Read Imbabura Highland Quichua ÉXODO 4 Bible Online

ÉXODO 4 - Imbabura Highland Quichua bible

ÉXODO 4

¹Shina nijpimi Moisesca, cashna nishpa tigrachirca: —Ricui, paicunaca ñucata na crishpami, ñuca villajujtaca na uyanayachinga. Paicunaca: ‘Mandaj Diosca, canman na ricurishcachu’ nishpami, chashna ruranajunga— nircami.

²Shina nijpimi, Mandaj Diosca: —¿Cambaj maquipi charijungui, chaica imata?— nirca. Shina nijpimi, Moisesca: —Shuj vara caspimi— nishpa tigrachirca.

³Shina nijpimi: —Chai caspita alpaman shitai— nirca. Shina nijpi caspita alpaman Moisés shitajpimi, chai caspica culebraman tigrarca. Shina tucujpimi Moisesca, manllarishpa anchurirca.

⁴Shinamandami Mandaj Diosca, Moisestaca: —Cambaj maquita chutashpa, chupamanda japi— nirca. Shina nijpi maquita chutashpa Moisés japijpimi, paipaj maquipi cutin caspiman tigrarca.

⁵Cashna rurashcahuanmi, Mandaj Dios canman ricurishcataca crinajunga. Cangunapaj taitacunapaj Taita Dios, Abrahambaj Taita Dios, Isaacpaj Taita Dios, Jacobopaj Taita Dios ricurishcatami crinajunga.

⁶Mandaj Diosca, ashtahuan cashnatapashmi nirca: —Cunanga, cambaj maquita cambaj quinlluli ucuman churai— nircami. Shina nijpimi Moisesca, paipaj maquita quinllulipi churarca. Maquita cutin llujchijpica, paipaj maquica lepra ung:uihuanmi, rasushna yuraj yuraj ñapash ricurirca.

⁷Shina cajpimi: —Cambaj maquita, cambaj quinlluli ucuman cutin churai— nirca. Shina nijpimi Moisesca, paipaj maquitaca paipaj quinllulipi cutin churarca. Maquita paipaj quinllulimanda cutin llujchijpica, paipaj cuerposhnallatami, ñapash aliman tigrashca carca.

⁸Moisestaca cashnami nirca: —Callaripi can rimashpa imata rurashcata na crishpa na cazushpapash, jipaman rimashpa can imata rurashcatami crinajunga.

⁹Cashna manllarinacunata rurashpa ishcaicaman ricuchijpipash na crishpa, can ima nishcatapash na uyajpica, jatun yacumanda yacuta japishpa alpapi talingui. Jatun yacumanda japishpa talishca yacuca, alpapica yahuarmanmi tigranga— nircami.

¹⁰Shina nijpimi Moisesca, Mandaj Diostaca cashna nirca: —¡Aij, Jatun Dioslla! Ima horallapash ali rimaj runaca, na cashcanichu. Pundacunapash, canda servij ñucata cunan can rimajujpipash, ali rimaitaca na ushajupanichu. Ñucaca na ucha rimai ushaj, jallupash jarcarishpa jarcarishpa rimaj runami cani— nijurcami.

¹¹Shina nijpimi Mandaj Diosca, cashna nishpa tigrachirca: —Shimitaca, ¿pita runaman curca? Na cashpaca, na rimai ushajtapash, rinri na uyajujtapash, ¿pita rurarca? Ñavi ricujujtapash, ñausatapash, ¿pita rurarca? ¿Nachu Mandaj Dios ñucallata rurarcani?

¹²Cunanga rilla, ñucami cambaj shimipi casha. Can imata rimanatapash, ñucami yachachisha— nircami.

¹³Shina nijpimi, Moisesca: —¡Aij, Jatun Dioslla! Pita cachana cashpapash, paita cachapailla— nirca.

¹⁴Shina nijpimi Mandaj Diosca, Moiseshuan fiñarishpa cashna nirca: —¿Nachu ñucaca, levitapura cambaj huauqui Aarondaca, ali rimaj cajta rijsini? Paimi, canda tuparingapaj llujshinga. Ricui, canda ricushpaca, paipaj shungupi cushijungami.

