Read Imbabura Highland Quichua ÉXODO 31 Bible Online

ÉXODO 31 - Imbabura Highland Quichua bible

ÉXODO 31

¹Mandaj Diosca, Moisesmanmi cashna nishpa villajurca:

²“Ricui, ñucami Judá aillu puramanda Uri shuti runapaj churi Bezaleel shuti runataca, paipaj shutipi cayarcani. Uri shuti runaca, Hur shuti runapaj churimi.

³Paitami, Taita Dios ñuca Espirituhuan junda cachun rurarcani. Alipacha yachajushca, ali yuyaita charij, ali yachajushca cachun, imacunata ruranatapash ali yachaj cachunmi, chashna rurarcani.

⁴Shinallata imacunata cashpapash, aligutapacha yarishpa orota, culquita, bronceta rurashpa, juyaillacunata rurai ushaj cachunmi, chashna rurarcani.

⁵Shinallata imacunapipash churangapaj, rumicunata juyaillaguta ruranata yachaj cachun, caspicunatapash juyaillaguta ruranata yachaj cachun, tucui imacunatapash ruranata ali yachaj cachunmi rurarcani.

⁶Ricui, ñucami Dan aillupura Ahisamac shuti runapaj churi Aholiab shuti runata, Bezaleel shuti runahuan churarcani. Shungupi ali yachaita charijcunamambash, ashtahuan alipacha yuyaitami curcani. Ñuca canda tucui imatalla mandashcata ruranajuchunmi, shina rurarcani.

⁷Ñucahuan tuparina jatun carpata, imashna causanata ñuca yachachishca shimicunata alichina arcata, chai arcata quilpana tapata, jatun carpapi tucui imalla tianacunatapashmi ruranajunga.

⁸Mezata, chai mezapi imalla tianacunatapash, mapa illaj candelerota, chaipi imalla tianacunatapash, inciensota cushnichina altartapashmi ruranajunga.

⁹Ñucaman cushca animalta tucuillata rupachina altarta, chaipi imalla tianacunatapash, jatun pailata, chai pailata churana bazatapashmi ruranajunga.

¹⁰Shinallata ñucata servingapaj churajunacunata, Aarón cura ñucapajtalla rurangapaj churajunacunata, curacuna cashpa ñucapajta rurangapaj, paipaj churicuna churajunatapashmi ruranajunga.

¹¹Talishpa javina aceiteta, ñucapajlla huasipi mishquillagu ashnajuna inciensotapash, chai tucuicunata canman imashna mandashcashnallatami ruranajunga” nijurcami.

¹²Mandaj Diosca, Moisestaca cashnatapashmi nijurca:

¹³“Canga, israelcunaman cashna nishpa villangui: ‘Cangunaca, samana ñuca punllacunataca, pactachinapachami canguichi. Chai punllacunaca ñucapajpash, cangunapajpash, cangunapaj miraicunapajpash, shuj ricuchinami canga. Ñucapajlla cachun shicanyachij Mandaj Dios cajta yachachunmi chashna canga.

¹⁴Chashna cashcamanda cangunapaca, ñucapajlla cachun shicanyachishca punlla cajpimi, samana punllataca alichina canguichi. Chai punllata maijambash yangapi churashpaca, huañungapachami. Shinamandami maijan cashpapash, chai punllapi ima ruranatapash rurashpaca chai runaca, Israel puramandaca anchuchi tucunga.

¹⁵Sucta punllata trabajangui. Ashtahuangarin canchis punllapica, Mandaj Dios ñucapajlla shicanyachishca samana punllami. Maijan cashpapash, chai samana punllapi trabajashpaca, huañungapachami.

¹⁶Israelcunaca, chai punllataca ñucahuan ari ninajushcata yarishpami, paicunapaj miraicunapash, paicunapaj tucui causaipi pactachinajunga.

¹⁷Caica ñucahuan, israelcunahuan tucui causaipi shuj ricuchina punllami. Mandaj Diosca, sucta punllapimi jahua pachatapash, cai pachatapash rurarca. Ashtahuangarin canchis punllapica, tucui imatalla ruraita tucuchishpami samarca’ nishpa villangui” nijurcami.

¹⁸Sinaí urcupi Moiseshuan rimaita tucuchishpaca, imashna causanata yachachishca shimicunata escribishca ishcai tabla rumicunatami Moisesman curca. Chaicunaca, Taita Diospaj dedohuan escribishca tabla rumicunami carca.