Read Imbabura Highland Quichua ÉXODO 9 Bible Online

ÉXODO 9 - Imbabura Highland Quichua bible

ÉXODO 9

¹Chai jipami Mandaj Diosca, Moisestaca cashna nirca: —Faraonbaj ñaupajman rishpa, cashna nigri: Hebreocunata Mandaj Taita Diosca, cashnami nin: ‘Ñuca agllashcacunataca, ñucata servingapaj richun saqui.

²Richun saquingapaj na munashpa can jarcajujpica,

³ricui, Mandaj Diospaj maquihuanmi, pambapi shayanajuj cambaj animalcunataca llaquichinga. Caballocunata, burrocunata, camellocunata, huagracunata, llamacunatapashmi, ninan ung:uihuan llaquichinga.

⁴Mandaj Diosca, israelcunapaj animalcunatapash, Egiptopi causajcunapaj animalcunatapashmi shicanyachinga. Israelcunapaj animalcunaca, shujllapash ama huañuchunmi chashna shicanyachinga’ ninmi ningui— nircami.

⁵Mandaj Diosca, ima punlla llaquichinatapash villashpami: —Cayami Mandaj Dios ñucaca, cai llactapi cashna llaquichisha— nirca.

⁶Shina nishca cayandi punllapica, Mandaj Dios chashna llaquichijpimi, Egiptomanda tucuilla animalcunaca huañurca. Ashtahuangarin israelcunapaj animalcunaca, shujllapash na huañurcachu.

⁷Shina cashcamanda Faraón ricuchun cachajpica, israelcunapaj animalcunaca shujllapash na huañushcachu carca. Ashtahuangarin Faraonbaj shungu shinlliyashpami, israelcuna richunga na saquirca.

⁸Mandaj Diosca, Moisestapash, Aarondapash cashnami nirca: —Shuj jornomanda, maqui junda uchufata japichi. Chaitaca Moisesmi, Faraonbaj ñaupajpi jahuaman tsirapachinga.

⁹Chai uchufami, ñutu alpa tucushpa tucuilla Egipto llactapi jicharimunga. Chaimandami, chupu tugyanalla caracha ung:uica gentecunapipash, animalcunapipash, tucuilla Egipto llactapi llujshinga— nircami.

¹⁰Shina nijpimi Moisespash, Aaronbash, jornomanda uchufata japishpa, Faraonbaj ñaupajpi shayarishpa Moisesca, uchufata jahuaman tsirapachirca. Shina rurajpimi, chupu tugyanalla caracha ung:uica gentecunatapash, animalcunatapash japirca.

¹¹Shinallata yumbucunapash, chupu ung:uihuan japi tucushca cashpami, Moisespaj ñaupajpi shayaritaca na ushanajurca. Yumbucunapipash, Egiptopi tucui causajcunapipash, tugyanalla chupu ung:ui japijpimi na ushanajurca.

¹²Ashtahuangarin Mandaj Diosllatami, Faraonbaj shungutaca shinlliyachirca. Shinamandami, Mandaj Dios imashna Moisesman nishcashnallata, paicunataca na uyanayachirca.

¹³Chai jipami Mandaj Diosca, Moisestaca cashna nijurca: —Caya tutamandata jatarishpa, Faraonbaj ñaupajpi shayaringui. Paitaca cashna ningui: Hebreocunata Mandaj Diosca, cashnami nin: ‘Ñuca agllashcacunataca, ñucata servingapaj richun saqui.

¹⁴Can na saquijpica, cunanga huañuchina tucui llaquichinacunatami, cambaj shungumambash, canda servijcunamambash, cambaj gentecunamambash cachamusha. Tucui cai pachapica, ñucashnaca pipash na tiashcata can yachachunmi, chashna cachamusha.

¹⁵Cunanga candapash, cambaj gentecunatapash, ninan llaquichinahuan llaquichingapajmi ñuca maquita chutasha. Shina rurajpimi, cai pachamandaca anchuchi tucungui.

¹⁶Napacha llullashpami nini. Ñuca ushaita cambi ricuchingapaj, shinallata ñuca shutipash tucui cai pachapi uyarijuchunmi, candaca churarcani.

¹⁷¿Cunangamanllu ñuca agllashcacuna richun saquingapaj na munashpa fiñanguira?

