Read Imbabura Highland Quichua ÉXODO 29 Bible Online

ÉXODO 29 - Imbabura Highland Quichua bible

ÉXODO 29

¹Ñucapajlla curacuna cachun paicunata shicanyachingapaca, caitami rurana cangui: Huarmi huagracunamanda shuj shicuta, imapash na tucushca ishcai jari llamata japingui.

²Shinallata levadura illaj tandacunatapash, aceitehuan masashpa levadura illajta rurashca mishqui tandacunatapash, levadura illajta rurashpa aceiteta jahualla javishca jamzi tortillacunatapash japingui. Chaicunataca, ashtahuan ali trigo jacuhuanmi rurana cangui.

³Chaicunataca, shuj uchilla canastapi churangui. Chai canastapi churashpami shicundi, ishcai jari llamandi apamuna cangui.

⁴Aarondapash, paipaj churicunatapash, ñucahuan tuparina jatun carpa punguman pushashpa armachingui.

⁵Chai jipaca, churajunacunata japishpa Aarondaca, túnica nishca jahualla churajunata, efod nishcahuan jahualla churajunata, efodtapash, pectoral nishcatapash churachingui. Shinallata efodpillata tiajuj cintahuan chumbilichingui.

⁶Mitra nishcatapash, paipaj umapi churachingui. Chai mitra jahuapica, ñucapajlla shicanyachishca diadema nishcata churachingui.

⁷Chai jipaca, talishpa javina aceiteta japishpa, Aaronbaj umapi talishpa javingui.

⁸Paipaj churicunatapash quimirimuchun mandashpa, túnica nishca jahualla churajunacunata churachingui.

⁹Aarondapash, paipaj churicunatapash, cintahuan chumbilichingui. Umapi churajuna tiara nishcatapash churachingui. Chashna rurajpimi, tucui causaicaman curacuna canata charinga. Chashnami Aarondapash, paipaj churicunatapash shicanyachingui.

¹⁰Chai jipaca, ñucahuan tuparina jatun carpa ñaupajman shicuta apangui. Chaipica Aaronbash, paipaj churicunapashmi, paicunapaj maquita shicupaj umapi churanga.

¹¹Shicutaca, Mandaj Dios ñuca ñaupajpi, ñucahuan tuparina jatun carpa pungupi huañuchingui.

¹²Shicupaj yahuarta japishpa, altar cachucunapi cambaj dedohuan javingui. Puchushca tucuilla yahuartaca, altar chaquipi talingui.

¹³Shinallata chunllulicunata quilpashca tucuilla viratapash, yana shungu jahuapi tiaj viratapash, ishcandi riñondapash, chai riñongunapaj jahuapi tiaj viratapash llujchishpa, altarpi rupachingui.

¹⁴Ashtahuangarin shicu aichataca, paipaj caratapash, huanutapash carpacunamanda canllaman llujshishpa rupachingui. Chai shicuca, juchamanda cushcami.

¹⁵Shinallata jari llamacunamanda shuj jari llamata japingui. Chai jari llamapaj umapica Aaronbash, paipaj churicunapashmi, paicunapaj maquita churanga.

¹⁶Jari llamata huañuchishpami, chai yahuarhuanga altar jahua muyundipi tsirapachingui.

¹⁷Chai jari llamapaj aichataca, asha asha fitingui. Llamapaj chunllulicunata, changacunataca maillashpa, asha asha fitishca aichacunapaj jahuapi, llamapaj uma jahuapi churangui.

¹⁸Shina churashpaca, chai jari llamataca, altarpi tucuillata rupachingui. Chaica, Mandaj Dios ñucapaj mishquillagu ashnajuchun tucuillata rupachishpa cushcami. Chaica, Mandaj Diosman cushpa rupachishcami.

¹⁹Chai jipaca, shuj jari llamata japingui. Chai llamapaj umapica, Aaronbash, paipaj churicunapashmi, paicunapaj maquita churanga.

²⁰Chai llamata huañuchishpa chai yahuarta japishpami, Aaronbaj ali lado rinri pundapi, paipaj churicunapaj rinri pundapi javina cangui. Shinallata paicunapaj ali lado maqui mama dedopi, paicunapaj ali lado chaqui mama dedopipashmi javina cangui. Shinallata chai yahuartaca, altar jahua muyundipi tsirapachingui.

²¹Altar jahuapi tiajuj yahuarhuan talishpa javina aceitehuanga, Aaronbipash, paipaj churajunacunabipash, paipaj churicunabipash, churicunapaj churajunacunapipash jahualla tsirapachingui. Chashna rurajpimi Aaronbash, paipaj churajunacunapash, paipaj churicunapash, churicunapaj churajunacunapash, ñucapajta rurachun shicanyachishca canga.

²²Chai jipaca, jari llamapaj virata, chupata, chunllulicunata quilpashca virata, yana shungumanda virata, ishcandi riñongunata, chai riñongunapaj jahuapi tiaj virata, ali lado rigratapash japingui. Chai jari llamaca, ñucapajlla cachun shicanyachishcami.

²³Shinallata jatunda rurashca mishqui tandatapash, aceitehuan rurashca mishqui tandatapash apamungui. Shinallata Mandaj Dios ñucaman cushca levadura illaj tandacuna tianajuj uchilla canastamanda, shuj jamzi tortillatapash japishpa apamungui.

²⁴Chaitaca Aaronbaj, paipaj churicunapaj maquipi tucuillata churangui. Shina churajpimi, Mandaj Dios ñuca ñaupajpi vichai cuyuchishpa cushcashnallata, vichai cuyuchishpa cunga.

