Read Imbabura Highland Quichua ÉXODO 33 Bible Online

ÉXODO 33 - Imbabura Highland Quichua bible

ÉXODO 33

¹Mandaj Diosca, Moisestaca cashnami nirca: —Cambash, Egipto llactamanda can llujchimushca israelcunapash, caimanda vichai richi. Abrahammambash, Isaacmambash, Jacobomambash: ‘Cai llactatami, cambaj miraicunaman carasha’ nishpa juramentushca, chai llactaman vichai richi.

²Ñucami, canda ñaupashpa richun angelta cachamusha. Shinami cananeo, amorreo, heteo, ferezeo, heveo, jebuseo nishca gentecunatapash llujchishpa cachasha.

³(Lechepash, balun mishquipash ashtacapacha tiaj llactaman richilla). Shina cajpipash, ñucaca na cangunapaj chaupipi vichai rishachu. Cangunaca, shinlliyashcapacha gentecunami canguichi. Shinamanda cangunataca, ñambira tucuchiman— nircami.

⁴Cashna llaquita israelcuna uyashpami, juyailla churajunacunataca pipash na churajushpa, yana churajunata churajushpa, ninanda llaquirinajurca.

⁵Ashtahuangarin Mandaj Diosllatami, Moisesman cashna nishca carca: —Israelcunataca cashna ni: ‘Cangunaca, shinlliyashcapacha gentecunami canguichi. Shinamandami, cungashcapi cangunapajman vichai shamushpa tucuchisha. Cunanga, cangunata ñuca imata ruranata ricungapaca, cangunapaj juyailla churajunacunata anchuchinami canguichi’ ni— nishcami carca.

⁶Shinamandami israelcunaca, Horeb shuti urcu ladopica, paicunapaj juyailla churajunacunata llujchinajurca.

⁷Chaipimi Moisesca, Diospaj jatun carpataca apashpa, israelcunapaj carpacunamanda carupi shayachirca. Chaitami: “Dioshuan Tuparina jatun Carpa” nishpa shutichirca. Maijan cashpapash Mandaj Diosta mascashpaca, carpacunamanda carupi shayachishca jatun carpamanmi llujshin carca.

⁸Chaipimi cashna tucujurca: Jatun carpaman ringapaj Moisés llujshijpica, tucuilla israelcunami jatarishpa, paicunapaj carpa pungupi shayarishpa, jatun carpaman yaicungacaman, Moisesta ricunman quedanajurca.

⁹Jatun carpaman Moisés yaicujpica, pilarshnalla shayajuj fuyu uriajumushpami, jatun carpa pungupi tiarin carca. Chaipimi Mandaj Diosca, Moiseshuan parlan carca.

¹⁰Pilarshnalla shayajuj fuyu, jatun carpa pungupi tiajujta tucui israelcuna ricushpaca, paicunapaj carpa punguman tucuicuna jatarishpami, ninanda alicachinajurca.

¹¹Maijan cashpapash, paipaj cumbahuan imashna parlanshnallatami Mandaj Diosca, Moiseshuan ñavi ñavi parlan carca. Chai jipami Moisesca, carpacunaman tigran carca. Shina cajpipash, Moisesta servij Josué huambraguca, ima horapash jatun carpa ucumandaca, na anchurinllu carca. Josueca, Nun shuti runapaj churimi carca.

¹²Moisesca, Mandaj Diostaca cashnami nirca: —Ricui, canga ñucataca: ‘Cai gentecunata llujchi’ nihuanguimi. Shina nishpapash, pita ñucahuan cachanatapash nara villahuanguichu. Shina cashpapash, canga: ‘Ñucami candaca, cambaj shutipi rijsini, ñuca ñavipipash alimi ricurishcangui’ nihuanguimi.

¹³Cunanga, cambaj ñavipi ñuca ali ricurishca cajpica, canda rijsishpa cambaj ñavipi ali ricuringapaj, cunanda cambaj ñanda ricuchihuai nipanimi. Ricui, cai gentecunaca can agllashcacunami— nircami.

¹⁴Shina nijpimi, Taita Diosca: —Ñucami canhuan risha. Candaca samachishami— nirca.

¹⁵Shina nijpimi Moisesca, cashna nishpa tigrachirca: —Can ñucahuan na rina cashpaca, ñucanchitaca ama caimanda llujchinguichu.

¹⁶¿Caipica, imata ricushpata ñucapash, can agllashca gentecunapash, cambaj ñavipi ali ricurishcataca yachanga? Ashtahuangarin can ñucanchihuan rijujta ricushpallami yachanga. Ñucapash, can agllashcacunapash, tucuilla cai pachapi causajcunamanda shicanyachishca cajpimi, chashna yachanga— nircami.

¹⁷Shina nijpimi Mandaj Diosca, Moisestaca cashna nirca: —Can caita nishcatapash rurashami. Can ñuca ñavipi ali ricurishcamanda, candaca cambaj shutipi rijsishcamandami, chaitapash rurasha— nircami.

¹⁸Shina nijpimi, Moisesca: —Can punchapamba cajta ricuchihuayari nipanimi— nirca.

¹⁹Shina nijpimi, Moisesman cashna nishpa tigrachirca: —Ñucami, cambaj ñavipica, ñucapaj tucui alita ricuchisha. Shinami, Mandaj Dios ñucapaj shutitaca, cambaj ñaupajpi villajusha. Shina cashpami, pita ñuca llaquingapaj munashpaca, llaquisha. Pihuan ñuca ali cangapaj munashpaca, alimi casha— nircami.

²⁰Ashtahuan cashnatapash nircarami: —Ñuca ñavita ricuitaca, na ushanguichu. Runaca, ñuca ñavitaca na ricungachu. Ñucata ricushpa causaitaca, na ushangachu— nircami.

²¹Mandaj Diosca, cashnatapashmi nijurca: —Ricui, ñuca ladollapimi shuj pushtu tian. Canga, chaipi tiaj jaca rumi jahuapi shuyangui.

²²Punchapamba ñuca yalijushpaca, ñucallatami candaca shuj jatun jaca rumi utujupi churasha. Shina churashpami ñuca yalingacaman candaca, ñuca maquihuan quilpasha.

²³Chai jipamanmi, ñuca maquita anchuchijpi, ñuca huashatalla ricungui. Ashtahuangarin ñuca ñavitaca, na ricunguichu— nijurcami.