Read Imbabura Highland Quichua ÉXODO 30 Bible Online

ÉXODO 30 - Imbabura Highland Quichua bible

ÉXODO 30

¹Shinallata inciensota cushnichingapaj, shuj altartapash rurangui. Chaitaca, acacia caspita rurangui.

²Chai altarca, chuscu chunga picha centímetro largota, chuscu chunga picha centímetro anchota rurashca, cuadrado altarmi canga. Shinallata iscun chunga centímetro jatunmi canga. Chai altarpaj cachucunaca, chai altarpillata rurashcami canga.

³Chai altartaca jahuatapash, tucui muyundi ladotapash, cachucunatapash, ashtahuan ali orohuan jahualla quilpangui. Chai altar muyundi manñapica, orohuan juyaillaguta rurashpa muyuchingui.

⁴Chai altar manña muyundipi juyaillaguta rurashca ucu ladopica, chai altarpaj ishcandi lado esquinapi, ishcai oro argollatapash rurangui. Chai argollacunapi vara caspicunata churachishpa altarta apangapajmi, chashna rurana cangui.

⁵Acacia caspi varacunata rurashpa, orohuan jahualla quilpangui.

⁶Chai altartaca, imashna causanata ñuca yachachishca shimicunata alichina arca ladopi huarcuriajuj jatun tela ñaupajpi churangui. Chai telaca, imashna causanata ñuca yachachishca shimicunata alichishca arcata quilpashca ladopimi tiajun. Chaipimi canhuan tuparisha.

⁷Aaronga chai altarpimi, mishquillagu ashnajuj inciensota cushnichijunga. Tucui tutamandacuna lamparacunata can alichishca jipami, chashna cushnichijunga.

⁸Lamparacunapi michata Aarón japichijpimi, inciensotaca cushnichijunga. Chashna ruranaca, cangunapaj miraicunapash, Mandaj Dios ñuca ñaupajpi, imashna rurachun mandashcashnallata, tucui causaipi rurachun mandashcami.

⁹Chai altarpica, na rijsishca yanga inciensotaca, na cushnichinachu canguichi. Shinallata tucuillata rupachina animaltapash, ashtahuan imatalla cushcatapash, na rupachinachu canguichi. Chai altarpica, vinotallapash na talinachu canguichi.

¹⁰Chai altarpaj cachu jahuacunapimi Aaronga, juchamanda cushpa huañuchishca animalpaj yahuarhuan, huatapi shuj viajetalla javinga. Juchata anchuchijuchunmi, chashna javinga. Huatapi shujtallami, cangunapaj miraicunapaj juchamanda chai cachu jahuapi javinga. Chai altarca, ñucapajlla shicanyachishcami canga’ ningui” nijurcami.

¹¹Cashnatapashmi Mandaj Diosca, Moisesman cashna nishpa villajurca:

¹²“Israelcunata can cuentajpica, paicuna imashna cuentai tucushcashnallatami, tucuicuna paicunapaj causaimanda Mandaj Dios ñucaman culquita cunajunga. Paicunata cuentashcamanda ama huañui tiachunmi, chashna ruranajunga.

¹³Tucuilla cuentai tucushcacunaca, cashnami cunajunga: Jatun carpapi tiaj culquita pezashcashnallata, sucta gramotashna pezaj culquitami cunga. (Shuj siclo culquica, ishcai chunga gera nishcami). Sucta gramotashna pezaj culquitallami, ñucaman cunajunga.

¹⁴Ishcai chunga huatata charijmanda vichaiman cuentai tucushcacunaca tucuillami, Mandaj Dios ñucaman imatalla cunata cunajunga.

¹⁵Juchamanda animalta, Mandaj Dios ñucaman cujushpaca, sucta gramotashna pezaj culquimandaca charij runapash na ashtahuan mirachingachu, imagutapash na charij runapash na chaupingachu.

¹⁶Paicunapaj juchacunamanda israelcuna cushca culquita japingui. Chai culquitaca, ñucahuan tuparina jatun carpapaj servichunmi cuna cangui. Chaica, Mandaj Dios ñuca ñaupajpi israelcunata yaringapaj, cangunapaj juchata anchuchijuchun cushcami” nijurcami.

¹⁷Cashnatapashmi Mandaj Diosca, Moisesman cashna nishpa villajurca:

¹⁸“Maillangapaj shuj bronce pailatapash, chai pailata churangapaj, bronce bazatapash rurangui. Chaitaca, ñucahuan tuparina jatun carpahuan, altarhuan chaupipi churangui. Chaipica yacutapash jundachingui.

¹⁹Chai pailamanda yacuhuanmi Aaronbash, paipaj churicunapash, paicunapaj maquita, chaquita maillanajunga.

