Read Imbabura Highland Quichua ÉXODO 36 Bible Online

ÉXODO 36 - Imbabura Highland Quichua bible

ÉXODO 36

¹Chashnami Bezaleel shuti runapash, Aholiab shuti runapash, ali yachaita Mandaj Dios cujpi, chaicunata ruranajunga. Ali yachaita, ali yuyaita charij, tucui runacunapashmi chaicunata ruranajunga. Tucui chaicunata Diospaj huasipi rurashpa servichunmi, chai ali yuyaicunata cunga. Paicunami, Mandaj Dios tucui imatalla rurachun mandashcataca ruranajunga” nijurcami.

²Moisesca, Bezaleel shuti, Aholiab shuti runacunatami cayarca. Shinallata Mandaj Dios ali yuyaita cujpi, ali yachaita shungupi charij tucui runacunatapash, paicunapaj shungullata Diospaj carpata rurana yuyaita cujpi, chaita rurangapaj shamuj tucui runacunatapashmi cayarca.

³Diospaj carpata rurangapaj tucui caranacunata israelcuna apamushcataca, paicunami Moisespaj ñaupajmanda japinajurca. Chai carpata rurangapajmi, chashna japinajurca. Israelcunaca tucui tutamandacunami, caranacunataca paicunapaj munai apamushpa catinajurca.

⁴Diospajlla huasita tucui imatapash rurajcunaca, paicunapaj ruranacunata tucuicuna saquishpa shamushpami,

⁵cashna nishpa Moisesman villanajurca: “Israelcunaca, Mandaj Dios rurachun mandashcata rurangapaj minishtishcataca, yapata yalishpami apamunajun” ninajurcami.

⁶Shina villajpimi Moisesca, carpacunapi cashna nishpa villachun cacharca: “Jari cashpapash, huarmi cashpapash, Diospajlla huasipaj caranataca, maijanllapash na ashtahuan caramunachu canguichi” nichunmi cacharca. Chashnami, gentecuna carangapaj apamunataca jarcanajurca.

⁷Tucui imata rurangapajpash, ashtaca ashtacapachami tiarca. Imata rurajpipash puchurcarami.

⁸Imatalla ruraj puracunamandaca, shungupi ali yachaita charijcunami, jatun carpata ruranajurca. Chaitaca, lino puchata caupushpa rurashca chunga cortinahuan, azul, morado, yana puca puchacunahuanmi ruranajurca. Chai telacunataca, querubín nishcacunata bordashpami, juyaillaguta ruranajurca.

⁹Shujlla cortinami, chunga ishcai metro chaupi largo, ishcai metro ancho carca. Tucuilla cortinacunami, chashnatallata medishpa rurashcacuna carca.

¹⁰Picha cortinataca paipura sirashpami, caishuj picha cortinatapash, pai purallata sirarca.

¹¹Punda sirashpa tucuchishca cortina manñapica, azul puchahuan tugllashpa rurashcami carca. Shinallata jipalla sirashpa tucuchishca cortina manñapipash, chashnallata rurashcami carca.

¹²Punda sirashca cortinapica, picha chunga tugllatami rurarca. Shinallata jipalla sirashpa tucuchishca cortina manñapipashmi, picha chunga tugllata rurarca. Chai tugllacunaca, caishuj ladohuan, chaishuj ladohuan chimbapurashcami carca.

¹³Oro arotapashmi, picha chunga arota rurarca. Chai arocunahuanmi, caishuj lado cortinahuan, chaishuj lado cortinahuan chimbapurajpi, shuj jatun carpa tucurca.

¹⁴Shinallata jatun carpa jahuata quilpangapaca, chivo milmata ahuashca, chunga shuj cortinatami rurarca.

¹⁵Shujlla chai cortinami, chunga quimsa metro chaupi largo, ishcai metro ancho carca. Chunga shuj cortinataca, chashnatallata medishpa rurashcami carca.

¹⁶Picha cortinataca shican sirashpami, caishuj sucta cortinatapash shican sirarca.

¹⁷Punda sirashpa tucuchishca cortina manñapica, picha chunga tugllatami rurarca. Jipaman sirashpa tucuchishca cortina manñapipashmi, shuj picha chunga tugllata rurarca.

