Read Imbabura Highland Quichua ÉXODO 40 Bible Online

ÉXODO 40 - Imbabura Highland Quichua bible

ÉXODO 40

¹Chai jipami Mandaj Diosca, Moisesman cashna nishpa villajurca:

²“Punda quilla callari punllapica, jatun carpata shayachinajuchun mandangui. Chaica, ñucahuan tuparina jatun carpami.

³Chai jipaca, imashna causanata yachachishca shimicunata alichishca arcata chaipi churangui. Chaitaca telahuan quilpangui.

⁴Mezataca, ucuman churashpa, aliguta alichishpa churangui. Shinallata candelerotapash ucuman churashpa, lamparacunapi michata japichingui.

⁵Inciensota cushnichina oro altartapash, imashna causanata yachachishca shimicunata alichishca arca ñaupajpi churangui. Cortinataca, jatun carpaman yaicuna pungu ñaupajpi huarcungui.

⁶Chai jipaca, animalcunata cushpa tucuillata rupachina altartapash, ñucahuan tuparina jatun carpaman yaicuna ñaupajpi churangui.

⁷Chaipaj catica jatun pailataca, ñucahuan tuparina jatun carpahuan, altarhuan chaupipi churashpa, chai pailapica yacuta jundachingui.

⁸Ña tucuchingapaca, patio muyunditapash aliguta rurangui. Shinallata cortinatapash, patioman yaicuna pungupi huarcungui.

⁹Chai jipaca, talishpa javina aceiteta japishpa, jatun carpapipash, chaipi tucui imalla tiashcacunapipash talishpa javingui. Jatun carpataca, chaipi tucui imalla tiashcacunandi, ñucapaj cachun shicanyachijpimi ñucapajlla canga.

¹⁰Shinallata animalcunata cushpa tucuillata rupachina altartapash, chaipi tucui imalla tiashcacunandi aceiteta talishpa javingui. Altartapash, ñucapajlla cachun shicanyachingui. Shina rurajpimi, ñucapajlla shicanyachishca altar canga.

¹¹Shinallata jatun pailatapash, pailata churana bazatapash aceiteta talishpa javingui. Chaitapash ñucapajlla cachunmi, rurana cangui.

¹²Chai jipaca Aarondapash, paipaj churicunatapash, ñucahuan tuparina jatun carpa punguman pushashpami, yacuhuan armachina cangui.

¹³Aarondaca, ñucapajlla shicanyachishca churajunata churachingui. Paitaca, ñucapajtalla ruraj cura cachun aceiteta talishpa javishpa shicanyachingui.

¹⁴Chaipaj jipaca, paipaj churicunatapash cayashpa, túnica nishca churajunacunata churachingui.

¹⁵Paicunatapash, paicunapaj taitata aceiteta talishpa javishcashnallata, aceiteta talishpa javingui. Shina rurajpimi, ñucapajta ruraj curacuna canga. Aceiteta talishpa paicunata javishcapash, paicunapaj miraicunandi tucui causaipaj ñuca curacuna cachun javishcami canga” nijurcami.

¹⁶Moisesca, Mandaj Dios tucuita imashna mandashcashnallatami, chashnatapacha rurarca.

¹⁷Chashnami, cati huatapaj callari quilla punda punllapi, jatun carpata shayachishpa tucuchirca.

¹⁸Moisesca, jatun carpata shayachinajuchunmi mandarca. Chai carpapaj bazacunata churashpa, tablacunata churashpami, jatun caspicunatapash churachirca. Shinallata chai carpapaj pilarcunatapashmi shayachirca.

¹⁹Pilarcunata shayachishca jahuapimi, carpata jahualla churarca. Chai carpa jahuapipash, Mandaj Dios imashna Moisesta mandashcashnallatami, ashtahuan jahualla jatarca.

²⁰Imashna causanata yachachishca shimicunatapash japishpami, arca ucupi churarca. Shinallata arcata huanduna vara caspicunatapash arcapi ali churachishpami, arca tapatapash arca jahuapi churarca.

²¹Chai jipami arcataca, jatun carpa ucupi churashpa telata huarcurca. Imashna causanata yachachishca shimicunata alichishca arcataca, Mandaj Dios imashna Moisesta mandashcashnallatami quilparca.

²²Mezataca, Dioshuan tuparina jatun carpa ucupimi, cortinata huarcushca jahua ladoman, telata huarcushca canlla ladoman churarca.

²³Chai mezapimi, Mandaj Diospaj ñaupajpi, Mandaj Dios imashna Moisesta mandashcashnallata tandacunata jilapi churarca.

²⁴Candelerotapash, Dioshuan tuparina jatun carpa ucupillatami, meza ñaupajpi, cortinata huarcushca ura ladoman churarca.

²⁵Lamparacunataca, Mandaj Diospaj ñaupajpimi, Mandaj Dios imashna Moisesta mandashcashnallata michata japichirca.

²⁶Shinallata oro altartapash, Dioshuan tuparina jatun carpapillatami, telata huarcushca ñaupajpi churarca.

²⁷Chai altar jahuapimi, Mandaj Dios imashna Moisesra mandashcashnallata, mishquillagu ashnajuj inciensota cushnichijurca.

²⁸Shinallata carpaman yaicunapipashmi, cortinata huarcurca.

²⁹Diosman animalcunata cushpa tucuillata rupachina altartapash, Dioshuan tuparina jatun carpaman yaicuna ladopimi churarca. Shina churashpami, Diosman cushpa tucuillata rupachina animaltapash, Diosman imata carashcatapash, Mandaj Dios imashna Moisesta mandashcashnallata rupachijurca.

³⁰Jatun pailatapash, Dioshuan tuparina jatun carpahuan, altarhuan chaupipimi churarca. Shina churashpami, chai pailapica maillana yacuta jundachirca.

³¹Chaipimi Moisespash, Aaronbash, paipaj churicunapash, chai yacupi paicunapaj maquita, chaquita maillanajurca.

³²Dioshuan tuparina jatun carpaman yaicungapaj, shinallata altarman chayangapaca, Mandaj Dios imashna Moisesta mandashcashnallatami maillanajurca.

³³Ña tucuita rurashpa tucuchingapaca, jatun carpapaj patio muyunditapash, altarpaj patio muyunditapashmi jarcarca. Chai jipaca, patioman yaicunapi jarcana telatami churarca. Chashnami Moisesca, tucui ruranacunata tucuchirca.

³⁴Chai jipami, Dioshuan tuparina jatun carpataca, fuyu quilparca. Mandaj Diospaj punchapambapashmi, jatun carpapica jundarca.

³⁵Dioshuan tuparina jatun carpa jahuapica, fuyu junda cajpi, Mandaj Diospaj punchapambapash, chai carpapi junda cajpimi Moisesca, na yaicui usharca.

³⁶Fuyuca, jatun carpa jahuamanda ña vichai jatarijpimi, israelcunaca asha asha shamui callarinajurca.

³⁷Ashtahuangarin fuyu ña vichai jatarijpica, fuyu jatarina punllacaman na ri ushanajurcachu.

³⁸Ashtahuangarin Mandaj Diospaj fuyuca, punllapica jatun carpa jahuapimi carca. Tutapica ninami, paicuna asha asha rinacunapipash, tucuilla israelcuna ricujta chai jahuapillata carca.