Read Imbabura Highland Quichua ÉXODO 27 Bible Online

ÉXODO 27 - Imbabura Highland Quichua bible

ÉXODO 27

¹Shinallata shuj altartapash, acacia caspita rurangui. Chai altartaca, ishcai metro ishcai chunga picha centímetro largota, ishcai metro ishcai chunga picha centímetro anchota rurangui. Shinallata shuj metro quimsa chunga picha centímetro jatunda rurangui. Chai altarca, cuadradomi canga.

²Altarpaj chuscundi esquinapica, cachucunata rurangui. Cachucunaca, altarmandallata rurashcami canga. Altartaca, broncehuan jahualla quilpangui.

³Chai altarmanda uchufata tandachingapajpash, mangacunata rurangui. Palacunatapash, jatun tastacunatapash, garfio nishca jirrucunatapash, ninayashca carbongunata churanacunatapash rurangui. Chai tucui ima charinacunataca, bronceta rurangui.

⁴Shuj bronce rejatapash, linllita rurashcatashnalla rurangui. Chai rejilla jahuapipash, chuscu bronce argollacunata, chuscundi esquinapi rurangui.

⁵Chai rejillataca, altar ucuman churangui. Chai rejillami, altar chaupipi ucuman tiajunga.

⁶Shinallata altarpaca, acacia caspi varacunatapash rurangui. Chai caspicunataca, broncehuanmi jahualla quilpana cangui.

⁷Chai vara caspicunataca, argollacunapimi churachishca canga. Vara caspicunaca, altarta apangapajmi, altarpaj ishcandi ladoman churachishca canga.

⁸Chai altarca, tablacunahuan rurashca chushaj cajonmi canga. Chaitaca, urcupi imashna ñuca ricuchishcashnallata rurangui.

⁹Shinallata jatun carpapaj patiotapash rurangui. Ura lado chaupi patioca, lino pucha caupushcahuan rurashca cortinacunatami charinga. Chai cortinacunaca, shuj ladopajlla chuscu chunga picha metro jatunmi canga.

¹⁰Chai cortinacunata huarcuna ishcai chunga pilarpash, chai pilarcunapajllata ishcai chunga bazapash, bronceta rurashcacunami canga. Pilar jahuacunapi churashca capitel nishcacunapash, chaipillata asha llujshirishcacunata rurashcapash, culquita rurashcami canga.

¹¹Chashnallatami jahua ladoman cortinapash, chuscu chunga picha metro jatun canga. Chai cortinacunata huarcuna ishcai chunga pilarpash, chai pilarcunapaj ishcai chunga bazapash, bronceta rurashcacunami canga. Pilar jahuacunapi churashca capitelcunapash, chaipillata asha llujshirishcacunata rurashcapash, culquita rurashcami canga.

¹²Indi huashajuj ladoman, patio anchopash ishcai chunga ishcai metro chaupi metro cortinatami charinga. Cortinacunata huarcuna chunga pilartapash, pilarcunapaj chunga bazatapashmi charinga.

¹³Indi llujshimuj ladoman patiopash, ishcai chunga ishcai metro chaupi anchomi canga.

¹⁴Yaicunapi shuj lado cortinaca, sucta metro canchis chunga picha centimetromi canga. Cortinacunata huarcuna quimsa pilartapash, pilarcunapaj quimsa bazatapashmi charinga.

¹⁵Caishuj lado cortinacunapash, sucta metro canchis chunga picha centimetrotami charinga. Cortinacunata huarcuna quimsa pilartapash, pilarcunapaj quimsa bazatapashmi charinga.

¹⁶Patioman yaicuna pungupipash, iscun metrota charij shujlla cortinami tianga. Chai cortinaca azul, morado, yana pucata caupushca lino puchacunahuan bordashpa juyaillaguta rurashcami canga. Cortinacunata huarcuna chuscu pilartapash, pilarcunapaj chuscu bazatapashmi charinga.

¹⁷Patio manñata muyushca tucuilla pilarcunaca, culquita pilluchishcacunami canga. Pilarcunapaj capitelcunapash culquita rurashcami canga. Pilarcunapaj bazacunapash, broncemi canga.

¹⁸Patioca, chuscu chunga metro jatunmi canga. Shuj ladoman anchoca, ishcai chunga ishcai metro chaupimi canga. Caishuj ladoman anchopash, ishcai chunga ishcai metro chaupillatami canga. Altopaca, ishcai metro ishcai chunga picha centimetromi canga. Patiota jarcana cortinacunaca, lino puchata caupushpa rurashcami canga. Bazacunapash, bronceta rurashcami canga.

¹⁹Jatun carpapi tucui imatalla rurangapaj ima charinacunapash, jatun carpapaj tucuilla estacacunapash, patio estacacunapash, bronceta rurashcacunami canga.

²⁰Israelcunataca, michacunata japichijpi punchayachijuchun, olivosta tacashpa llujchishca ashtahuan ali aceiteta cambajman apamuchun mandangui. Lamparacunapi churashpa japichijpi rupajushpalla punchayachijuchunmi, apamuchun mandana cangui.

²¹Lamparacunataca, ñucahuan tuparina jatun carpapimi churanga. Imashna causanata ñuca yachachishca shimicunata alichishca arca ñaupajpi jarcashca cortina canlla ladomanmi Aaronbash, paipaj churicunapash aliguta churanajunga. Chishimanda callarishpa, cayandi tutamandacaman, Mandaj Dios ñuca ñaupajpi rupajuchunmi, chashna churanajunga. Caica, israelcunapaj miraicunapash, paicunapaj tucui causaipi pactachinajuchun ñuca cushca shimicunami.