¹⁸Shinallata cortinacunata chimbapurashpa tandachingapajmi, picha chunga bronce arotapash rurarca. Shina tandachijpimi, shujlla carpa tucurca.

¹⁹Jatun carpata jatangapaca, jari llamapaj caracunata pucata tenishpami, shuj jatanata rurarca. Chai jahuata jatangapajpashmi, tejón nishca animalpaj caracunata, shuj jatanata rurarca.

²⁰Shinallata jatun carpapaca, acacia caspi tablacunatapashmi rurarca. Chai tablacunaca, na vinguchu carca.

²¹Tucuilla tablacunami, chuscu metro chaupi largo, sucta chunga picha centímetro ancho carca.

²²Tucuilla tablacunami caishujhuan, chaishujhuan canichishpa shayachingapaj, ishcai espigata charirca. Jatun carpapaj tucuilla tablacunatami, chashnallata rurarca.

²³Jatun carpapaj tablacunataca, ishcai chunga tablatami, urai ladoman churangapaj rurarca.

²⁴Shinallata ishcai chunga tabla ucuman churangapaj, chuscu chunga culqui bazatapashmi rurarca. Ishcai espigata charij, shujlla tabla ucuman churangapaca, ishcai bazatami rurarca. Caishuj ishcai bazatapash, ishcai espigata charij, shujlla tabla ucuman churangapajmi rurarca.

²⁵Jatun carpa caishuj ladomambash, jahua ladoman churangapajmi, shuj ishcai chunga tablata rurarca.

²⁶Chai tablacunapajpash, chuscu chunga culqui bazatami rurarca. Ishcai bazataca, shuj tabla ucuman, shuj ishcai bazatapash, caishuj tabla ucuman churangapajmi rurarca.

²⁷Jatun carpapillata, indi huashajuj ladoman churangapaca, sucta tablatami rurarca.

²⁸Jatun carpa huasha tigrashcacunapi ishcandi ladopi churangapaca, ishcai tablatami rurarca.

²⁹Chai tablacunami, ucumandapacha jahuacaman, jahua umapica, shuj bisagrahuan ali canichishca shayajurca. Chashnallatami, caishuj ladopi ishcai tablatapash, carpa tigrana ishcandi ladopaj rurarca.

³⁰Pusaj tablacunaca, chunga sucta culqui bazapi shayachishcami carca. Cada tabla ucumanmi, ishcai bazacuna carca.

³¹Picha jatun caspitapashmi, jatun carpa shuj lado tablacunapaj cachun, acacia caspita rurarca.

³²Shinallata shuj picha jatun caspitapashmi, jatun carpa caishuj lado tablacunapaj rurarca. Shuj picha jatun caspitaca, jatun carpa huasha lado tablacunapaj, indi huashajuj ladoman churangapajmi rurarca.

³³Chaupi tablacunapi yalichishpa churana jatun caspitaca, tablacunapaj chaupita yalichishpami, shuj ladomanda caishuj ladoman yalijta churarca.

³⁴Tablacunataca, orohuanmi jahualla quilparca. Chai jatun caspicunata churachingapaca, oro argollacunatami rurarca. Chai jatun caspicunatapashmi, orohuan jahualla quilparca.

³⁵Shinallata jarcana shuj telatapashmi, azul, morado, yana puca puchacunahuan caupushca lino puchahuan rurarca. Chai telapica, querubín nishcacunata juyaillaguta bordashpa rurashcami carca.

³⁶Chai telata huarcungapaca, acacia caspita rurashca, chuscu pilartami rurarca. Chaicunatapashmi, orohuan jahualla quilparca. Chai pilarcunapaj capitel nishcacunapash, orohuan jahualla quilpashcami carca. Chai pilarcunata shayachingapajpash, culquita yacuyachishpami chuscu bazata rurarca.

³⁷Jatun carpa punguta jarcangapaca, azul, morado, yana puca puchacunahuan, caupushca lino puchahuanmi shuj telata rurarca. Chaicunataca, juyaillaguta bordashpami rurarca.

³⁸Chai telata huarcungapajpash picha pilartami, chai pilarcunapaj capitel nishcacunandi rurarca. Capitelcunataca, chaipi asha llujshirishcata rurashcacunandimi, orohuan jahualla quilparca. Chaicunata shayachingapajpash, picha bronce bazatami rurarca.