Read Imbabura Highland Quichua ÉXODO 6 Bible Online

ÉXODO 6 - Imbabura Highland Quichua bible

ÉXODO 6

¹Shina nijpimi Mandaj Diosca, Moisesman cashna nishpa tigrachirca: —Cunanmi, Faraonda ñuca imatalla rurajta ricungui. Paitaca, shinlli maquihuan llaquichijpimi, israelcunataca richun saquinga. Chashna shinlli maquihuan llaquichijpimi, paipaj llactamanda llujchishpa cachanga— nircami.

²Taita Diosca, Moiseshuan parlajushpallatami, cashna nijurca: —ÑUCAMI, MANDAJ DIOS CANI.

³Tucuita Rurai Ushaj Taita Dios cashpami Abrahammambash, Isaacmambash, Jacobomambash ricurircani. Shina cashpapash paicunapica, MANDAJ DIOS shutihuanga na rijsirishcanichu.

⁴Shinallata Canaán llactata carashapachami nishpa ñuca ari nijushcataca, shinllitapachami churarcani. Chai llactapimi paicunaca, shuj llactamanda runacunashna purinajurca. Paicunaca, chai llactapillatami causanajurca.

⁵Shinallata Egiptopi causajcuna ninanda servichinajujpi, israelcuna aij ninajujtapashmi uyarcani. Shina uyashpami, paicunahuan ari nijushcatapash yarircani.

⁶Shina cashcamanda israelcunataca, cashna ningui: ‘ÑUCAMI, MANDAJ DIOS CANI. Ñucami cangunataca, Egiptopi shinllipacha ruranacunamanda llujchisha. Shinallata gañan causanajushcamandapashmi cacharichisha. Ñuca rigrata chutashpa, jatun llaquicunahuan paicunata llaquichishpami, cangunataca quishpichisha.

⁷Cangunataca, ñucapaj cachun japishpami, cangunapaj Taita Dios casha. Cangunapash ñucataca, Egiptopi ninan shinlli ruranacunamanda llujchij, cangunata Mandaj Dios cajtami yachanguichi.

⁸Abrahamman, Isaacman, Jacoboman carashapachami nishpa, ñuca maquita alsashpa juramentushca llactamanmi pushasha. MANDAJ DIOS ñucami, chai llactataca cangunapaj cachun carasha’ ninmi ningui— nijurcami.

⁹Shina nishcataca Moisesca, chashnallatami israelcunaman villajurca. Ashtahuangarin paicunaca, paicunapaj shungupi ninan llaquihuan cashcamanda, gañan causanajushcamandami, Moisestaca na uyanayachinajurca.

¹⁰Shina cajpimi Mandaj Diosca, Moisestaca cashna nirca:

¹¹—Egipto llactata jatun mandaj Faraonbajman rishpa, cashna ningui: ‘Israelcunataca, cambaj llactamanda richun saqui’ ningui— nircami.

¹²Shina nijpimi Moisesca, Mandaj Diospaj ñaupajpi cashna nishpa tigrachirca: —Ricui, israelcunaca na uyanayachinllu. Faraongarin, ¿imashnamanda uyahuangayari? Ñucaca, jarcarishpa jarcarishpa rimaj runamari cani— nijurcami.

¹³Shina nijpimi Mandaj Diosca, Moisestapash, Aarondapash rimashpaca, israelcunata llujshichi nishpa mandachun cacharca. Shinallata Egipto llactata jatun mandaj Faraondapash, israelcunata Egipto llactamanda llujchingui nishpa mandachunmi cacharca.

¹⁴Paicunapaj taitacunapaj mirai familiacunata mandajcunaca caicunami: Taita Israelpaj punda churi Rubenbaj miraicunaca: Hanoc, Falú, Hezrón, Carmi shuticunami. Paicunami, Rubenbaj mirai familiacuna.

¹⁵Simeonbaj churicunaca: Jemuel, Jamín, Ohad, Jaquín, Zohar, Saúl shuticunami. Saulca, cananea huarmipaj churimi carca. Paicunami, Simeonbaj mirai familiacuna.

¹⁶Leví shuti runapaj churicunapaj shuticunaca, paicunapaj miraicuna imashna cashcashnallata caicunami: Gersón, Coat, Merari shuticunami. Leví runaca, patsaj quimsa chunga canchis huatatami causarca.

¹⁷Gersón shuti runapaj churicunaca, paicunapaj familiacuna imashna cashcashnallata Libni shuti, Simei shutimi carca.

¹⁸Coat shuti runapaj churicunaca: Amram, Izhar, Hebrón, Uziel shuticunami carca. Coat runaca, patsaj quimsa chunga quimsa huatatami causarca.

¹⁹Merari shuti runapaj churicunaca: Mahli shuti, Musi shutimi carca. Paicunami, Levipaj miraicuna imashna cashcashnallata levita familiacuna.

²⁰Amram shuti runaca, paipaj tía Jocabed shuti huarmitami, paipaj huarmi cachun japirca. Chai huarmimi, Aaronda, Moisesta ungurca. Amram shuti runaca, patsaj quimsa chunga canchis huatatami causarca.

²¹Izhar shuti runapaj churicunaca: Coré, Nefeg, Zicri shuticunami.

²²Uziel shuti runapaj churicunaca: Misael, Elzafán, Sitri shuticunami.

²³Aarón runaca, Aminadab shuti runapaj ushi Elisabettami, paipaj huarmi cachun japirca. Elisabetca, Naasón shuti runapaj panimi carca. Paimi: Nadab, Abiú, Eleazar, Itamar shuti churicunata ungurca.

²⁴Coré shuti runapaj churicunaca: Asir, Elcana, Abiasaf shuticunami. Paicunami, coreíta nishca familiacuna.

²⁵Aaronbaj churi Eleazarca, Futiel shuti runapaj ushi puramandami, paipaj huarmi cachun japirca. Chai huarmimi, Finees shuti churita ungurca. Paicunami, paicunapaj familiacuna imashna cashcashnallata levitacunapaj taitacunata mandajcuna.

²⁶Mandaj Diosca, cai Aaronda, cai Moisestami: “Israelcunataca, soldadocunatashna shican shican tandachishpa, Egipto llactamanda llujchigrichi” nirca.

²⁷Israelcunata Egiptomanda llujchingapaca, paicunami Egipto llactata jatun mandaj Faraonda rimanajurca. Paicunaca Aaronbash, Moisespashmi carca.

²⁸Mandaj Diosca, Egipto llactapimi Moisesman rimajurca.

²⁹Shina rimajushpami Mandaj Diosca, Moisestaca cashna nirca: —ÑUCAMI, MANDAJ DIOS CANI. Canman ñuca tucui imatalla nishcataca, Egipto llactata jatun mandaj Faraonman villagri— nircami.

³⁰Shina nijpimi Moisesca, Mandaj Diospaj ñaupajpi cashna nishpa tigrachirca: —Ñucaca, jarcarishpa jarcarishpa rimaj runamari cani. ¿Imashnamanda Faraonga uyahuangayari?— nijurcami.