Read Imbabura Highland Quichua ÉXODO 37 Bible Online

ÉXODO 37 - Imbabura Highland Quichua bible

ÉXODO 37

¹Bezaleel shuti runaca, acacia caspi arcatapashmi rurarca. Chai arcataca, shuj metro chunga centímetro largota, sucta chunga picha centímetro anchotami rurarca. Shinallata sucta chunga picha centímetro jatundami rurarca.

²Chai arcataca ucumambash, canllamambash ashtahuan ali orohuanmi jahualla quilparca. Chai jahua manña llujshirishcatapash, orohuanmi juyaillaguta rurarca.

³Chaipi churangapaca, chuscundi esquinapi churangapajmi, orota yacuyachishpa, chuscu argollata rurarca. Chai argollacunataca, ishcaitaca shuj ladopi, shuj ishcaitaca caishuj ladopimi churarca.

⁴Acacia caspi varacunata rurashpami, orohuan jahualla quilparca.

⁵Chai vara caspicunataca, arcata chaicunahuan huandushpa apangapajmi, arcapaj ishcandi ladopi churashca argollacunapi churachirca.

⁶Shinallata arcapaj tapatapash, ashtahuan ali orotami rurarca. Shuj metro chunga centímetro largota, sucta chunga picha centímetro anchotami rurarca.

⁷Shinallata ishcai querubín nishcacunatapash, orotallatami rurarca. Chaicunataca, tapa jahua ishcandi manñapimi, chai tapahuanllata shujllata rurarca.

⁸Shuj querubindaca shuj manñapi, caishuj querubindaca, caishuj manñapimi churarca. Chaicunataca, tapapaj ishcandi manñapimi, chai tapahuanllata shujllata rurarca.

⁹Querubingunaca, paicunapaj alascunata jahualla pascashcami, paicunapaj alascunahuan arcapaj tapata quilpanajurca. Querubingunapaj ñavicunaca caishujhuan, chaishujhuan chimba purami chai tapata ricunajurca.

¹⁰Shinallata mezatapashmi, acacia caspihuan rurarca. Chai mezataca, iscun chunga centímetro largota, chuscu chunga picha centímetro anchotami rurarca. Shinallata sucta chunga picha centímetro jatundami rurarca.

¹¹Chai mezataca, ashtahuan ali orohuanmi jahualla quilparca. Chai meza manñatapash jarcashpami, orohuan juyaillaguta rurarca.

¹²Chai manñatapash, canchis centímetro anchota jarcashpami, asha llujshirishcata muyundi rurarca. Chai jarcashca manña muyunditapash, orohuanmi juyaillaguta rurarca.

¹³Chai mezapica, orota yacuyachishpami, chuscu argollata rurarca. Chai argollacunataca, mezapaj chuscundi chaqui esquinapi, chaquita churashca chuscundi esquinapimi rurarca.

¹⁴Argollacunaca, meza manñata jarcashpa rurashca ucumanmi tianajurca. Chai argollacunaca, vara caspicunata churachishpa, mezata huandushpa apangapajmi chashna tianajurca.

¹⁵Mezata huandushpa apangapaca, acacia vara caspicunata rurashpami, orohuan jahualla quilparca.

¹⁶Shinallata meza jahuapi tucui imalla tianacunatapashmi rurarca. Platocunata, cucharacunata, cubierto nishcacunata, Diosman vinota cushpa talina jatun tastacunatapashmi, ashtahuan ali orota rurarca.

¹⁷Shinallata ashtahuan ali oro candelerotapashmi, martillohuan tacashpa labrashpa rurarca. Candelero chaquitapash, chaquimanda vichai yalishca troncotapash, paipaj copacunatapash, paipaj manzanacunatapash, paipaj sisacunatapash, chaipillata shujllatami rurarca.

¹⁸Candeleropaj troncomandaca, sucta maquimi llujshishca carca. Candeleropaj shuj ladomambash, quimsa maqui caishuj ladomambash, quimsa maquimi llushishca carca.

¹⁹Shuj maquipica, almendro sisatashnalla rurashca quimsa copata, shujlla manzanata, shujlla sisatami rurashca carca. Caishuj maquipipash, almendro sisatashnalla rurashca quimsa copata shujlla manzanata, shujlla sisatapashmi rurashca carca. Candeleromanda llujshishca sucta maquipica, chashnallata rurashcami carca.

²⁰Candeleropaj troncopica, almendro sisatashnalla rurashca chuscu copatapash, paipaj manzanacunatapash, paipaj sisacunatapashmi rurashca carca.

²¹Ishcai maquipaj ucu ladopica, shuj manzanatami chaipillata rurashca carca. Caishuj ishcai maquipaj ucu ladopipash, shuj manzanatami chaipillata rurashca carca. Chaishuj ishcai maquipaj ucu ladopipash, shuj manzanatami chaipillata rurashca carca. Chai troncomanda imashna sucta maqui llujshishcashnallatami, chashna rurashca carca.

²²Chai candeleropaj manzanacunapash, maquicunapash shujtalla rurashcami carca. Tucui chaicunaca, ashtahuan ali orota martillohuan tacashpa rurashcami carca.

²³Chai candeleropica, canchis uchilla lamparatapashmi rurarca. Shinallata micha rupashca pavizacunata anchuchinacunatapash, chai uchufata churana platillocunatapash, ashtahuan ali orotami rurarca.

²⁴Chai candelerotaca, chaipi tucui charinacunandimi, quimsa chunga chuscu kilota pezaj ashtahuan ali orota rurarca.

²⁵Shinallata inciensota cushnichina altartapashmi, acacia caspita rurarca. Chai altartaca, chuscu chunga picha centímetro anchota rurashca cuadradomi carca. Shinallata iscun chunga centímetro jatunmi carca. Chai altarpaj cachucunaca, chaipillata rurashcami carca.

²⁶Chai altartaca jahuatapash, tucui muyundi ladotapash, cachucunatapash, ashtahuan ali orohuanmi jahualla quilparca. Chai altar muyundita jarcashca manñapica, asha llujshirishcata orohuan juyaillaguta rurashpa muyuchishcami carca.

²⁷Chai altar manñata jarcashpa muyushpa asha llujshirishcapica, chai altarpaj ishcandi lado esquinapi, ishcai oro argollata rurashcami carca. Chai argollacunapi vara caspicunata churachishpa altarta apangapajmi, chashna rurashca carca.

²⁸Acacia caspi varacunata rurashpami, orohuan jahualla quilparca.

²⁹Shinallata Diospajlla shicanyachishca cachun talishpa javina aceitetapash, ashtahuan ali inciensotapash, mishquillagu ashnajuj jambitapash, mishquillagu ashnajuj jambicunata ruranata yachajcuna rurashcashnallatami rurarca.