Read Imbabura Highland Quichua ÉXODO 35 Bible Online

ÉXODO 35 - Imbabura Highland Quichua bible

ÉXODO 35

¹Moisesca, tandanajushca tucuilla israelcunata cayashpami, cashna nijurca: “Caicunatami, Mandaj Diosca rurachun mandashca:

²Sucta punllatami trabajana. Ashtahuangarin canchis punllapica, Mandaj Diospajlla shicanyachishca samana punllami canga. Maijan cashpapash, chai punllapi imatapash rurajushpaca huañungami.

³Samana punllapica, canguna causaj huasicunapica, ninatallapash na japichinachu canguichi” nijurcami.

⁴Moisesca, tucuilla tandanajushca israelcunamanmi, cashna nishpa villajurca: “Mandaj Diosca, caitami mandarca:

⁵Canguna puramandaca, Mandaj Diosman caranacunata japichi. Mandaj Diosman carana yuyaita shungupi charijcunaca, tucuicunami orota, culquita, bronceta apamunga.

⁶Shinallata azul, morado, yana puca puchacunata, ashtahuan ali lino puchata, chivo milmata,

⁷jari llama caracunata pucata tenishcata, tejón nishca animalpaj caracunata, acacia caspicunatami apamunga.

⁸Michata japichingapaj aceiteta, talishpa javina aceiteta, mishquillagu ashnaj inciensota rurana yacucunata,

⁹efod nishca, pectoral nishca churajunacunapi churangapaj, ónice nishca rumicunata, muyundi churana rumicunatapashmi apamunga.

¹⁰Canguna puramandaca, ali yuyaita shungupi tucui charijcuna, imata ruranatapash yachajcuna shamushpami, Mandaj Dios mandashcataca ruranajunga:

¹¹Jatun carpata, carpapaj telacunata, carpa jahuata jatanata, chai jatashcacunapi churana arocunata, chaipi churana tablacunata, jirru barracunata, pilar caspicunata, chai pilarcunapaj bazacunatami ruranga.

¹²Arcata, chai arcata huanduna vara caspicunata, arcapaj tapata, carpapaj telata,

¹³mezata, chai mezata huanduna caspicunatapash, chaipi imalla minishtirishcatapash, ñucaman shicanyachina tandacunatapashmi ruranga.

¹⁴Michata japichina candelerota, chaipi imalla minishtirishcatapash, chaipillata churana lamparacunata, michata japichingapaj aceiteta,

¹⁵inciensota rupachina altarta, chai altarta huanduna vara caspicunatapash, talishpa javina aceiteta, mishquillagu ashnajuj inciensota, jatun carpaman yaicuna pungupaj cortinatapashmi ruranga.

¹⁶Diosman animalta cushpa tucuillata rupachina altarta, altarpaj bronce rejata, chai altarta huanduna vara caspicunata, chaipi imalla minishtirishcatapash, jatun pailata, chai pailata churana bazacunatapashmi ruranga.

¹⁷Jatun carpa muyundi patiota jarcana telacunata, telacunata huarcuna pilar caspicunata, chai pilarcunata shayachina bazacunata, carpaman yaicuna patio pungupi huarcuna telatapashmi ruranga.

¹⁸jatun carpata shayachingapaj estacacunata, patiopi shayachina estacacunata, chaicunata huatana cabiacunata,

¹⁹carpa ucupi Diospajta rurashpa servingapaj churajunacunatapashmi ruranga. Chai churajunacunaca, Diospajtalla rurangapaj shicanyachishca Aarón curapaj churajunacunami canga. Shinallata paipaj churicunapash, curacuna cashpa servinajushpa churajunami canga” nijurcami.

²⁰Chai jipami, tandanajushca tucui israelcunaca, Moisespaj ñaupajmanda llujshirca.