²⁵Chai jipaca, paicunapaj maquimanda japishpa, Mandaj Dios ñucapaj mishquillagu ashnajuchun, tucuillata rupachina animalpaj jahuapi churashpa, altarpi rupachingui. Chaica, Mandaj Dios ñucaman carashpa rupachishcami.

²⁶Ñucapajta rurachun Aaronda shicanyachingapaj cushca, jari llamapaj pecho aichatapash japingui. Chaitapash, Mandaj Diospaj ñaupajpi vichai cuyuchishpa cunashnallata cungui. Chai aichaca, cambajmi canga.

²⁷Vichai cuyuchishpa cushca pecho aichatapash, vichai ricuchishpa cushca rigra aichatapash shicanyachingui. Aarondapash, paipaj churicunatapash, ñucapajta rurachun shicanyachijushpa, vichai cuyuchishpa, vichai ricuchishpa cushca jari llamapaj aichatami shicanyachingui.

²⁸Aaronbash, paipaj churicunapash, paicunapaj tucui causaipi pactachinajuchun israelcunaman cushca shimicunami canga. Chaica, ñucaman vichai ricuchishpa cushcamandami, chashna canga. Israelcuna ñucahuan ali cangapaj animalta cushpa huañuchishcamanda japishpa, vichai cuyuchishpa ñucaman cushcami canga. Paicunaman carashcata, Mandaj Dios ñucaman vichai cuyuchishpa cushcami canga.

²⁹Aaronbaj churajunacunata ñucapajlla cachun shicanyachishcapash, paipaj jipaca paipaj churicunapajmi canga. Chai churajunacunata churajushpa, aceiteta talishpa javi tucungapaj, chaicunata churajushpa ñucapajlla shicanyachi tucungapajmi canga.

³⁰Paipaj churicunamanda maijan cashpapash, paipaj randi cura cashpa, ñucahuan tuparina jatun carpaman, ñucapajlla huasipi servingapaj shamushpaca, canchis punllacamanmi chai churajunacunataca churajunga.

³¹Ñucapajlla cachun shicanyachishpa cushca jari llamata japishpa, ñucapajlla shicanyachishca pushtupi yanungui.

³²Jari llamapaj aichataca, Aarondi, paipaj churicunandimi, uchilla canastapi tiajuj tandahuan micunajunga. Chaitaca, ñucahuan tuparina jatun carpa pungupimi micunajunga.

³³Chai aichacunataca, ñucapajlla curacuna cangapaj, paicunapaj juchamanda cushca cajpimi, chashna micunajunga. Ashtahuangarin chai aichacunataca, ñucapajlla shicanyachishca cajpimi, na rijsishca runaca na micunga.

³⁴Ñucapajlla shicanyachishca huaquin aichapash, huaquin tandapash, cayandi punllapaj puchujpica, ninapimi rupachina cangui. Chaicunataca, ñucapajlla shicanyachishca cajpimi na micuna.

³⁵Chashnami Aarondapash, paipaj churicunatapash, tucuita ñuca mandashcashnallata rurana cangui. Canchis punllatami, paicunataca shicanyachina cangui.

³⁶Juchata anchuchijuchun juchamanda cushpa huañuchina shicutaca, punllandi cungui. Paipaj juchamanda animalta cushpaca, altartaca ñucapajlla cachun rurangui. Chai jipaca, ñucapajlla cachun shicanyachingapaj, aceiteta talishpa javingui.

³⁷Altar mapayashcamandaca, canchis punllacaman animalta cushpa rupachishpami, ñucapajlla cachun rurana cangui. Shina rurajpimi, ñucapajlla shicanyachishca altar tucunga. Chai altarpi ima tacarishcapash, ñucapajlla shicanyachishcami tucunga.

³⁸Caicunatami, altarpi rupachina cangui: Shuj huatata charij ishcai llamatami, punllandi cushpa rupachijunalla cangui.

³⁹Shuj maltun llamataca tutamanda, caishuj maltun llamataca, chishimi rupachina cangui.

⁴⁰Cada llamahuanmi, olivoscunata tacashpa llujchishca shuj litro chaupi aceitehuan masashpa, ishcai kilo yali ashtahuan ali jacuta cuna cangui. Talina vinotapash, shuj litro chaupitami cuna cangui.

⁴¹Shuj maltun llamataca, ña chishipimi imashna tutamanda cushpa rupachishcashnallata, imashna vinota talishcashnallata, mishquillagu ashnajuchun rupachina cangui. Chaica, Mandaj Dios ñucaman cushpa rupachishcami canga.

⁴²Punllandi animalta cushpa tucuillata rupachinaca, cangunapaj miraicunapajpash, Mandaj Dios ñuca ñaupajpi, ñucahuan tuparina jatun carpa pungupi pactachinami canga. Chai jatun carpa ñaupajpimi, cangunahuan parlangapaj chaipi tandanajusha.

⁴³Chaipimi ñucaca, israelcunahuan tandanajusha. Chai pushtuca, ñuca punchapambahuanmi ñucapajlla tucunga.

⁴⁴Ñucahuan tuparina jatun carpatapash, altartapash ñucapajlla cachunmi rurasha. Shinallata Aarondapash, paipaj churicunatapash, ñucapajlla curacuna cachunmi rurasha.

⁴⁵Israelcunapaj chaupipi causajushpami, paicunapaj Taita Dios casha.

⁴⁶Shina cajpimi paicunapaj chaupipi causangapaj, Egipto llactamanda llujchimuj, paicunata Mandaj Taita Dios cajta rijsinajunga. Ñucami, paicunata Mandaj Taita Dios cani.