Read Imbabura Highland Quichua JOB 10 Bible Online

JOB 10 - Imbabura Highland Quichua bible

JOB 10

¹Ñuca almaca, ñuca causaihuanga ñamari shaijushca. Ñuca llaquicunahuan aij nijushcataca, na manllashpa villajushallami. Ñuca almapi ninanda llaquirishpami villajusha.

²Taita Diostaca, cashnami nisha: ‘Llaquichi tucunapachami nishpa, ama saquihuaichu. Ñucahuan imamanda fiñarishcatapash ricuchihuayari.

³¿Cambaj maquihuan rurashca runatallata yangapi churashpa ninanda llaquichishpa, canda na manllajcuna yarinajushcatara alipi churanaca, alimi yanguichu?

⁴Canga, huañuna runapaj ñavitashnaca, napacha charinguichu. Canga, na runa ricujunshna ricunguichu.

⁵¿Cambaj causai punllacunaca, runapaj causai punllacunashnachu? ¿Na cashpaca cambaj huatacunaca, huañuna runacunapaj huatacunashnachu?

⁶Ñuca nalita rurashcataca, ¿imapajta ali yachangapaj munangui? Ñuca juchataca, ¿imapajta callarishpa mascangui?

⁷Ñuca, canda manllaj cajtaca, canllata yachanguimi. Cambaj maquimanda ñucata, pipash na quishpichi ushashcatapash yachanguimi.

⁸Cambaj maquihuan rurashpami churahuarcangui. ¿Shina rurashca jahuachu, cutin tucuchigrihuangui?

⁹Ñucataca, alpa turutashna rurashcata yarihuayari. ¿Ñutu alpamanllatachu tigrachigrihuangui?

¹⁰Ñucataca, ¿nachu lechetashna talishpa, quezotashna cuajarcangui?

¹¹Ñucapica carata, aichatami churachircangui. Tullucunatapash, yahuar purina angucunahuanmi ahuashpa churarcangui.

¹²Llaquishpami, causaitapash cuhuarcangui. Can cuidashpami, ñuca espiritutaca aliguta charingui.

¹³Chaicunataca, cambaj shungupimi alichishpa charijungui. Chaicunaca, cambaj ladopi cajtami yachani.

¹⁴Juchata ñuca rurashca cajpipash, canllatami ricungui. Shinamandami ñuca ima nalita rurashcamandaca, mapa illajtashnaca na ricuhuangui.

¹⁵Ñuca chashna nali cashpaca, ¡aij imachari tucusha! Imatapash cashcatapacha ruraj cashpapash, umatallapash na alsai ushashachu. Cunanga, cashna pinganayai llaquihuanmi shaijushca cani.

¹⁶Ñuca umata alsajpica, leonshnami japihuangui. Japishpaca cutinllatami ñucataca, imapash manllarinacunata rurangui.

¹⁷Ñucataca, ashtahuan llaquichishpa ricungapajmi, cutin alichijungui. Manllanayai soldadocunashnami, ninandapacha can fiñarinataca mirachijungui.

¹⁸Ñucataca, ¿imapajta vijsa ucumanda llujchihuarcangui? Ñuca huañushca cajpica, pipash na ricunmanllu carca.

¹⁹Ñucaca, na huacharishcashnami caiman carcani. Vijsamandaca, pambana utujumanmi apai tucuiman carcani.

²⁰Ñuca causai punllacunaca ashallamari, ama ashtahuan llaquichihuaichu. Ashatallapash cushijuchun saquihuayari.

²¹Cutinga na tigramungapaj nara rijpillata, huañui japinalla llandu, manllanayai yana pachaman nara rijpillata, ashatallapash cushijuchun saquihuayari.

²²Chai yana yana pachapica, huañuchij llandulla tiashpa imapash nalichu. Shinallata chaipi tiaj michapash, manllanayai yana yana tutashnallatami’ nishami” nijurcami.