¹⁵Canmi paiman villangui. Canllatami, pai imata rimana shimicunatapash, paiman villangui. Ñucami cambaj shimipi, paipaj shimipi casha. Canguna imatalla ruranatapash, ñucami yachachisha.

¹⁶Paimi cambaj randi, gentecunaman villajunga. Cambaj shimihuan rimangapaj randica, paimi rimajunga. Canga, paipaca Taita Diospaj randimi cangui.

¹⁷Cai vara caspitami japishpa apana cangui. Cai caspihuanmi, imapash manllarinacunata rurashpa ricuchijungui— nircami.

¹⁸Chashna nijpimi Moisesca, paipaj suedro taita Jetropajman tigrashpa, cashna nirca: —Cunanga rigripanimi. Egiptopi ñuca huauquicuna causanajuj, na causanajujta ricungapajmi tigragrijupani— nircami. Shina nijpimi taita Jetroca, Moisestaca: —Imatapash na manllashpa, aliguta rilla— nirca.

¹⁹Mandaj Diosca Moisestaca, Madián llactapimi cashnatapash nirca: —Egiptoman tigrailla. Canda huañuchingapaj munajcunaca, tucuillami huañushca— nircami.

²⁰Shina nijpimi Moisesca, paipaj huarmitapash, paipaj huahuacunatapash, burropi tiachishpa, Egipto llactaman tigrarca. Moisesca, Taita Diospaj vara caspitapashmi aparca.

²¹Mandaj Diosca, Moisestaca cashnami nijurca: —Egiptoman ña chayashpaca, tucui juyaillacunata ñuca yachachishpa cambaj maquipi churashcataca, Faraonbaj ñaupajpi ruranguilla. Ashtahuangarin paipaj shunguta ñucami shinlliyachisha. Shina cajpimi israelcuna richunga, na saquinga.

²²Faraondaca cashna ningui: Mandaj Diosmi, cashna nirca: ‘Israelca, ñuca churimi. Paica, ñuca punda churimi.

²³Ñucaca ñami candaca, ñucata servingapaj richun, ñuca churita saqui nishcani. Ashtahuangarin richun saquingapaca, na munashcanguichu. Ricui, shinamandami cambaj punda churita huañuchigrini’ nircami ningui— nijurcami.

²⁴Ñanda pai rijujpimi, cashna tucurca: Ña tutayajpi pai samajuj pushtupimi, Mandaj Diosca, Moisesta tuparimushpa huañuchingapaj munarca.

²⁵Chaimandami Séfora shuti huarmica, shuj filo rumita japishpa, paipaj churi charishca asha aicha carata cuchurca. Chai cuchushcataca, Moisespaj chaquipi tacachishpami: “Cunanga, ñuca yahuar cusapachami cangui” nirca.

²⁶Shina rurashca jipami, Taita Diosca richun saquirca. Séfora huarmica, Moisestaca: “Chai asha caraguta cuchushcamandami, ñuca yahuar cusapacha cangui” nirca.

²⁷Mandaj Diosca, Aarondaca: “Jichushca pambapi Moisesta tuparingapaj ri” nircami. Shina nijpi rishpami, Taita Diospaj urcupi Moisesta tuparishpa mucharca.

²⁸Chaipimi Moisesca, Mandaj Dios tucui imatalla nishcatapash, tucui imatalla rurashpa ricuchishcatapash, Aaronman villajurca.

²⁹Chai jipami Moisespash, Aaronbash rishpa, israelcunata mandaj tucuilla rucucunata tandachirca.

³⁰Shina tandachishpami Aaronga, Moisesman Mandaj Dios tucui imatalla nishcacunata villajurca. Shinallata imatalla rurashpa ricuchinatapashmi, israelcunapaj ñaupajpi rurajurca.

³¹Shina rurajpimi, israelcunaca crinajurca. Shinallata israelcuna llaquita apanajujta ricushpa, paicunata ricungapaj Mandaj Dios shamushcata yachashpami, urai cumurishpa alicachinajurca.