²⁰Ñucahuan tuparina jatun carpaman yaicunajushpa ama huañungapajmi, chai yacuhuan maillaringa. Ñucapajta rurangapaj altar ladoman quimirishpa, Mandaj Dios ñucaman imagutapash carashpa rupachingapajmi, chashna maillaringa.

²¹Paicuna ama huañungapajmi maquita, chaquita maillarinajunga. Chashna ruranataca paipash, paipaj mirai miraicunapash, paicunapaj tucui causaipi pactachinajuchun cushca shimicunami” nijurcami.

²²Cashnatapashmi Mandaj Diosca, Moisesman cashna nishpa villajurca:

²³“Mishquillagu ashnajuj ashtahuan ali jambicunataca, cashna japingui: Mirra nishca ashtahuan ali jambitaca, picha kilo canchis patsaj gramota japingui. Shinallata mishquillagu ashnajuj canelataca chaupitalla, ishcai kilo pusaj patsaj picha chunga gramota japingui. Mishquillagu ashnajuj cálamo nishca caspitaca, ishcai kilo pusaj patsaj picha chunga gramota japingui.

²⁴Casia nishcataca, ñucapajlla huasipi pezashcashnallata, picha kilo canchis patsaj gramota, olivos aceitetaca, sucta litro yalita japingui.

²⁵Chaicunahuanga, ñucapajlla cachun shicanyachingapaj talishpa javina aceiteta rurangui. Chaitaca, mishquillagu ashnajuj jambicunata ruranata yachajcuna rurashcashnallata, alipacha jambicunata rurangui. Chaimi, ñucapajlla cachun shicanyachingapaj talishpa javina aceite canga.

²⁶Chaihuanmi, ñucahuan tuparina jatun carpatapash, imashna causanata ñuca yachachishca shimicunata alichina arcatapash javingui.

²⁷Mezatapash, chaipi imalla tianacunandi, candelerotapash, chaipi imalla tianacunandi, inciensota cushnichina altartapash javingui.

²⁸Shinallata ñucaman cushca animalta tucuillata rupachina altarta, chaipi imalla tianacunandi, jatun pailatapash, chai pailata churana bazatapash, chai aceitehuan javingui.

²⁹Chashna ñucapajlla cachun shicanyachijpimi, ima cashpapash ñucapajlla canga. Chaicunapi tucui ima tacarishcapash, ñucapajlla shicanyachishcami tucunga.

³⁰Aarondapash, paipaj churicunatapash aceiteta talishpa javingui. Paicunataca, ñucapaj curacuna cachunmi, chashna shicanyachina cangui.

³¹Chai jipaca, israelcunataca cashna ningui: ‘Caimi, cangunapaj miraicunapajpash, ñucapaj cachun shicanyachingapaj talishpa javina aceite canga.

³²Yangalla runapaj cuerpopica, na talinachu canguichi. Chai aceiteta rurashcashnallata, shuj aceitetapash napacha ruranachu canguichi. Chai aceiteca, ñucapajlla shicanyachishcami. Cangunaca chai aceitetaca, ñucapajlla cachun shicanyachishcami yashpa charinguichi.

³³Maijan cashpapash, cai jambitashnalla rurashpa, na rijsishca runata, chai jambihuan javishpaca, Israel puracunamandaca anchuchi tucungami’ ningui” nijurcami.

³⁴Mandaj Diosca, Moisestaca cashnatapashmi nirca: “Mishquillagu ashnajuj jambicunata rurana yacuta, estacte nishca jambita, sillushnalla ricurijuj jambita, mishquillagu ashnajuj gálbano nishca jambita, ashtahuan ali inciensotapash, chashnatallata pezashpa japingui.

³⁵Chaicunamandaca, mishquillagu ashnajuj jambicunata ruranata yachajcuna rurashcashnallata, mishquillagu ashnajuj inciensota rurangui. Ñucapajlla cachun ali chapushpa, mishquillagu ashnajujtapacha rurangui.

³⁶Chaicunamanda shuj ashataca, ñutu ñutu tucungacaman cutangui. Chaitaca, imashna causanata ñuca yachachishca shimicunata alichishca arca ñaupajpi, ñucahuan tuparina jatun carpapi churangui. Chaipimi canman ricurisha. Chaica cangunapaca, ñucapajlla shicanyachishcami canga.

³⁷Caipi nijunshnallata chapushpa can rurashca cai inciensotashnaca, ashtahuan shujtaca na ruranachu canguichi. Chaica, Mandaj Dios ñucapajlla shicanyachishcami canga.

³⁸Maijan cashpapash, cai inciensotashna shuj inciensota mishquillagu ashnachingapaj rurashpaca, Israel puracunamandaca anchuchi tucungapachami” nircami.