¹⁸Ricui, caya cai horasllatami, Egipto llacta tiaj callarishcamandapacha, cunangaman ima horapash na tiashca runduta tamiachimusha.

¹⁹Shina cashcamanda cambaj animalcunatapash, pambapi tucui imatalla can charishcacunatapash tandachinajuchun cachai. Gente cashpapash, animal cashpapash huasiman na apajpi pambapi shayanajujpica, paicunapaj jahuapi rundu urmajpimi huañunga’ ninmi ningui— nijurcami.

²⁰Mandaj Dios imata nijujta Faraonbaj servij puracunamanda uyashpa, maijan manllajcunaca, paicunapaj servijcunatapash, paicunapaj animalcunatapashmi, huasipi pacajugrichun cacharca.

²¹Ashtahuangarin Mandaj Dios imata nijujta shungupi na chasquijcunaca, paicunapaj servijcunatapash, animalcunatapash, pambapi saquircallami.

²²Mandaj Diosca, Moisestaca cashnami nirca: —Tucuilla Egipto llactapi rundu urmamuchun, cambaj maquita jahua pachaman chutai. Gentecunapaj jahuapi, animalcunapaj jahuapi, shinallata Egipto llacta pamba jihua jahuacunapi rundu urmamuchun, chashna chutai— nircami.

²³Shina nijpimi Moisesca, pai charijuj vara caspita jahua pachaman chutarca. Shinallata Mandaj Diospash, culun nichishpa runduchishpami, ninatapash cai pachaman cachamurca. Mandaj Diosmi, Egipto llactapica runduta tamiachimurca.

²⁴Chashnami rundupash, ninapash ninan jatun runduhuan chapurishpa urmamurca. Gentecuna causai callarishcamandapacha, tucui Egipto llactapica, ima horapash na chashna tiashcachu carca.

²⁵Chai rundumi, Egipto llactapica, pambapi tucui ima tiashcatapash, gentecunatapash, animalcunatapash llaquichijurca. Shinallata pambapi tucuilla jihuacunatapashmi, runduca tucuchijurca. Chai llactapi tucuilla quiru malquicunatapashmi faquijurca.

²⁶Israelcuna causanajuj Gosén shuti llactapillami, runduca na urmarca.

²⁷Shinamandami Faraonga, Moisestapash, Aarondapash cayachun cachashpa cashna nirca: —Cunangarimbash juchatami rurashcani. Mandaj Diosca, imatapash cashcatapacha rurajmi. Ñucahuan, ñuca gentecunahuanga, Diosta na manllajcunami canchi.

²⁸Taita Dios culun nichishcacunapash, rundupash jarcarichun, Mandaj Diosta mañapaichi. Chai jipaca, canguna richun saquishallami. Shinamandami, na ashtahuan shuyashpa ringuichi— nircami.

²⁹Shina nijpimi Moisesca, cashna nishpa tigrachirca: —Pueblomanda ñuca llujshishcandi, Mandaj Diospajman ñuca maquita chutajpimi, culun nishcacunapash jarcarishpa, rundupash na ashtahuan urmamunga. Cai pachaca, Mandaj Diospaj cajta can yachachunmi, chashna rurasha.

³⁰Ashtahuangarin Mandaj Taita Dios ricujujtaca cambash, canda servijcunapash nara manllajtami yachani— nircami.

³¹Lino nishca yuracunapash, cebadapash tucuchi tucushcami. Cebadaca, ña espigashcami carca. Linopash, ña jatunmi carca.

³²Ashtahuangarin trigohuan, centeno nishca granohuanllami, jipa tarpushca cashpa na tucuchi tucushca.

³³Moisesca, Faraonbaj ñaupajmanda, pueblomanda canllaman llujshishcandimi paipaj maquita, Mandaj Diospajman chutarca. Shina chutajpimi, culun nijujpash, rundu urmajujpash jarcarirca. Shinallata tamiapash llactapica, na ashtahuan urmamurcachu.

³⁴Faraonga, tamiapash, rundupash, culun nijujpash jarcarijta ricushpami, juchata rurashpa catijurca. Paipaj shungupash, paita servijcunapaj shungupashmi shinlliyarca.

³⁵Faraonbaj shungu shinlliyashpami, Mandaj Dios imashna Moisesman nishcashnallata, israelcuna richunga na saquirca.