²¹Shinallata tucui jaricunami paicunapaj shungu yarichijpi, tucui maijanman cashpapash, carana munaita paicunapaj espíritu cujpi, Mandaj Diosman caranacunahuan shamunajurca. Dioshuan tuparina jatun carpata rurangapaj, chai carpapajllata tucui imatalla ruranacunata rurangapaj, Diospajtalla rurana churajunacunata rurangapajmi chashna shamunajurca.

²²Chashnami carana munaita tucui charijcunaca jaricunapash, huarmicunapash shamunajurca. Paicunaca cadenacunata, zarcillocunata, surtijascunata, brazaletecunata, orota rurashca tucui ima juyaillacunatapashmi apashpa shamunajurca. Tucuicunami orotaca, Mandaj Diosman caranajurca.

²³Tucui runacunami azul, morado, yana puca puchacunata, ashtahuan ali lino puchata, chivo milmata, jari llama caracunata pucata tenishcata, na cashpaca tejón nishca animalpaj caracunata apamunajurca.

²⁴Culquita, bronceta tucui carajcunaca, tucuicunami Mandaj Diosman carangapaj apamunajurca. Shinallata acacia caspita tucui charijcunaca, chaicunahuan tucui imacunatalla rurashpa, Diosta servinajuchunmi chaicunata apamunajurca.

²⁵Shinallata tucui imatalla ruranata alipacha yachaj huarmicunapash, paicunapaj maquihuan puchashpami, azul, morado, yana puca puchacunata, ashtahuan ali lino puchatapash apamunajurca.

²⁶Shuj huarmicunaca ashtahuan tucuicunami, paicunapaj shungupi yarishca yachaihuan chivo milmacunata puchanajurca.

²⁷Israelcunata mandajcunaca, ónice nishca rumicunata, efod nishcapi, pectoral nishcapi muyuchishpa churana rumicunatapashmi apamunajurca.

²⁸Shinallata mishquillagu ashnajuj jambicunata, michata japichina aceiteta, talishpa javina aceiteta, mishquillagu ashnajuj inciensota rurana jambicunatapashmi apamunajurca.

²⁹Israel puramandaca, carana munaita shungupi tucui charijcunami jaricunapash, huarmicunapash, tucui imatalla rurangapaj caranacunahuan shamunajurca. Chaicunata rurachunga Mandaj Diosmi, Moisesta villachun mandarca. Paicunapaj munaihuan, Mandaj Diosman carangapajmi, chashna apamunajurca.

³⁰Moisesca, israelcunataca cashnami nijurca: “Ricuichi Mandaj Diosca, Judá aillu puramanda Uri shuti runapaj churi Bezaleel shuti runatami agllashca. Uri shuti runaca, Hur shuti runapaj churimi.

³¹Bezaleeltaca, Diospaj Espirituhuan junda cachunmi rurashca. Ali yuyaita charij, ali yachajushca, ali yachaita charij imata ruranatapash ali yachaj cachunmi rurashca.

³²Shinallata imacunatapash rurashpa callarichun orota, culquita, bronceta cashpapash, imacunatapash juyaillaguta rurachunmi, chashna rurashca.

³³Rumicunata aliguta labrashpa, manñacunapi juyaillaguta rurashpa muyungapajpash, caspimanda imatalla rurangapajpash, chaicunatallata tucui imatapash aligutapacha rurai ushachunmi, chashna churashca.

³⁴Shinallata yachachi ushachumbashmi, paipaj shungupi yuyaita churashca. Chashnami Bezaleel shuti runamambash, Dan aillupura Ahisamac shuti runapaj churi Aholiab runamambash, ali yuyaita churashca.

³⁵Paicunamanmi, shungupi ali yachaita charichun cushca carca. Tucui imatalla ruranata, shinallata chaicunatallata imatapash rurai ushashpa bordashpapash, azul, morado, yana puca puchacunahuan, ali lino puchahuan, telarpipash ahuanajuchunmi chashna rurashca.