Chai mezataca, ashtahuan ali orohuan jahualla quilpangui. Shinallata chai meza manña muyunditaca, orohuan juyaillaguta rurangui.

²⁵Chai manñatapash, shuj canchis centímetro anchota jarcashpa, asha llujshirishcata muyundi rurangui. Chai jarcashca manña muyunditapash, orohuan juyaillaguta rurangui.

²⁶Chai mezapica, chuscu oro argollacunata rurangui. Chai argollacunataca, mezapaj chuscundi chaqui esquinapi, chaquita churashca chuscundi esquinapi churangui.

²⁷Argollacunaca, meza manñata jarcashpa rurashca ucu ladomanmi tianajunga. Chai argollacunaca, vara caspicunata churachishpa, mezata huandushpa apangapajmi chashna tianajunga.

²⁸Vara caspicunataca, acacia caspita rurashpa, chai varatapash orohuan jahualla quilpangui. Chai varacunahuanmi, mezataca apanajunga.

²⁹Shinallata vishishpa talingapaj platocunatapash, cucharacunatapash, copacunatapash, jatun tastacunatapash rurangui. Chaicunataca, ashtahuan ali orohuan rurangui.

³⁰Chai mezapimi, ñucaman shicanyachishca tandataca, ñuca ñaupajpi punllandi churangui.

³¹Shinallata candelerotapash, ashtahuan ali orota rurangui. Chai candeleroca, martillohuan tacashpa labrashcami canga. Candelero chaquitapash, chaquimanda vichai yalishca troncotapash, copacunatapash manzanacunatapash, sisacunatapash, chaipillata chashnatallata rurashcami canga.

³²Candeleropaj troncomandaca, sucta maquimi llujshinga. Caishuj ladomambash quimsa maqui, chaishuj ladomambash quimsa maquimi llujshinga.

³³Shuj maquipica, almendro sisatashnalla rurashca, quimsa copata, shujlla manzanata, shujlla sisatami rurashca canga. Caishuj maquipipash, almendro sisatashnallata rurashca, quimsa copata, shujlla fangata, shujlla sisatami rurashca canga. Candeleromanda llujshishca sucta maquipica, chashnallata rurashcami canga.

³⁴Tucuita charijuj chaupi troncopica, almendro sisatashnalla rurashca, chuscu copatapash, paipaj fangacunatapash, paipaj sisacunatapash rurashcami canga.

³⁵Ishcai maquipaj ucu ladopica, shuj manzanatami chaipillata rurashca canga. Caishuj ishcai maquipaj ucu ladopipash, shuj manzanatami chaipillata rurashca canga. Chaishuj ishcai maquipaj ucu ladopipash, shuj manzanatami chaipillata rurashca canga. Chashnami, candelero troncomanda llujshijuj sucta maquipaj rurashca canga.

³⁶Chai candeleropaj manzanacunapash, maquicunapash, shujllata rurashcami canga. Tucui chaicunaca, ashtahuan ali orota martillohuan tacashpa labrashcami canga.

³⁷Shinallata chai candeleropica, canchis uchilla lamparacunatapash rurangui. Chaicunataca, ñaupa ladoman punchayachijuchunmi michata japichina cangui.

³⁸Shinallata micha rupashca pavizacunata anchuchinacunatapash, chai uchufata churana platillocunatapash, ashtahuan ali orota rurangui.

³⁹Chai candelerotaca, chaipi tucui charinacunandi, quimsa chunga chuscu kilota pezaj ashtahuan ali orota rurangui.

⁴⁰Chaicunataca, imashna ruranata urcupi canman ricuchishcashnallata ali ricushpa rurangui.